Swemmsport

Vun Wikipedia
Wesseln na: Navigatschoon, Söök
Swemm-Wettkamp bi de Olympischen Spelen 1984
Swemmen un Baden as’n Freetietvergnögen

Ünner den Begreep Swemmsport warrt dat Utöven vun’t Swemmen as sportliche Disziplin tosamenfaat un is en Deelrebeet vun’n Watersport. Swemmsport warrt as Wettkampsport in de Form utföhrt, dat tomeist mehrere Deelnehmers gegenenanner anpeddt, üm en vörgeven Swemmstreck in mööglichst korte Tiet torüchtoleggen, wobi tomeist de Swemmstil ok fastleggt is. Swemmsport kann jüst so aver ok ahn Wettkamp un ahn Tietdruck utöövt warrn, üm den egen Swemmstil to verbetern, wat för de Gesundheit to doon oder eenfach üm Spaaß to hebben.

Historie vun’n Swemmsport[ännern | Bornkood ännern]

Swemmwettkamp üm 1896

Vele Forschers hebbt sik al mit de Fraag rümslahn, woans sik de modernen Swemmtechniken entwickelt hebbt. Johann Christoph Friedrich GutsMuths hett al 1798 sien Book över de Swemmkunst rutgeven, wat as Wegwieser ansehn kann för de lateren Versöken vun de Hallenser Halloren (Soltwirker), en Methood to’n Swemmenlehren uttoklamüstern. Vun wegen, dat de Halloren faststellt harrn, dat dat lichter geiht in de soltholligen Sole to swemmen, weer de Weg freemaakt, de in’t Swemmbook teemlich schemaatsch beschreven Bewegen vun de Swemmmotorik technisch ümtosetten. De poppenhaftigen Bewegen, de GutsMuths dorstellt harr, weern vun jemehr Utprägen her noch kuum egent, üm dorut en Swemmstil to entwickeln, mit den man goot swemmen künn.

Dat moderne Wettkampswemmen hett sik üm 1837 rüm in de Hallenbäder vun London entwickelt. Swommen weer in’n Bost- oder in’n Sietenstil. 1895 swemm de Englänner J. H. Thayers de 100 Yards in’n Sietenstil in 1:02,50 Minuuten. Ümrekent op en 100-m-Streck weer dat 1:08,38 Minuuten. Bit in de 1950er Johren weer dat Bostswemmen, wat tomeist as eerste Technik lehrnt waart, de eenzige Swemmstil, för de nipp un nau Regeln fastleggt worrn sünd.

John Trudgen hett 1873 dat Hand-över-Hand Swemmen utklamüstert, dat na em as „trudgen“ betekent worrn is. De Arms weern dorbi ut dat Water na vörn bröcht, meist so as bi’t Sietenswemmen, blots dat man dorbi jümmer vun een op de annere Siet wesselt un tosätzlich Scherenslääg mit den Been maakt hett. De austraalsche Swemmer Frederick Lane „trudge“ in’t Johr 1901 de 100 Yards in 1:00,0 Minuut (hoochrekent op 100 m: 1:05,64 Minuuten).

An de Steed vun dat unharmonsche „Trudgen“ hett de Australier Richard Cavill de smiedigere Technik vun de Inboren vun de Salomonen anwennt. De hebbt den Beenschlag vun’t Kraueln mit den Överwater-Armtog kombineert. Cavill hett mit dissen so nöömten „Australian Crawl“ 1902 över 100 Yards en Weltrekordtiet vun 58,4 Sekunnen bruukt (op 100 m: 1:03,89 Minuuten).

1934 meen David Armbruster, de Trainer an de University of Iowa weer, dat bi’t Bostswemmen ok beide Arms över’t Water torüchföhrt waren künnen. Dit „Smettern“ möök de Swemmsnelligkeit grötter, bruuk aver mehr Training un mehr Konditschoon. 1935 swemm Jack Sieg, de ok vun de University of Ioaw keem, op de Siet un slöög dorbi mit de Been as mit en Fischsteert. Dat kunn he an’n Enn ok op’n Buuk. Armbruster un Sieg hebbt dat Smettern vun de Arms un den Beenslag tosamendoon un dormit den „Butterfly-Stil“ utfunnen (Bottervagel oder Delfin). Mit twee Beenslääg op een Armtog swemm Sieg dormols de 100 Yards in 1:00,2 Minuuten (op 100 m: 1:05,85 Minuuten). Na annere Borns schall dat 1935 de US-Amerikaner Brydenthal dissen Stil to’n eersten mol probeert hebben. Dat „Bottervagel-Bostswemmen“ weer toeerst as nich regelgerecht ansehn. Eerst 1953 is dat as en egene Wettkamp-Swemmoort acht worrn.

