Eurovision Song Contest

De Eurovision Song Contest (afkört: ESC; op platt so veel as Lederwettstriet vun de Eurovision) is en internatschonalen Musikwettstriet, de siet 1956 jeed Johr vu de Europääschen Rundfunkunion (EBU) in’n Rahmen vun de Eurovision veranstallt warrt. De eerste Wettstriet weer düchtig anlohnt an dat San-Remo-Festival, dat 1951 in’t Leven ropen weer. Vun’n Grundsatz her künnt all Liddmaten deelnehmen, de Liddmaten vun de EBU sünd, wat ok eenige Radio- un Feernsehsenner vun afrikaansche un asiaatsche Länner ümfaten deit. Jeed Land is mit een Leed dorbi.

De internatschonale Wettstriet, de siet 2004 ut en Halffinale un de Endrunn besteiht, warrt normalerwies in dat Land afhollen, wat in dat Johr dorför wunnen hett. De Endrunn is indeelt in en Präsentatschoon vun de Finaldeelnehmers, de ruchweg twee Stünnen duert, un de Punktevergaav, de noch mol een Stünn duert. Dortwüschen liggt en Tietfinster vun teihn bit föffteihn Minuuten mit en Showprogramm. In disse Tiet leegt de Länner jemehr Punkteverdelen fast.

Siet 2003 gifft dat mit den Junior Eurovision Song Contest en tweete Variante vun’n Wettstriet, de ok jeed Johr utdragen warrt, un siet 2007 dorto noch den Eurovision Dance Contest.

Historie

De Singer vun de finnische Grupp Lordi, de 2006 wunnen hett

De Singersche Nicole in’t Johr 2008. Se hett 1982 as eerste för Düütschland wunnen.
(Foto:Sony BMG GmbH/Nikolaj Georgiew)

De eerste Wettstriet hett 1956 in Lugano in de Swiez stattfunnen. Dormols hebbt blots söven Länner mit twee Leder jeder deelnahmen, dorünner weern de Swiez, Düütschland un Frankriek. In de Johren dorna hebbt jümmer mehr Länner Intresse an den Wettstriet kregen. As eenzig sozialitisch Land hett Jugoslawien regelmatig an’n ESC deelnahmen. Siet 1990 künnt dör’t Oplösen vun de Intervison un de gliektietige Utwieten vun de EBU ok de oosteuropääschen Länner an den Musikwettstriet deelnehmen. Üm den Avend vun wegen de grote Tall vun de Länner nich unnödig in de Läng to tehn, harr de EBU in de Anfangstiet de Tall vun de Deelnehmers begrenzt. Dorbi müssen die Länner, de an’n slechtesten afsneden harrn, een Johr utsetten, harrn denn aver automaatsch dat Recht, in dat opfolgen Johr wedder dorbitowesen. Disse Regel is jümmer wedder ’n beten ännert worrn.

1998 is fastleggt worrn, dat de veer Liddmaten, de den gröttsten Andeel vun den EBU-Etat finanzeert, automaatsch för den Wettstriet qualifizeert sünd. De Grund vör disse Ännern weer, dat de düütsche Bidrag för den ESC 1996 bi en interne Juryutwahl utscheedt is. Man is denn bang worrn, dat de finanzstarken Länner villicht op Duer vun den Wettstriet wegblieven künnen. Vun dor an weern Düütschland, Frankriek, Grootbritannien un Spanien sett. Disse Lännerkoppel warrt in den Tosamenhang ok as de Groten Veer betekent. Anfangs hett disse Sünnerregel ok för Italien gellt, man siet 1994 nehmt de Italieners al nich mehr doran deel (mit Utnahm vun 1997).

De internatschonale Wettstriet warrt siet 2004 in en Qualifikatschoons- un en Endrunn utdragen. An de Vörrunn künnt all aktiven Liddmaten vun de EBU deelnehmen. Vun 2004 bit 2007 geev dat en Halffinale, worut sik de teihn Bestplatzeerten för de Endrunn qualifizeert hebbt. För de weern blangen de veer setten Länner, de Utrichter (un Vörjohrswinner) as ok de Tweeten bit Teihnten ut dat Vörjohr automaatsch qualifizeert. Siet 2008 gifft dat nu twee Halffinalen, worut sik je de teihn Besten qualifizeert, de mit den Utrichter un de Groten Veer de Endrunn bestrieden doot.

