Alkibiades
Alkibiades (ooldgr. Ἀλκιβιάδης; * um 451 v. Chr. rüm in Athen; † 404 v. Chr. in Phrygien) weer en bedüdenden Staatsmann, Rhetor un Feldherr ut dat antike Athen. He stamm ut de vermaarde Adelsfamilie vun de Alkmaioniden. In de tweede Hälfte vun den Krieg vun'n Peloponnes speel he en unbannige Rull as Strategen, militäärschen Befehlhebber un Politiker.
Leven un Dood
[ännern | Bornkood ännern]In den Krieg hett he en poor mol de Sieten wesselt. Um 420 v. Chr. hett he sik in siene Heimatstadt Athen for en aggressive Butenpolitik utspraken un hett sik dor bannig for stark maakt, den Krieg ok na Sizilien hen to bringen. Nadem siene polietschen Feende em anklaagt harrn vunwegen „Frevel an de Religion“, is he utknepen na Sparta hen. Dor hett he as strateegschen Raatgever deent un allerhand Vörsläge maakt, gröttere Feldtöge gegen Athen to unnernehmen. To'n Deel hett he de ok sülms anföhrt. Man ok in Sparta hett he sik fix Feende maakt un so möss he utbüxen na dat Perserriek. Dor weer he Raatgever vun den Satrapen Tissaphernes. Man dat duer nich lang, dor hefft em siene Frunnen in Athen besnackt, datt he torüchkamen scholl. Achternah hett he en poor Johre in Athen as General deent, bit siene Feende em tolest to'n tweeden Mol verbannen konnen.
Alkibiades is denn toeerst na Thrakien up sien Besitt tagen un na de Nedderlage vun Athen gegen Sparta an den Hoff vun den pers'schen Satrapen Pharnabazos nah Daskyleion gahn. De spartaansche Befehlhebber Lysander hett sik dor tohopen mit de Dartig Tyrannen, de he in Athen an'e Macht brocht harr, achter klemmt, datt Alkibiades 404 v. Chr. up de Flucht in Melissa in Phrygien an'e Siet maakt wurrn is. Siene Leevste, dat weer de Hetäre Timandra, schall em begraven hebben.
De wichtigsten Borns, de vun sien Leven vertellt, sünd Thykidides un Xenophon siene Vertellen. Dor kaamt denn noch sekundäre Borns to, unner annern Diodor (de sik up Ephoros stütten dö), Plutarch un Cornelius Nepos.
Literatur
[ännern | Bornkood ännern]- Walter M. Ellis: Alcibiades. Routledge, London u. a. 1989, ISBN 0-415-00993-6.
- David Gribble: Alcibiades and Athens. A Study in Literary Presentation. Clarendon Press, Oxford 1999, ISBN 0-19-815267-1 (Rezension im Bryn Mawr Classical Review).
- Jean Hatzfeld: Alcibiade. Étude sur l’histoire d’Athènes à la fin du Ve siècle. 2. Auflage. Presses Universitaires de France, Paris 1951.
- Herbert Heftner: Alkibiades. Staatsmann und Feldherr. Wissenschaftliche Buchgesellschaft, Darmstadt 2011, ISBN 978-3-89678-732-3 (Rezension bi H-Soz-Kult; Rezension in sehepunkte).
- Donald Kagan: The Peloponnesian War. Viking, New York u. a. 2003, ISBN 0-670-03211-5.
- Wolfgang Schuller: Alkibiades. In: Kai Brodersen (Rutg.): Große Gestalten der griechischen Antike. 58 historische Portraits von Homer bis Kleopatra. Beck, München 1999, ISBN 3-406-44893-3, S. 337–346, 481 f.