Swemmwettkämp[ännern | Bornkood ännern]

Swemmen höört siet de eersten Olympschen Spelen vun de Neetiet (1896 in Athen) to dat olympsche Programm. Bi de tweeten Olympschen Spelen 1900 in Paris geev dat en Hinnernswemmen, en Ünnerwaterutduerswemmen un en 4.000-m-Swemmen anboden. Bi op dat letzte dorvun (Langstreckenswemmen) sünd disse Wettkampoorden later aver nich mehr maakt worrn. Bi de Olympschen Spelen 1912 dröffen to’n eersten mol ok Fronslüüd in’n Wettkamp mitswemmen. Siet 1973 gifft dat ok offizielle Swemmweltmeesterschoppen. Tyypschwies warrt Swemmwettkämpen na dat Regelwark vun’n Internatschonalen Swemmverband Fédération Internationale de Natation Amateur (FINA) utdragen.

Wettkampöörd[ännern | Bornkood ännern]

Swemmbecken bi’n Wettkamp

Wettkampsteden för Strecken bit 1500 m sünd Swemmbeckens de mit de verscheden Anfoddern an de Bahnläng (25 m oder 50 m), Bahnbreed (2,50 m), Waterdeep (tomindest 1,35 m, bi Olympsche Spelen un Weltmeesterschoppen tomindst 2 m)[1] klorkaamt, un ok de richtige Watertemperatur hebbt (25 bit 28 °C).

De Bahnen warrt dör Lienen vunenanner scheedt, de dorto dor sünd, de Bülgen vun de Naversbahnen wegtohollen. Vun de Swemmers warrt se ok as „Bülgenbrekers“ betekent. De Lienen hebbt ünnerscheedliche Markeeren: In’t Fief-Meter-Rebeet vör jede Beckenwand, woneem se tomeist dörgahns root sünd, in de Mitt un denn jümmer bi 15 m. Op’n Grund vun’t Becken is butendem in de Mitt vun jede Bahn tomeist en 25 cm breden swarten Streek, de twee Meter vör’t Enn vun’t Becken in en ‚T‘ utlöpt. De helpt den Swemmer sik torecht to finnen. Över’t Becken hangt wietere Lienen. In tomindest 1,8 m Hööch gifft dat en Lien mit lütte Fahns fief Meter vör jede Beckenwand, wat bi’t Rüchswemmen anwiesen schall, dat de Wand neger kummt. Un denn gifft dat noch de Lien för’n Fehlstart, de 15 m vun’n Start in tomindst 1,2 m Hööch hangt un in’t Water fallen laten warrt, wenn de Schiedsrichter oder de Starter op en Fehlstart kennen doot.

För Wettkämp warrt Hallenbäder as ok Freebäder bruukt. Normalerwies warrt in Söötwater swommen, man dat gifft ok noch enkelte Soltwaterbeckens, de för Wettkämp nütt warrt.

Strecken[ännern | Bornkood ännern]

Wettkampbecken mit 8 Bahnen

Na de Regeln warrt bi Wettkämpen normalerwies Strecken swommen, de en Veelfack vun 100 -m-Afsnitten sünd, neemlich 100 m, 200 m, 400 m, 800 m, 1500 m un 5000 m, aver ok 50 m as Sprintstreck. Bi’t Langstreckenswemmen kaamt noch de Strecken 5 km un 25 km dorto, de tomeist in apen Water dörföhrt warrt. Blangen Enkelwettkämp gifft dat ok Staffelrennen, wo bi’t Swemmen blots 4er Staffeln maakt warrt. Internatschonal gifft dat Staffeln över 4 mol 50 m, 4 mol 100 m un 4 mol 200 m.

Bahnen[ännern | Bornkood ännern]

Bi Wettkämp swemmt jümmer hööchstens so vele Swemmer gegenenanner, as dat Swemmbecken Bahnen hett. Utnahmen dorvun gifft dat över 1500 m un 800 m Freestil. Dor swemmt bi lüttere Wettkämp ok mol twee Swemmer op een Bahn. För en Wettkampbecken sünd na de Regeln acht Bahnen vörsehn, so dat gröttere Veranstalten (Utscheedwettkämp) mehrere Lööp maakt warrt, bi de jümmer blots de besten Swemmer in de nächste Runn kaamt. De gaust mellte oder qualifizeerte Swemmer swemmt jümmer op Bahn 4, de tweetgauste op Bahn 5 un so wieter de Reeg na op de Bahnen 3, 6, 2, 7, 1 un 8. De Bahnen 4 un 5 sünd bi Wettkämp vun gele Lienen infaat, üm dat jedeen de beiden besten Swemmer kennen kann.

