Ökelbild

Vun Wikipedia
Ökelbild vun Darwin, dat em as Aap wiest
an de Wand maalt Ökelbild vun en röömschen Politiker ut Pompeji
Ökelbild vun 1890 ut den Punch, Wilhelm II. kickt Otto von Bismarck na, de de wichtigste polietsche Figur vun’t junge Kaiserriek weer, den he aver as Riekskanzler afsett harr

En Ökelbild oder ene Karikatur is en Bild, dat de dorstellten Minschen oder Tostänn spöttisch övertekent. Faken hebbt disse Biller ene polietsche Baadschop. Daagbläder un Tietschriften druckt disse polietschen Ökelbiller, de Narichten kort un knapp un mit en beten Humor op den Punkt to bringen. Blangen de polietschen Karikaturen gifft dat ok Ökelbiller, de blots ut Spaaß to’n Bispeel dat Utsehn vun de dorstellte Person överdrifft. Wenn de Person ’ne dicke Nees hett, denn warrt he mit’n resenhaftigen Knubbel in’t Gesicht maalt etc.

De Karikatur överdrifft, stellt enkelte Egenschoppen ganz groot rut un maakt dat ganze mit Ironie oder Sarkasmus lächerlich. Welk vun disse Ökelbiller harrn denn ok de Afsicht, gegenersche Ideen lächerlich to maken. En bekannt Bispeel is de Karikatur vun Charles Darwin, dat em as Aap wies, denn siene Evolutschoonstheorie segg doch, dat de Minsch vun’n Aap afstammt (tominnst sehen dat siene Gegeners so, de Theorie snackt blots vun gemeensame Vöröllern).

Historie[ännern | Bornkood ännern]

Al ut de Antike sünd Bispelen vun Biller bekannt, de Stilmiddel vun de Karikatur wiest un överdreven tekent sünd. De Karikatur as Genre is denn aver eerst to Anfang vun de Neetiet opkamen. Ut de Reformatschoonstiet kennt wi Ökelbiller, de de je annere Siet op’t Koorn nehmt. Een vun de eersten, de sik ok över dat Genre Gedanken maakt hebbt, weer de Italiener Annibale Carracci, de woll ok as een vun de Begrünners ansehn warrt. In’n engelschen Parlamentarismus vun’t 18. un 19. Johrhunnert sünd denn de polietschen Ökelbiller in Daagbläder in Mood kamen un dat geev de eersten Lüüd, de een as richtige Karikaturisten ansehn kann. To disse Lüüd hören to’n Bispeel James Gillray, Thomas Rowlandson un George Cruikshank. In’t 19. Johrhunnert kemen ok polietsche Satirebläder op, de veel Ökelbiller druckt hebbt. Dorto hören to’n Bispeel dat Kladderadatsch in Berlin oder de Punch ut London.

Weblenken[ännern | Bornkood ännern]

Ökelbiller. Mehr Biller, Videos oder Audiodateien to’t Thema gifft dat bi Wikimedia Commons.