Düütschland is dat Land mit de meisten Bidrääg un dat eenzige Land, dat – mit Utnahm vun 1996 – jeed Johr en Leed to’n Eurovision-Festival schickt hett. 1996 hett Düütschland nich deelnehmen dröfft, vun wegen dat dat Leed Blauer Planet, dat vun Hanne Haller komponeert, weer in en interne Vörutwahl vun de Rundfunkunion (ERU/EBU/UER) blangen Däänmark, Russland, Mazedonien, Ungarn, Israel un Rumänien vun de Deelnahm utslaten worrn weer. Wunnen hett Düütschland eerst eenmol, neemlich in’t Johr 1982, as de junge Singersche Nicole den Wettstriet mit dat Leed Ein bißchen Frieden wunnen hett. Dorophen fünn dat Festival 1983 in München statt. Düütschland hett mehrmols en tweeten oder drüdden Platz hatt, müss sik aver ok al fief mol mit den letzten Platz tofreden geven. De Bundsrepubliek Düütschland harr ok al 1957 den Groten Pries vun de Eurovision utdragen. Dat hett dormols in Frankfort an’n Main stattfunnen. De Regel, dat dat Land utrichten deit, dat den Wettstriet wunenn hett, hett dat 1956 noch nicht geven.

Den meisten Spood ünner de Deelnehmers harr bit hüüt Irland. De Iren hebbt al söven mol den Eurovision Song Contest wunnen, un dat vun 1992 bit 1994 sogor in de Reeg. Ok de spoodriekste Interpret kummt ut Irland: Johnny Logan hett den Wettstriet tweemol as Singer wunnen, neemlich 1980 mit What’s Another Year un 1987 mit Hold Me Now, un eenmol noch as Komponist 1992 mit Why Me.

In’n Tosamenhang mit den 50. Eurovision Song Contest in’t Johr 2005 hett in Kiew to’n eersten mol ok en Kunstutstellen ünner den Titel „We, the people of Eurovision…“ stattfunnen.

Siet 2001 hollt jüst en Serie an, in de blots Länner den Wettstriet wunnen hebbt, de vörher noch nie Eerster worrn sünd. 2008 is to’n eersten mol in de Historie vun den Wettstriet en Modus mit twee Halffinalen maakt worrn. Dormit schall de Punktschuveree ünner verschedene Länner minnert warrn.

Beteken

De eenzige offizielle Beteken för den Wettstriet is Eurovision Song Contest. Liekers geev dat in Düütschland annere bekanntere Beteken as Grand Prix oder Großer Preis der Eurovision, vun wegen dat fröhere Veranstalten ok wirklich mol so nöömt worrn sünd. In all de Johren geev dat aver blots acht Veranstalten, de offiziell Grand Prix heten hebbt – de letzte weer 1967, un blots een eenzige mit de düütsche Beteken, de 1957 in Frankfort stattfunnen hett. In Düütschland is ok veel de Beteken Grand Prix (d’)Eurovision de la Chanson begäng wesen, ofschoonst dat nie en Festival geven hett, dat wohrhaftig so heten hett.

Verbreedt is ok de Annahm, dat de engelsche Beteken Eurovision Song Contest as moderne Beteken nee inföhrt worrn is. Dorbi hett al de föffte Wettstriet in’t Johr 1960 in Grootbritannien dissen Naam hatt. Vun de 52 Veranstalten, de dat bit hüüt (Stand: 11. Mai 2009) geven hett, hebbt 32 offiziell Eurovision Song Contest heten, dorünner all Wettstrieden siet 1992. Un sülvst in de frankophonen Länner is de Beteken siet 1973 nich Grand Prix, man Concours Eurovision de la Chanson. Die düütsche Beteken hett sik noch nich mol in’n düütschsprakigen Ruum dörsetten künnt. Grand Prix hett aver bit 2003 de Utteken heten, den de Winner vun den Wettstriet kregen hett (toletzt: „Grand Prix of the 2003 Eurovision Song Contest“). Siet 2004 is de Begreep Grand Prix vullstännig ut dat Regelwark verswunnen.