Start[ännern | Bornkood ännern]

Start bi’t Swemmen 1904 in St. Louis (Olympsche Spelen)
Startsprung bi’n modernen Wettkamp

Bi’t Swemmen gifft dat en Startsignal, na dat de Swemmer vun de ’n beten högeren Startblöck vun jemehr Swemmbahn an’n Beckenkopp dör en Startsprung in’t Water jumpt. Utnahmen sünd dat Rüchswemmen un de Lagenstaffel, bi de de Rüchswemmer ut dat Water rut losswemmt. Bi en Fehlstart warrt de Start noch mol maakt, wobi de Schiedsrichter dorbi vundaag in moderne Swemmbäder dör elektroonsch Sensers ünnerstütt warrt. De tweete Start gellt op jeden Fall, man wenn dor noch mol en Swemmer en Fehlstart provozeert, he also to fröh afspringt, warrt he ut’n Wettkamp utslaten. Dorför reckt al en Wackeln op’n Startblock. Bi en Mehrheit vun Swemmwettkämp gellt in de Twüschentiet de „1-Start-Regel“. Dat heet, dat dor al na’n eersten Fehlstart disqualifizeert warrt.

Bi Staffeln warrt en „flegen Wessel“ maakt, mit Utnahm vun den eersten Swemmer. De nafolgen Swemmer dröff hööchstens 0,03 Sekunnen vör’t wohrhaftige Anslahn vun den Vörswemmer afspringen. Vun wegen dat bi’n flegen Wessel de Reakschoonstiet bi’t Startsiganl wegfallt, sünd Staffelswemer faken wat gauer ünnerwegens as in en Enkelwettkamp. Tieten, de in en Staffel swommen warrt – mit Utnahm vun’n Startswemmer – warrt as Enkelrekorden dorüm nich acht. Staffelrekorden gellt för Strecken, de af den Start rekent warrt. Vörrutsett is, dat de Staffel oordig afslaten warrt. So künnt de eersten veer Swemmer vun en 10 mol 100 m Staffel ok en Staffelrekord över 4 mol 100 m swemmen.

Swemmen[ännern | Bornkood ännern]

De Technik vun’t Foortbewegen dör’t Water is dör de Beteken vun’n Wettkamp vörgeven un warrt dör de Regelwarken differenzeert angeven. Dorbi warrt so veel Bahnen swommen, as dat för de Streck nödig is. De Swemmer maakt dorto an jeed Enn vun en Bahn en Wenn in’t Water un swemmt in de Gegenricht wedder torüch. Bi de Strecken 800 m un 1500 m warrt de Bahnen för eden Swemmer mittellt un anwiest. Deelwies gifft dat dorför sogar Anwiesers ünner Water. De letzten beiden Bahnen warrt tosätzlich dör en Toon oder dör’n Fleiten künnig maakt.

Anslag[ännern | Bornkood ännern]

De Tiet warrt in den Moment anhollen, in den de Swemmer de Beckenwand anröhrt. Bi’n Bost- un Bottervagelswemmen mutt dat mit beide Hannen passeeren. Bi Staffeln warrt de Twüschentieten na jeden Staffelswemmer as ok de Endtiet nahmen. Bi grode Wettkämp, warrt de Tiet tomeist elektroonsch nahmen. Dorto gifft dat tomeist gele oder witte Anslagmatten, de al op bannig lütte Kraft reageert. Butendem warrt de Tieten vun tomindst een Person op jede Bahn vun Hand nahmen. Wenn dat Twievel gifft, weert dat Schiedsgericht den Teelinloop. Op de Oort kann dat angahn, dat Swemmer mit de glieken Tiet op ünnerscheedliche Plätz lannen doot, wenn dat Schiedsgericht de Reeg vun’t Anslahn sehn künn. Wenn de elektroonsche Tiet ahn Inwand optekent worrn is, denn is dat de amtliche Tiet, de nich mehr ännert warrt. De Teelrichterentscheed warrt blots denn insett, wenn dat keen fehlerfre’en elektroonschen Tieten gifft un de faststellte Inloop nich övereenstimmt mit de vun Hand nahmen Tieten.

Swemmstil[ännern | Bornkood ännern]

As’n Swemmstil betekent man de sünnere Oort oder Technik, de een to’n Swemmen bruukt. De bekanntsten Swemmstilen in’n modernen Swemmsport sünd dat Bostswemmen, Kraulswemmen, Rüchswemmen un dat Bottervagelswemmen (ok Delfinswemmen). Öllere Swemmstilen, de nich mehr faken bruukt warrt, sünd dat Sietenswemmen un dat „Ooltdüütsch-Rüch“-Swemmen. Mitünner warrt ok dat Duken as Swemmstil betekent. In Japan gifft dat in’n Rahmen vun de Samurai-Traditschoon egene Japaansche Swemmstilen.

Bostswemmen[ännern | Bornkood ännern]

Bostswemmen

Dat Bostswemmen is normalerwies dat eerste, wat een in Swemmkursen oder in de School bibröcht warrt. De Technik geiht torüch op Ernst von Pfuel. De Wettkamp-Form is de Swemmoort, de an’n sworsten un opwännigsten to lehren is. Eenige Swemmers künnt vun wegen jemehr Dispositschoon vun de Hüftlidden keen ordigen Boststil mit Grätschslag mehr swemmen. Jüst so sünd ok dat richtige Timing un dat Watergeföhl bi’t Wettkampbostswemmen üm eenig sworer as bi all de annern Swemmorden.

