Äquivalenzinkamen

Nettoäquivalenzinkamen
in Euro pro Johr
in Düütschland

Johr	Median	Middelweert	Q
1995	13.439	15.035
1996	14.523	16.060
1997	14.769	16.289
1998	14.393	15.918
1999	14.603	16.366
2000	15.339	17.167
2001	15.758	17.742
2003	16.500	18.492
2004	16.327	18.113
2005	15.617	17.227
2005	16.393	18.214
2006	15.663	17.283
2007	17.777	20.270
2008	18.309	21.086
2009	18.586	21.223

Dat Äquivalenzinkamen is dat Inkamen, wat for jede Person, de in en Bruuk-Gemeenschop leven deit, mööglich maken dö, mit densülvigen Levensstandard, as in düsse Bruuk-Gemeenschop, ok buten düsse Gemeenschop to leven, wenn he groot weer un alleen leven dö. Dor warrt dat Inkamen vun den ganzen Huushollt for tosamentrocken un achterna tohopen rekent mit Hölp vun en Äquivalenzskala. Wie dat utrekent warrt, dat hangt vun de Tahl un vun dat Oller vun de Personen in de Bruuk-Gemeenschop af.

Wo dat Äquivalenzinkamen for bruukt warrt

Dat Äquivalenzinkamen warrt bruukt, um de Inkamenverdeelen, den Inkamenverscheel un de Armoot ut to reken. Mit Hölp vun en Äquivalenzskala weert dor de Inkamens na Grotte vun den Huushollt un na de Wiese, wie de Huushollte tohopen sett sund, in sorteert. Dat liggt dor an, dat de Inkamens vun Lüde, de in unnerscheedlich grote Huushollte leven doot, nich to verglieken sund, vunwegen dat in grottere Huushollte so nömmte Skaleneffekte upträen doot (wenn veel Lüde en Wohnung bruken un betohlen doot, oder wenn veel Lüde sik en Reedschop delen doot, köst dat for den Enkelten minner veel, as wenn dor blot en poor Lüde achter steekt). Düt Insorteern kann ganz verscheden vor sik gohn. Meist warrt de Sorteern na de OECD nahmen, de ok for internatschonale Verglieke bruukt warrt.

OECD-Insorteern

De eerste Armootbericht vun de Bundsregeern vun 2001 nömmt twee Äquivalenzskalen vun de OECD, de bither to bruukt wurrn sund. De nee OECD-Skala, so, as de vun dat Statistische Bundsamt bruukt warrt, seggt, de Sorteern möss so vor sik gohn: De ollste Person vun en Huushollt kriggt dat Gewicht 1,0. Annere Personen in den Huushollt kriegt den Fakter 0,5, wenn se 14 Johre oder oller sund, un Kinner unner 14 Johre kriegt den Fakter 0,3. De ole OECD-Skala gifft de ollste Person in en Huushollt dat Gewicht 1, annere Lüde, de to’n Huushollt tohören doot, kriegt den Gewichtfakter 0,7 un Kinner unner 14 Johren kriegt den Fakter 0,5.

Bispeel

In en Familie mit fief Lüde hett de Fro en Inkamen vun € 5.000.- De Ehmann geiht nich na Arbeit, twee Kinner sund 6 un 8 Johre oolt, anners een is 15. Na de nee OECD-Skala sund de Gewichtfakters alltohopen 2,6 un na de ole Skala sund dat 3,4. Dat Äquivalenzinkamen na de nee Skala liggt bi € 5.000 dör 2,6. Dat sund denn € 1.923.- for jedeen, de to de Familie tohören deit. Na de ole Skala weern dat € 5.000 dör 3,4 ween. Dat weer denn pro Person in den Huushollt en Äquivalenzinkamen vun € 1.471.-

Nettoäquivalenzinkamen

Nettoäquivalenzinkamen 2004 Düütschland

	Andeel an’n Median	pro Johr	pro Maand	Andeel vun de Düütschen
Median	100%	17124€	1427€	50,0%
	70%	11986€	999€	20,5%
Gefohr vun Armoot	60%	10274€	856€	13,0%
	50%	8561€	713€	7,7%
Existenzminimum	43%	7365€	614€
relativ arm	40%	6894€	571€	3,5%

As Nettoinkamen gellt hier all Innahmen ut sülvstännige un nich sülvstännige Arbeit. Dor kaamt noch Innahmen ut Unnerhollt un Vermögen to un wat dat Wohnegendom, wat sülms bewohnt warrt, an Hüern kosten dö (de so nömmte „Hüer-Weert“). Stüern un Plichtbidräge to de Sozialversekern weert dor vun aftrocken. Dat Nettoäquivalenzinkamen is denn de fiktive Geldbedrag, de pro Kopp in en Maand utgeven weern kann. Dat döörsnittliche Nettoäquivalenzinkamen pro Maand is de arithmeetsche Middelweert vun dat Nettoinkamen vun all Lüde, de Inkamenstüer betohlen mütt. De Median vun dat Nettoäquivalenzinkamen pro Maand is de Bedrag, bi den de Hälft vun all Düütschen over düssen Bedrag liggt un de annere Hälft unner düssen Bedrag. For de Johre 1995 bit 2008 stoht de Weerte in de Tabell.