Adolf Jäger

Adolf Jäger (* 31. März 1889 in Altona/Elv; † 21. November 1944 in Hamborg-Altona) weer en düütsch Footballspeler.

Sien Stammvereen wurr (nah vörherig Liddmaatschap bi Union 03 Altona, wo he ok noch Slagball speel) de Altonaer FC van 1893, för de he eerstmals an' Wiehnachtsdag 1907 tegen Dordrecht FV (Holland) antreden is. Bit 1927 sall Jäger as Störmer vun de dormalig Spitzenmannschap, de mehrmals Hamborger un Norddüütsch Meester wurr, in över 700 Spelen in de Ligamannschap (insluutend Früendschapsspelen) mehr as 2000 Doren schaaten hemm.

Tüschen 1908 un 1924 hett he dorto 18 Spelen för de Düütsch Footballnatschonalmannschap maakt (dorvan teihnmal as Speelführer) un hett 11 Doren schaaten. He weer der eerste, de teihnmal as Kapitän uploopen is, wat eerst an' 1. Januar 1933 vun Ludwig Leinberger överboden wurr.

Buterdem speel he 51 mal^[1] in de Norddüütsch Utwahl, mit de he 1914, 1917 un 1919 den Kronprinzenpokal (1919–1933: Bundespokal; 1950–1996: Amateur-Lännerpokal) wunn. Alleen in dissen Wettbewarf hett Adolf Jäger tüschen 1908 un 1924 26 Spelen maakt un dorbi 35 Doren schaaten. 1912 hörr he to de düütsch Olympisch Footballmannschap.

1927 wurr he mit de Adlerplakette, de dormals hööchste Utteken in den düütschen Sport, ehrt. Der latere Riekstrainer Otto Nerz hett hüm „eines der größten Genies des deutschen Fußballsports und Schöpfer des modernen Kombinationsspiels“ nömmt. De tageszeitung stell Jäger 1999 in hör „Elf des Jahrhunderts“. Nah hüm wurr 1944 de Speelstäe vun den Altonaer FC, de Adolf-Jäger-Kampbahn an de Griegstraße in Ottensen, nömmt.

Jäger hett bald nah den Eersten Weltkrieg en Zigarrenladen apen maakt un in de 1920er Johren gemeensam mit en Altonaer Mitspieler dat Herrenutstattergeschäft Jäger & Koch an' Hamborger Jungfernsteeg. He weer verheiraadt un harr en Söhn. Wiels den Tweeten Weltkrieg is Adolf Jäger bi Bombenentschärfungsarbeiten an dat Altonaer Elvufer to Dood kommen. Sien Graffstäe befind sück up den Altonaer Hööftkarkhoff an' Volkspark.

Literatur

Norbert Carsten: Altona 93. 111 Ligajahre im Auf und Ab. Die Werkstatt, Chöttingen 2003 ISBN 3-89533-437-5 (insbes. S. 34 un 76-78)
Eduard Hoffmann: Er kannte keine Überhastung. die tageszeitung van' 1. Dezember 1999, S. 18
Olaf Wuttke: Adolf Jäger und der AFC. Eine Fußballegende. Altonaer Anzeiger van' 30. November 1999, S. 7

Weblenken

Adolf Jäger in de Datenbank vun Sports-reference.com (engelsch)

Enkeld Nahwiesen

↑ So de Festschrift 25 Jahre Norddeutscher Sportverband e.V., Hamborg 1930, bearbeit vun Peter Meis, Siet 167. Dree Johr tovör harr de Verband Jäger för de sien 50. Speel offiziell ehrt; dat bleev sien letzt. Jankowski/Pistorius/Prüß trecken in Fußball im Norden, Bremen un Barsinghausen 2005, up Siet 68 ok disse Tall in Twiefel un akzepteeren 48 Insatzen. En Problem för Statistiker stellen verscheeden Spelen mit unklor Status - "offiziell" un/oder "inoffiziell" - dor.

[1] So de Festschrift 25 Jahre Norddeutscher Sportverband e.V., Hamborg 1930, bearbeit vun Peter Meis, Siet 167. Dree Johr tovör harr de Verband Jäger för de sien 50. Speel offiziell ehrt; dat bleev sien letzt. Jankowski/Pistorius/Prüß trecken in Fußball im Norden, Bremen un Barsinghausen 2005, up Siet 68 ok disse Tall in Twiefel un akzepteeren 48 Insatzen. En Problem för Statistiker stellen verscheeden Spelen mit unklor Status - "offiziell" un/oder "inoffiziell" - dor.

[1]