De Bostswemmtechnik geiht so, dat de Arms ünner Water to glieken Tiet tosamenliggen na vörn bröcht warrt un denn dör dat Water na buten bewegt warrt, wobi al de Anstellwinkel vun de Hannen en Drift na vörn maken deit. Bi de ansluten Bewegen na achtern warrt de Hannen na binnen stellt. De richtige Anstellwinkel, de Form vun de Hannen un de Hööch vun de Hannen in’n Vergliek to’t Becken warrt as Watergeföhl betekent un speelt de gröttste Rull för de Vördrift. De Bewegen längs de Liefass is teemlich lütt. De wiet gröttste Beweegimpuls kummt vun de Bewegen dweer to de Beweegricht. An disse Bewegen slutt ik nipp un nau de Grätschbeenslag an. Bi de so nöömten Undulatschoonstechnik (vun lat.: unda „de Bülg“) warrt wiel den Schuuv na vörn en Bülgenbewegen vun’n Lief maakt, jüst so as bi’t Delfinswemmen. Dordör gifft dat en tosätzliche Drift na vörn. De Regelhaftigkeit vun disse Stiloort weer toeerst nich recht klor, man in de Twüschentiet warrt se as regelgerecht ansehn.

Na de FINA-Wettkampregeln is dat so, dat de Lief vun’n Anfang vun’n eersten Armtog na’n Start an un na jede Wenn vullstännig in Bostlaag hollen warrn mutt. De Schullern mööt dorbi parallel to de Waterbavenflach liggen. En Rullbewegen in de Rüchlaag is to keen Tiet verlööft. Na’n Start un na jede Wenn dröff de Swemmer een so nöömten Duuktog maken, bevör he wedder an de Waterbavenflach kummt. Dorbi maakt he een vullen Armtog, wiel he vullstännig ünnerduukt is, bit na de Böverschenkels un een Bostbeenslag (Grätschslag). Bi de Ünnerwaterbewegen is dat ok verlööft, en Delfinbeenslag to maken. De Kopp mutt dör de Waterbavenflach kamen, vördem sik de Hannen in’n tweeten Armtog na binnen un wedder na vörn dreiht. Dorna mutt in jeden vullstännigen Zyklus ut een Arm- un een Beenslag jichtenseen Deel vun’n Kopp dör de Waterbavenflach kieken.

All Bewegen vun de Arms mööt to glieken Tiet un in de glieken waagrechten Even maakt warrn. De Hannen mööt an oder ünner de Waterbavenflach torüchbröcht un vun de Bost ut bliektietig an, ünner oder över de Waterbavenflach na vörn bröcht warrn. De Ellbagens mööt dorbi ünner Water blieven mit Utnahm vun’n letzten Armtog vör den Teelanslag. Afsehn vun’n eersten Tog na’n Start un ne jede Wenn drööft de Hannen nich wieter as bit to de Hüft na achtern bröcht warrn. All Bewegen vun de Been mööt jümmer gliektietig un in de glieken waagrechten Even ahn Wesselbewegen maakt warrn. Bi’n Beenslag mööt de Fööt bi de Torüchbewegen na buten dreiht wesen. Bewegen in Form vun den Delfinbeenslag sünd nich verlööft. Bi de Wennen un ok an’t Teel mutt de Swemmer mit beide Hannen gliektietig anslahn.

Vun wegen den kumplizeerten Afloop vun de Bewegen warrt bi’t Bostswemmen veel Fehlers. Wenn de Swemmer nich dat richtige Tempo swemmen kann, denn liggt dat tomeist an’n Bewegensaflopp vun de Been. Fehlers bi’n Armslag wirkt sik nich so slimm op de Snelligkeit ut. De beiden fakensten Swemmfehlers sünd de Scherenbeenslag un de so nöömte Spitzfoot. Bi’n Scherenbeenslag liggt de Hüft vun’n Swemmer nich waagrecht in’t Water. Denn is keen symmetrischen Beenslag mööglich. Dat Tosamenslahn vun de Been in Schraaglaag lett dorbi as en Schrittbewegen: dat een Been warrt schraag vun ünnen na baven un dat annere vun baven na ünnen föhrt. Disse Beenslag kummt tomeist denn tostannen, wenn een, de dat Bostswemmen jüst lehrt, in flach Water lever een Been dicht an’n Grund laten will. Jüst as bi’t Sprungbeen warrt dorto jümmer dat glieke Been bruukt. Da asymmetrische Afloop vun de Bewegen geiht in’t Ünnerbewusstwesen över un warrt as symmetrisch föhlt. Dat een sik nich afstütten kann, ist dat beter, wenn Kinner mit Opdrievshelpen dat Swemmen lehrt in Water, dat deep noog is. In roor Fäll kummt dissse Swemmfehler ok dör orthopädisch veroorsakte Hollenschadens.

