℅
℅ (oder c/o) is en afkört Teken för dat Tostellen vun de Post. Dat stammt af vun dat engelsche care of, wat so veel bedüden deit, as unner de Sorg vun (in den Sinn vun „wahnt dor un dor;bi“). Toeerst is dat bruukt wurrn, wenn Lüde keen egen Anschrift harrn, wiel se bi annere Lüde unnerkrapen weern un dor en Kamer hüert harrn. Denn avers ok för Vereene, de keen egen Kontoor harrt hefft un de bi en Firma unnerkamen weern un dor ehre Post henkriegen schollen. Tomeist warrt düt Teken unner den Naam vun den Adressaten up de Anschriftsiet vun en Breef bruukt un schall dor för sorgen, datt dat Schriftstück slank un direktemang tostellt warrt.
Kood
[ännern | Bornkood ännern]℅ is en egen Teken in den Unicode-Standard. In den ASCII-Tekensatz is dat nich mit bi, kann dor avers mit de Teken „c/o“ umschreven weern. Bi de een oder annere Schriftaart, un sunnerlich, wenn en lüttje Schrift bruukt warrt, kann dat vörkamen, datt dat ℅-Teken man slechter to lesen is, as, wenn een c/o bruken dö. Dat kann ok slank mit dat %-Teken (U+0025) dör’nanner bröcht weern. Normolerwiese langt dat avers, wenn een denn en gröttere Schrift nümmt. Man, vunwegen datt dat ℅-Teken up en normole Tastatur nich to finnen is, warrt dat meist mit c/o umschreven.
Woans dat Teken richtig bruukt warrt
[ännern | Bornkood ännern]Faken warrt ℅ verkehrt bruukt. Richtig warrt dat so maakt, as dat hier unner steiht:
In’n Bedrief
[ännern | Bornkood ännern]Hilke Musterfro c/o Groothannel GmbH Bahnhoffstr. 1a 12345 Enerwegens
De Breef geiht an de Mitarbeidersche Hilke Musterfro in de Groothannel GmbH. An’n Breefkassen steiht bloß „Groothannel GmbH“. De Breef schall ok man bloß vun Fro Musterfro upmaakt un lesen weern. Kann angahn, dat de Afsenner bloß man de Firmenanschrift kennt hett un will ehr doch wat schrieven, wat privaat is. Wenn Fro Mustermann nu in’n Urlaub is, schall de Breef bisiet leggt weern, bit se wedder dor is.
Bi Lüde, de annerwegens wahnt
[ännern | Bornkood ännern]Uwe Mustermann c/o Wiebke Musterfro Testgaten 98 98765 Ganzannerwegens
De Breef geiht an Herrn Uwe Mustermann, de in Fro Wiebke Musterfro ehre Wahnung mit wahnen deit. An’n Breefkassen steiht „Wiebke Musterfro“. Ofschoonst se den Breefkassen upmaken deit, draff se den Breef an Herrn Mustermann nich lesen (bloß, wenn he ehr dat utdrücklich seggt hett).
Bi Agenturen un sowat in de Aart
[ännern | Bornkood ännern]Schauspelers un Singers weert faken vun en Agentur betüdelt. Wenn een nu en Unnerschrift hebben will, so weert de Autogrammwünsche meist up düsse Aart an de Agentur richt’:
Swantje Superstar c/o Internationale Agentur för Stars un lüttje Steerns Medienpark 1 12345 Enerwegens
Swantje Superstar wahnt ganz woanners, faken ok in dat Utland. Ehre düütsche Fanpost geiht avers an düsse Agentur un kriggt dor ok (tomeist automaatsch) en Antwoort. Normolerwiese kriggt se sülms de Breeve vun ehre Fans gor nich to sehn.
Bi Sülvstännige un Lüde, de tohuse arbeiden doot
[ännern | Bornkood ännern]Wenn Lüde tohuse ehr Kontoor hefft, denn warrt dat Kontoor ok mit c/o anschreven.
Firma c/o Sibo Sülvstännig Startupweg 1337 12345 Enerwegens
Hier steiht up’n Breefkassen de börgerliche Naam „Sibo Sülvstännig“. Man he föhrt siene Geschäfte vun tohuse ut un hett, u. a. ok in’t Internet siene Privatadress as Adress vun de Firma bekannt maakt.
Towielen warrt „℅“ up düsse Aart ok vun Bedregers bruukt, de dat dor up afsehn hefft, Lüde an to smeren. Denn maakt se de Lüde dat vör, as wenn dor en Kontoor bi ehr tohuse weer un dor weer en anstännige Firma in.