Todecktsadige

Vun Wikipedia
Todecktsadige
Krainer Lilje (Lilium carniolicum)
Systematik
Riek: Planten (Plantae)
Ünnerriek: Fattplanten (Tracheobionta)
Böverafdeel: Saatplanten (Spermatophyta)
Klass: Todecktsadige (Magnoliopsida)
Wetenschoplich Naam
Magnoliopsida
Brongn.
Todecktsadige

De Todecktsadigen Planten, kortweg Todecktsadigen (Magnoliopsida, vörmols Angiospermen oder Magnoliophyta), towielen ok blot Blötenplanten nömmt, sünd de grottste Klass mank de Saatplanten.

Kennteken[ännern | Bornkood ännern]

De Todecktsadigen verscheelt sik unner annern dör düsse Kennteken vun annere Saatplanten: In dat Phloem (de Borken) kaamt Sichtergölen un Geleitzellen ut en gemeensome Mudderzell. De Stoffblöer dreegt an'e Sieten twee Stoffbüdel-Paare, wo de Pollen in sitten deit. De Stoffbüdels hefft en Endothecium unner de buterste Huut (hypodermal). De Pollenköörn hefft meist keen lamineerte Endexine. De männlich Gametophyt besteiht ut dree Zellen. De Saatanlagen sünd unnerbrocht in en afslaten Fruchtblatt (vundeswegen de Naam Todecktsadige). An de Wannen vun de Megasporen sitt keen Sporopollenin. Dat gifft en dubbelt Befruchten un in düssen Tosamenhang en sekundäär Endosperm.

Systematik[ännern | Bornkood ännern]

Mit 226.000 bekannte Aarden sünd de Todecktsadigen de Plantengrupp mit de meisten Aarden. Over de Fraag, wo se mank de Saatplanten vun de Systematik her henhören doot un over ehre Herkumst warrt jummers noch veel snackt in de Wetenschop. Man vun de 1990er Johre af an steiht ehre binnere Systematik up fastern Grund, as vordem. Dat liggt sunnerlich an de Arbeit vun de Angiosperm Phylogeny Group (APG). Blangen de groten Gruppen vun de Monokotyledonen un Eudikotyledonen gifft dat noch en Reeg vun Ornen, de stoht for sik.