Bi’n Spitzfoot stimmt de Hollen vun de Fööt wiel den Beenslag nich. De Footspitzen warrt nich böögt, man streckt un steekt mit lütten Wedderstand in’t Water. Dör den to lütten Waterwedderstand warrt en to lütten Vördriev tüügt. Disse Swemmfehler kann mit Flap Fins (Swemmflossen för’t Bostswemmen) hinnert oder verbetret warrn.

Kraulswemmen[ännern | Bornkood ännern]

Kraulswemmen

Dat Kraulswemmen, dat kort ok as Kraul oder Kraueln betekent warrt, is de gauste Oort to swemmen, vun wegen dat dör den wesselsietigen Armtog in Kombinatschoon mit den Beenslag, de ok wesselsietig na ünnen maakt warrt en Andriev ahn Ünnerbreken tüügt warrt, de den Swemmer ann Betsen vörandrifft. Butendem is bi disse Swemmoort de Wedderstand gegen’t Water an’n lüttsten. Mit den Kraulstil is to’n eersten mol 1912 de hawaiische Swemmer Duke Kahanamoku Olympiawinner worrn.

Dat Gesicht vun’n Swemmer is bi’t Kraueln tomeist in’t Water un warrt afhangig vun de Anstrengen un dat Vermögen vun den enkelten Swemmer mit jeden Armtog oder oder ok na mehrere Armtöög to’n Lufhollen na Siet hen ut dat Water dreiht. Dat Utaten warrt meist in’t Water maakt. Vun’t Prinzip blifft de Lief dorbi in de Waagrechten. Op korte Strecken maakt de Swemmer normalerwies twee Armslääg op söss Beenslääg, op lange Strecken warrt tomeist jüst so veel Been- as Armslääg maakt. De normale Wenn bi’t Kraueln is de Rullwenn, bi de de Swemmer nich mit de Hand ansleiht, man vör de Beckenwand en Rull maakt un sik denn mit de Been afstött.

In de Swemmutbillen warrt in de letzten Johren dat Kraulswemmen jümmer mehr den Bostswemmen as eerste Swemmstil vörtogen. Ut den spontanen Afloop vun de Bewegen bi Kinner („Hunnenpaddeln“) lett sik dat Kraueln lichter entwickeln as dat Bostswemmen, wat en veel gröttere Koordinatschoon bruukt. Bi lütte Kinner kummt noch dorto, dat de Hüft- un Kneelidden as ok de Rüchwarvelsüül starker belast warrt. Disse Ansicht hett sik in de USA al algemeen dörsett. Bito laat sik op disse Wies ok dat Rüchswemmen un de Bottervagelstil lichter lehren. Dat Lehren vun’t Bostswemmen warrt dordör aver sworer, vun wegen dat de Bewegen vun de Föötlidden bannig anners is.

Freestilswemmen[ännern | Bornkood ännern]

Bi’t Freestilswemmen hett de Swemmer Verlööf, so to swemmen, as he dat müch. Dat is dorbi ok mööglich, wiel en Streck den Swemmstil to wesseln. De Wettkampregeln vun de FINA seggt, dat bi’t Freestil wiel den vullstännigen Wettkamp jümmer een Deel vun’n Lief ut dat Water rutkieken mutt. Utnahm is de Wenn un de Start: dor dröff de Swemmer för en Streck vun 15 Meter ok vullstännig ünnerduukt wesen. De Beckenwand dröff bi de Wenn un bi’n Teelanslag mit egal wovun Liefdeel anröhrt warrn. Vun wegen, dat de Kraulstil de gauste Swemmstil is, warrt bi’n Freestil praktisch jümmer in Kraulswemmen maakt. Bi’t Lagenswemmen un in de Lagenstaffel dröff in’n Freestil-Deel jede Swemmoort bruukt warrn, blots nich Bost-, Rüch- oder Bottervagelswemmen.

In de Freestilstaffel swemmt mehrere Swemmer achtereenanner an (tomeist veer). Bi internatschonale Wettkämp op de Langbahn (50 m) warrt 4 mol 100 m un 4 mol 200 m Freestilstaffeln swommen, bi Kortbahn-Wettkämp gifft dat ok 4 mol 50 m Staffeln.