Natschonaale Vörutscheden

Woans de deelnehmen Länner jemehrn Vertreder för den Wettstriet utwählen doot, is jem sülvst överlaten. Tomeist löpt dat över en natschonale Vörutscheden, bi de mehrere Singers oder Gruppen gegenenanner anpedden doot. In fröhere Tieten hett denn tomeist en Jury bestimmt, wokeen bi dat internatschonale Festival deelnehmen dröff, vundaag warrt dat normalerwies över’t Televoting maakt.

In Düütschland hett disse Vörutscheden lange Tiet „Ein Lied für…“ heten, wobi jümmer de Naam vun de Stadt achteran stellt weer, woneem de Wettstriet stattfinnen de. In de Johren 2004 un 2005 harr he den Titel „Germany 12 Points!“, üm 2006 denn mit Deutsche Vorentscheidung zum Eurovision Song Contest 2006 wedder en weniger hooch grepen Titel to kriegen.

Man, de Länner künnt sik ok en Vörutscheden begeven un en Künstler direkt vörslahn. Disse Mööglichkeit is in Düütschland to’n Bispeel vun 1993 bit 1995 bruukt worrn un in de Swiez vun 2005 bit 2007.

Punktvergaav

In de Endrunn vun den Wettstriet drööft blangen de Länner, de sülvst deelnehmt, ok all de Länner afstimmen, de in de Vörrunn mit dorbi wesen sünd. Siet eenige Johren warrt in de Länner de teihn leefsten Leder dör Televoting bestimmt un Punkten vergeven. Siet 1975 gellt dat nafolgen System: Dat Leed mitde meisten Stimmen kriggt twölf Punkten, de wietere kriegt teihn, acht, söven, söss und so wieter. För den egenen Bidrag drööft keen Punkten vergeven warrn. Dit Verfohren harr toeerst ünner annern den Sinn, dat keen „null Punkten“ vergeven warrn schülln un ok keen Interpret ahn Punkten na Huus gahn mutt. Liekers geev dat siet 1975 faken ok Deelnehmers, de keen Punkten afkregen hebbt.

För den Fall, dat wat passeeren schüll, wat dat Televoting hinnert, steiht en „Stand-by-Jury“ ut acht Lüüd praat, de denn de Punkten vergeevt. So en Jury hett in’t Johr 2000 de Punkten för de Nedderlannen vergeven, as wegen de Explosion vun de Füerwarksfabrik in Eschede an’n Dag vun’n ESC keen Televoting stattfunnen hett.

In de Tiet vör 1997 is de Punktvergaav dör en Jury fastleggt worrn. De hett in jeed Land ut sössteihn Lüüd bestahn, de sik ut acht Facklüüd un acht intresseerte Laien tosamensett hett. Disse Lüüd müssen butendem ut verschedene Generatschonen kamen, üm dat en objektiv Resultat dorbi rutkamen de. 1997 is in fief Länner (Düütschland, Sweden, Öösterriek, Grootbritannien un de Swiez) to’n eersten mol dat Televoting utprobeert worrn, dat bi de Tokiekers bannig goot ankamen is. 1998 is de Jury dorophen al dör dat ne’e System aflöst worrn. Blots wenige Länner as Russland oder Ungarn hebbt dat Televoting eerst later inföhrt, vun wegen dat de technischen Mööglichkeiten noch nich dor weern.

Wunnen hett dat Land, dat an’t Enn de meisten Punkten tosamenkriggt. Dat gifft noch annere Regeln, üm ok bi Punktgliekstand an’t Enn en eendüdigen Winner fiern to künnen. Wenn twee Länner de glieke Punkttall hebbt, winnt dat Land, dat vun de meisten Länner Punkten kregen hett. Wenn ok dat noch nich eendüdig is, warrt de Tall vun de Weertungen mit 12 Punkten rantogen, villicht denn ok na de 10 Punkten un so wieter. För den unwohrschienlichen Fall, dat an’t Enn ok dorbi keen Ünnerscheed rutkamen is, warrt beide (oder ok mehr) Länner as Winner uttekent. All disse Regeln sünd bit hüüt eenmol anwennt worrn, as neemlich 1991 de Swedin Carola („Fångad av en stormvind“) fakener 10 Punkten kregen harr as de punktglieke Franzöösche Amina („Le dernier qui a parlé“) un dorüm wunnen hett. De eerste Regel, wona dat Land winnt, dat vun de meisten annern Länner Punkten kregen hett, geev dat to de Tiet noch nich. Wenn dat de al geven harr, harr Frankriek wunnen hatt.

