Bruuk-Gemeenschop

Vun Wikipedia

De Bruuk-Gemeenschop, up Hoochdüütsch bekannt as Bedarfsgemeinschaft (BG) is en Begreep ut dat düütsche Recht. Dat kummt vor in dat Tweete Book Sozialgesettbook (SGB II), wo dat um dat Recht vun de Grundsekern for Lüde, de Arbeit söökt geiht. De Bruuk-Gemeenschop is utkunkeluurt wurrn ut polietsche Grünn. Dor steiht de Gedanke achter, dat Personen, de sik kennt oder de verwandt sund, sik in Nootfäll gegensiedig materiell hölpen un bistohn doot, wenn se tohopen in een Huushollt leevt. Dorüm schöllt se ok gemeensom ehrn Unnerhollt afdecken. Se sund up düsse Aart en Bruuk-Gemeenschop.

De Grundsekern, de tostahn warrt, schall henlangen for dat, wat bruukt warrt for en minschenwöördig Leven ohn Bange, dat dat Nödigste fehlt. Man gegen annere Hölpen over steiht düsse Grundsekern achtern an. So verlangt dat de Staat. He will sik nich inmengeleern, solang, as de Partners sik gegensiedig wieterhölpen könnt. De Afkaaten nömmt dat denn „Ehlüde- un Partnersubsidiarität“. Dat bedutt akraat düt, dat de Solidarität vun Partners toeerst kummt, un denn eerst de Hölp vun den Sozialstaat.

Of de Bedrag, de anrekent warrt, worraftig de Person togode kummt, de Hölp bruken deit, speelt keen Rull. En Familienunnerhollt mutt blot unner Ehlüde betohlt weern, un nich unner Lüde, de blot „man so“ tohopen leven doot. Man bi dat Utreken vun de Grundsekern warrt annahmen, dat in Familien un bi Partners, de „as in en Eh“ tohopen leven doot (Bruuk-Gemeenschop), faktisch Transferleistungen vornahmen weert. Vundeswegen weert se dor bi mit togrunne leggt. So mutt de Lüde nich achtern an stohn, de numms hefft, de jem to Siet stohn deit.

In dat Unnerhollt-Recht warrt bovenhen de Bruuk-Gemeenschop vun en Minschen, de en Unnerhollt schullig is, mit anrekent, wenn fastsett’ warrt, wat he for sik sülms beholen draff (Sülvstbehollt). Wenn he mit en annern Minschen tohopen leven deit un dor Kosten dör sporen kann for de Wohnung oder ganz allgemeen, warrt em unner Umstänn en ringern Sülvstbehollt tometen. He leevt in en Bruuk-Gemeenschop un de dor noch mit em in leven deit, de betohlt ja for em mit. Ok annersrum speelt dat en Rull: Wenn de Minsch, de en Recht up Unnerhollt hett, mit anners een in en duerhaftige Gemeenschop tohopen leven deit, denn so fallt dat Recht up Unnerhollt na 1579 BGB weg.