Vörlaag:Hööftsiet/utwählt Artikel dissen Maand/2011-04
De Bremer Münten sünd Münten, de in de Tiet vun’t 9. Johrhunnert bit 1872 in un dorna noch vun’t Düütsche Riek för Bremen rutgeven worrn sünd. De Münthoheit hett in de Stadt Bremen wiel dat Middelöller blots de Arzbischop hatt. Dat Recht Münten to slahn weer vun’n Kaiser rutgeven. De Stadt hett dat Müntregal in’t Johr 1541 överdragen kregen. Dorto weer later denn Müntrecht to seggt. Toeerst weern blots Pennige ut Sülver präägt, later kemen annere Münten dorto as de Witte, de Scherf oder de Groten un noch vele annere mehr. Na dat Johr 1872 künnen Bremer Münten ok na de Geldsoort vun’t Düütsche Riek präägt warrn.