Rüchswemmen[ännern | Bornkood ännern]

Rüchkraul[ännern | Bornkood ännern]

Rüchswemmen in’n Kraulstil

Bi’t Rüchswemmen liggt de Swemmer flach op’n Rüch in’t Water. Bi’t Rüchkraul warrt de Armslag wesselsietig maakt. De Arms duukt dorbi över’n Kopp in’t Water un warrt ünner Water na vörn bröcht, üm denn wedder baven torüch föhrt to warrn. För en sünners hoge Wirken warrt de Arm ünner Water nich geraad, man afknickt torüchföhrt, vun wegen, dat een in’n böögten Arm mehr Kraft hett. De Beenslag besteiht, as bi’t Bostkraul ut afwesseln Op- un Daalbewegen vun de Been ut de Hüft. Bi’t Rüchswemmen warrt de Laag in’t Water dör en starken Beenslag stabil hollen.

De FINA-Wettkampregeln seggt, dat in dissen Stil bi’n Start un bi jede Wenn in Rüchlaag afstött warrn mutt. Wiel den helen Wettkamp mutt de Swemmer op’n Rüch swemmen, bi de Wenn is en Rullbewegen vun’n Lief verlööft, man dat mutt weniger as 90° ut de normalen Laag wesen. Woans de Kopp hollen warrt is dor nich bi wichtig. Ok hier gellt, dat de hele Tiet vun’n Wettkamp en Deel vun’n Swemmer ut dat Water rutkieken mutt. Man, dat is verlööft, na’n Start un na jede Wenn bit to 15 Meter vullstännig ünnerduukt to blieven. De Beckenwand mutt bi de Wenn mit jichtenseen Deel vun Lief anröhrt warrn. De Schullern drööft bi de Wenn över de piellieke Richt in de Bostlaag dreiht warrn, man in den Moment, wenn de Lief de Rüchlaag verlaten hett, mutt ok foorts de Wenn dörföhrt warrn. Dat heet, dat denn keen Arm- oder Beenslag mehr maakt warrn dröff, alleen de inleiten Armtog to de Rullwenn dröff in Bostlaag utföhrt warrn. Wenn de Swemmer vun de Beckenwand afstött mutt he wedder in Rüchlaag wesen. Ok bi’n Teelanslag mutt de Swemmer in Rüchlaag wesen, man de Lief mutt wiel de Anslag nich mehr över Water wesen. An Steed vun de Rullwenn, kann ok en Tellerwenn maakt warrn.

Ooltdüütsch-Rüch[ännern | Bornkood ännern]

Ooltdüütsch-Rüch is en annern Swemmstil op’n Rüch. Bi den warrt in Rüchlaag bi Bewegen vun’t Bostswemmen utföhrt. Dat heet, dat de Arms un de Been toglieken Tiet bewegt warrt. Vun buten bekeken sütt dat meist so ut as de stöttwiese Bewegen vun de Tintenfisch. In’n Ooltdüütsch-Rüch-Stil warrt vundaag keen Wettkämp mehr maakt.

An Steed vun de gliektietige Armbewegen, kann een ok den Kraularmslag maken tosamen mit den Ooltdüütschen Beenslag. Bi dissen Düütschen Kraul kann een wiel de Beenbewegen ok lichter in de Swemmricht na vörn kieken, wenn een den Nacken licht överdehnt. Bi’t klassische Rüchswemmen mutt de Swemmer meist blind swemmen. De Sportmediziner sünd vun de Oort nich so andoon, vun wegen dat de ünnere Rüch duller belast warrt dör Överdehnen, also Billn vun’n Hollkrüüz, un as de Bostbeenslag de Binnenmenisken duller belasten deit.

Fesselsleepgreep

In’n Reddensport warrt en sünnere Oort vun’t Rüchswemmen bruukt, de ahn Armslag utkummt, vun wegen dat de Arms bruukt warrt, üm en Person to redden. Bi Wettkämp warrt ok Poppen to’n simuleeren vun Minschen insett. Disse Swemmoort warrt mit mit den Beenslag vun’t Ooltdüütsche Rüchswemmen maakt, also mit den Grätschslag. De Hannen blievt op’n Buuk oder warrt an’n Kopp vörbi streckt. De tweete Afoort is aver düütlich sworer, vun wegen dat de Lief stark in de Waagrechten hollen warrn mutt. Disse Stil warrt sünners in Verenen lehrt, de in’n Reddensspoort oder in de Waterredden aktiv sünd, as to’n Bispeel de DLRG oder de Waterwacht.

Bottervagelswemmen (Delfin)[ännern | Bornkood ännern]

As veerte offizielle Swemmoort is 1952 de Bottervagelstil vun Weltswemmverband acht worrn. De FINA weer de Ansicht, dat disse Schritt nödig weer, üm en eendüdige Afgrenzen to’n Bostswemmen to maken.

