Selma Björnsdóttir

Düt is en iesländsch Naam. De Achternaam is keen Familjennaam, man en Patronym. Bruuk dorüm beter blot den Vörnaam oder ok den Vörnaam un den Achternaam tohoop, wenn du över düsse Persoon snackst.

Selma, mit vullstännigen Naam Selma Björnsdóttir, (* 13. Juni 1974 in Reykjavík, Iesland) is en islännsche Singersche. Se is internatschonal dör ehr beiden Optreden bi’n Eurovision Song Contest in de Johren 1999 un 2005 bekannt worrn.

Leven un Wark

Selma is in Garðabær, en Gemeen in de Neeg vun Reykjavík, opwassen. Se hett al in ehr Kinnertiet sungen un danst. In’t Öller vun teihn Johren is se denn in de Oper Noah’s Arc optreden. Na de Schooltiet hett se in en Theater speelt.

In’t Johr 1999 hett se den islännschen Vörutscheed to’n Grand Prix wunnen un is in’n Wettstriet an’t Enn op’n tweeten Platz kamen. Söss Johren later hett se noch eenmol deelnahmen. Den Vörutscheed harr se wedder wunnen, künn sik opletzt aver nich för de Endrunn vun’n ESC qualifizeeren.

Optreden bi’n Eurovision Song Contest

As Selma 1999 mit den Titel All Out Of Luck optreden is, is se kritiseert worrn, dat sik dat Leed to dull an den sweedschen Bidrag ut dat Johr 1991 orienteeren de. Liekers hett de Europääsche Rundfunkunion (EBU) ehr deelnehmen laten. Dormit hett se den tweeten Platz maakt, wat dat beste Resultat weer, dat Iesland bit to de Tiet harr.

In’t Johr 2005 is se direkt vun’n Senner nomineert worrn. In’t Vörfeld gell se mit dat Leed If I had your Love as een vun de groten Favoriten in den Wettstriet. Liekers is se in’t Halffinale utscheedt.

2006 is se tosamen mit Silvia Night na Athen föhrt un hett sik för den (kritiseerten) Optritt vun de Kunstfigur stark maakt.