Soayschaap

Vun Wikipedia
Wesseln na: Navigatschoon, Söök
Soayschaap

Dat Soayschaap is en ganz ole Raass vun Schaap. Dat sütt ut, as de Schaap al in de jüngere Steentiet utsehn hefft. Tohuse is dat Soayschaap up de Insel Soay up den St. Kilda-Archipel buten vör de Westküst vun Schottland. Dor hefft dat de ganz fröhen Siedlers henbröcht, oder later de Wikingers. De Naam Soay kümmt ut de Wikingerspraak un heet Schaapinsel (Sau=Schaap, Öj=Insel). De Insel liggt wiet af un de Schaap bringt ok nich veel Winnst up.Dor hefft sik de Minschen üm ok nich veel kümmert üm düsse Schaap un se konnen so bleven, as se al ummer weern.

Wo de Schaap utseht[ännern | Bornkood ännern]

De Schaap sünd in de Wildfarv dat Mufflon liek. De Wull warrt na de Saison afsmeten. Se beert sik ok as Wild un laat sik nich föhren mit Hunnen. Heken un Seken dreegt Höörn. Hen un wenn hefft de Deerter bloß een Farv, tomeist sünd se avers klöört as de Mufflons. So'n Schaap gifft dat denn in düster un in hell. Dor sünd de düstern Schaap dree mol fökener vun to sehn, as de hellen. Bavenhen gifft dat Schaap mehr mit Wull un annere mehr mit Haarkleed.

Bi Ünnersöken is rutfunnen wurrn, dat de düstern Schaap jummers weniger weert. Dat liggt dor an, dat dat Gen för de düstere Farv tosamenhangen deit mit em slechtere Gesundheit. Ofschoonst de düstern Schaap grötter un stebiger utseht, as de hellen, gaht se ehrder doot un kriegt nich so veel Kinner.

Wo de Schaap leevt[ännern | Bornkood ännern]

Soay siene Naberinsel Hirta weer de eenzige Insel vun den Archipel, wo Minschen up wohnen döen. Man 1931 sünd se utsiedelt wurrn. Dormols sünd denn Soayschaap dorhen bröcht wurrn. Vun dor af an gifft dat blangen Soay en tweeten Stamm vun düsse Schaap. Ok in Parks un Zoologische Gaarns sünd de Schaap holen wurrn. Midderwielen is ut düsse Schaap en neen Typ Soayschaap wurrn: De so nömmte Parksoay. In Düütschland gifft dat Tierparks un ok allerhand private Tüchter, de düsse Schaap holen doot.

Kiek ok bi[ännern | Bornkood ännern]

Weblinks[ännern | Bornkood ännern]

Commons-logo.svg Soayschaap. Mehr Biller, Videos oder Audiodateien to’t Thema gifft dat bi Wikimedia Commons.

Literatur[ännern | Bornkood ännern]

  • Jewell, Milner, Boyd et. al. "Island Survivors: The Ecology of the Soay Sheep of St. Kilda" The Athlone Press, University of London 1974, ISBN 0485111411
  • Grubb, Jewell, "Social Grouping in Feral Soay Sheep" Symposia of the Zoological Society of London 1966, No. 18 p. 179 - 210
  • P. Jewell "The Wild Sheep of St. Kilda", New Scientist 1961, No. 246, p. 268 - 271
  • Holger Weigelt, "Mitteilungen für Soayschaf-Züchter - Sammlung überarbeiteter Beiträge", Auerk 1997
  • Holger Weigelt, "Das Soayschaf - Herkunft, Domestikation, Biologie, Ökologie", Auerk 2003; Delen dorvun ok ünner: www.holger-weigelt.de