Siet de 1930er Johren hett sik dat Bottervagelswemmen ut dat Bostswemmen rut entwickelt. Dör dat Navörnbringen vun de Arms över’t Water hebbt en poor Bostswemmer jemehrn Waterwedderstand lütter maakt. Vun wegen den högeren Opwand an Knööv sünd de Swemmers tomeist blots en poor Meter oder een Bahn in den Bottervagelstil swommen un hebbt denn wedder in’n normalen Boststil wesselt. Lichter is de Stil eerst dör wietere Verfeinern vun de Technik worrn. Bi’n Armtog warrt beide Arms gliektietig mit en S-förmig tehn Bewegen (de so nöömte Slötellocktog) ünner Water vun vörn na achtern föhrt un denn geraad wedder över’n Kopp na vörn bröcht. Atent warrt dorbi normalerwies na jeden tweeten Tog. De Been weern toeerst in’n Grätschslag bewegt, man dorut is mit de Tiet en Bülgenbewegen dör den helen Lief worrn, de vun’n Bostkasten bit in de Fööt geiht. Op jeden Armtog warrt een bit twee Beenslääg maakt, wobi de tweet starker is as de eerste.

Delfin- oder Bottervagelstil

De Bottervagelstil gellt vundaag as de tweetgauste Swemmstil, gliek na dat Kraueln. Un na dat richtig dörföhrte Bostswemmen is dat dat tweetanstrengendste. Bi Wettkamp warrt de Stil op Strecken bit to 200 m maakt. As de slaten Beenslag inföhrt worrnis, is disse Swemmstil johrelang as Delfin-Stil betekent worrn, wiel ünner Bottervagel-Stil ümmer noch de Swemmstil mit den Grätschbeenslag verstahn worrn is. De olle Bostsweembeenslag is nu aver siet en poor Johren na de Regeln nich mehr verlööft. De olle Swemmstil is also henfallig. Vun wegen de internatschonalen Beteken warrt de Swemmlaag nu weltwiet as „Butterfly“, also Bottervagel, betekent.

De FINA-Regeln seggt, dat vun’n Anfang vun’n eersten Armtog na’n Start un na jede Wenn de Lief in Bostlaag hollen warrn mutt un beide Schullern mit de Waterbavenflach op een LIen leegt. Beenslääg ünner Water na de Siet sünd verlööft. Na’n Start un na jede Wenn dröff de Swemmer mehrere Beenslääg un een Armtog ünner Water maken; He dröff bit to 15 m vullstännig ünner Water torüchleggen, denn mutt de Kopp aver wedder ut dat Water rutkieken. Bit to de nächsten Wenn oder bit to’n Teel mutt de Swemmer denn över Water blieven.

Beide Arms mööt na achtern un ok na vörn gliektietig bewegt warrn, un ok de Bewegen mit de Been un de Fööt mööt to glieken Tiet maakt warrn. Wenn de Been un Fööt gliektietig op un daal bewegt warrt is dat verlööft. De Fööt un de Been mööt nich op de glieken Even wesen, man wesselsietige Beenslääg as bi’n Kraueln sünd verboden. De Grätschbeenslag is nich mehr verlööft. Utnahmen dorvun sünd aver Masters-Swemmer. Bi jede Wenn un in’t Teel mutt de Swemmer mit beide Hannen gliektietig anslahn.

Lagenswemmen[ännern | Bornkood ännern]

Wessel bi en Lagenstaffel

Dat Lagenswemmen is en Kombinatschoon vun veer verscheden Swemmstilen. Bi den Wettkamp warrt jümmer een Veerdel vun de Streck – normalerwies 50 m oder 100 m – en een Stil swommen. In Enkeltwettkämp is dat de Reeg na Bottervagel, Rüch, Bost un an’t enn Freestil (wat tomeist Kraul is). In de Lagenstaffel swemmt jümmer veer Swemmer gegenenanner, wo jeder een Swemmstil vun maken deit. Dor ännert sik aver de Reeg bi: de Rüchswemmer fangt an, üm dat de Start regelgerecht ut dat Water maakt warrn kann. Dorna kaamt Bost- un Bottervagel-Swemmen un denn Freestil.

Bi internatschonale Wettkämp warrt dat Lagenswemmen in’n Enkelwettkamp över 200 m un 400 m utdragen un de Staffel över 4 mol 100 m. Bi Swemmwettkämp op de Kortbahn (25 m) gifft dat tosätzlich de 100 m Lagen un de 4 mol 50 m Lagenstaffel.

Snelligkeiten bi’t Swemmen[ännern | Bornkood ännern]

Nafolgen staht, wo gau de gausten Swemmer bi de Mannslüüd in de enkelten Swemmstilen op en 100 m swommen sünd. De Snelligkeiten sünd also op de Grundlaag vun de Weltrekorden berekent worrn. En normalen Bredensportler kann as ruchweg half so gau annahmen warrn, man een, de dat Swemmen gor nich gewohnt is, swemmt mitünner düütlich langsomer.

  • Kraul: 2,13 m/s oder 7,65 km/h
  • Bottervagel: 1,98 m/s oder 7,14 km/h
  • Rüch: 1,90 m/s oder 6,85 km/h
  • Bost: 1,70 m/s oder 6,11 km/h

Afleidt Sportorden[ännern | Bornkood ännern]

En Afoort vun’n Swemmen: Waterball

De Anfäng vun’n Swemmsport leegt in’n baven beschreven Streckenwemmen. Op de Grundlaag dorvun hett sik en Reeg vun wietere utdifferenzeerte Disziplinen entwickelt, de jemehrn Sworpunkt deelwies op de Technik, deelwies op’t Speel leegt. As egen Sportorden gifft dat ü.a:

Swemmen un Gesundheit[ännern | Bornkood ännern]

Dat Swemmen künnt ok al de Jüngsten lehren

Swemmen tellt mit to de Freetietgestalten, de an’n besten för de Gesundheit sünd. Bito warrt Swemmen to de Sportorden rekent, bi de de Gefahr sik Sehren tototehn an’n lüttsten is. Dör den Opdriev in’t Water warrt de Lief ünnerstütt, wat de Lasten op de Lidden un de Knaken düütlich sieter maakt. Enn kann in’t Water dorüm Bewegen maken, de buten dat Water vun wegen de Belasten un de Gliekgewichtshollen beter laten warrn schülln. Bi matige Bewegen warrt butendem ok Belasten vun dat Hart nahmen, vun wegen dat de Waterdruck dat Torüchströmen vun’t venöse Blood lichter maakt. De Watertemperatur hett wieterhen en anregen Wirken op den Bloodkreisloop.

Bi’t Swemmen warrt meist all Muskeln bruukt, in’n Sünnern warrt dor de Arms un de Böverlief starker traineert. Woans de Belasten verdeelt sünd hangt aver vun’n Swemmstil af. Swemmen is en äroob Doon, bi dat de Muskeln bestännig mit Suerstoff versorgt warrt. De Sport kann in jeed Öller utöövt warrn. Dat gifft ok sünnere Veranstalten för lütte Kinner to’n Swemmem Lehren, dat so nöömte Babyswemmen.

Organisatschoon vun’n Swemmsport[ännern | Bornkood ännern]

De weltwiete Dackverband för den Swemmsport is de Fédération Internationale de Natation Amateur (FINA), de 1908 grünnt worrn is. De europääschen Verbännen sünd in de Ligue Européenne de Natation (LEN) tosamenslaten.

In Düütschland gifft dat den Bundsverband to’n Föddern vun de Swemmutbilln (BFS), in den sik all de Verbännen tosamenfunnen hebbt, de Swemmsport bedireven doot. Dat sünd de Düütsche Swemmverband (DSV), de Düütsche Turnerbund (DTB), de Verband vun de Düütschen Sportduker (VDST), de Bundsverband vun de Düütschen Swemmmeesters (BDS), de Düütsche Leven-Reddens Sellschop (DLRG) as ok de Waterwacht in’t Düütsche Rode Krüüz (DRK) un in’n Arbeiter-Samariter-Bund.

Dör den Düütschen Swemmverband warrt ok en Ligabedriev organiseert, de sik Düütsch Mannschopsmeesterschoppen Swemmen nöömt.

Kritik[ännern | Bornkood ännern]

In dat aktuelle Kunzept vun de nawassen Swemmers vun’n DSV[2] warrt faststellt, dat dat Tosamenfaten vun de Swemmers na Johrgäng de Leistungsbeweerten nich richtig Afbilln deit. In’n Bericht warrt seggt, dat t. B. bi de 13-johrigen ruchweg 75 % in’t eerste Halfjohr boren sünd. Man, woans dat Problem löst warrn kann un de Bewerten gerechter to maken is, dat steiht in den Bericht nich binnen.

Bekannte Swemmers[ännern | Bornkood ännern]

Johnny Weissmüller swomm as eerste de 100 m ünner een Minuut

De bestimmen Natschonen in’n Swemmsport sünd in hüütige Tiet de USA un Australien. De eerste beropene Swemmstar vun de USA weer Johnny Weissmüller, de as eerste Minsch de 100-Meter-Streck in weniger as een Minuut swommen is. Later is he as Schauspeler in de Rull vun Tarzan beropen worrn. Vör korte Tiet hett Michael Phelps bi de Olympschen Sommerspelen 2008 in Peking mit acht Goldmedaillen den Rekord vun Mark Spitz broken, de bi de Olympschen Sommerspelen 1972 in München söven Goldmedaillen wunnen harr. De bekanntsten austraalschen Swemmers sünd Ian Thorpe un Grant Hackett. Grode Naams ünner de düütschen Swemmsportlers sünd t. B. Franziska van Almsick, Michael Groß, de Franzöösche Laure Manaudou un de düütsche Dubbel-Olympiawinnersche Britta Steffen.

Borns[ännern | Bornkood ännern]

  1. http://fina.org/rules/english/facilities.php (englisch)
  2. http://schwimmen.dsv.de/Files/Teaching/2007nachwuchs.pdf

Weblenken[ännern | Bornkood ännern]