In de Tiet vör 1975 hett dat verschedene Vergaavsystemen geven. Bi’n ESC 1969 hett en Modus, de allgemeen to siete Punkttallen föhren de, dorför sorgt, dat gliek veer Länner (Spanien, Grootbritannien, Frankriek un de Nedderlannen) punktgliek vörn legen un allsamt de Winners verklort worrn sünd.

In’t Johr 2006 is de Punktvergaav ’n beten ännert worrn. So warrt de Titel, de 1 bit 7 Punkten kriegt blots noch tosamen anwiest. Blots de Leder, de acht, teihn oder twölf Punkten kriegt, warrt jümmer noch vun de natschonalen Feernsehmoderaters dörgeven. Dordör is de Punktvergaav vun wiet mehr as een Stunn op ruchweg 45 Minuuten kört worrn.

Weertungssystemen vör 1975

De eerste ESC, bi de de Afstimmen publiek maakt worrn is, weer 1957. Dor güng dat na den folgen Modus: In jede Landsjury hebbt teihn Liddmaten seten, wobi jede een Punkt för sien Favoriten afgeven künn. Dit System weer 1957 bit 1961, 1967 bit 1970 as ok 1974 bruukt.

In dat Johr 1962 weer dat so maakt, dat de Landsjurys dree Punkten an den besten Titel vergeven hebbt, twee an den tweetbesten un een Punkt an den drüttbesten. Dit System weer ok 1963 nahmen, man mit fief Punkten vör den eersten und so wieter.

In’t Johr 1964 is en nee System inföhrt worrn, wona jed Liddmaat vun de Jury jeed Land beweerten deit. Dorut is en List entstahn, vun de dat beste Leed fief Punkten kreeg, de tweete dree un de drüttbeste een Punkt. Schüll blots een Leed beweert warrn, kreeg dat denn all negen Punkten, bi twee Leder kreeg de beste Titel söss Punkten un de tweete dree Punkten.

Siet 1962 geev dat regelmatig null Punkten – 1962 bit 1965 sogor veer Länner jeed Johr. Dorüm, un ok as man nich tofreden weer mit dat System vun 1957, dat 1969 to glieks veer Winners föhrt harr, is 1971 wedder en ne’en Modus inföhrt worrn. Jeed Land hett nu twee Lüüd to’n Afstimmen schickt, de för jeed Leed twüschen een un fief Punkten vergeven künnen. Dorbi stegen de Punkttallen to’n eersten mol över Hunnert.

Ne’e Regel af 2008

De verantwoortliche Europääsche Rundfunkunion (EBU) hett an’n 2. Oktober 2008 en ne’e Regelännern vöstellt vun wegen de tonehmen Bedüden vun Sympathiepunkten ünner befrünnte Länner: Vun 2008 af an schülln twee splitt Halffinalen utdragen warrn, wobi de Kandidaten över en Loosverfohren toseelt warrt. Afstimmt warrn kann dorbi blots noch för de Länner, de in dat Halffinale gegen dat egene Land anpedden doot, wat to’n Reduzeeren vun möögliche Sympathiepunkten föhren schall.

Blangen den Gastgever un de veer groten EBU-Geldgevers Düütschland, Frankriek, Grootbritannien un Spanien, künnt ut jeed Halffinale de negen Länner mit de meisten Punkttallen an de Endrunn deelnehmen. Ünner de verbleven Halffinalisten bestimmt en Jury je noch en wieteren Finaldeelnehmer, so dat an’n 21. November 2008 de Deelnehmertall an de Endrunn op 25 opstockt worrn is.

Ne’e Regel af 2009

Vun wegen dat ok 2008 jümmer noch Sympathiepunkten vergeven weern, sünd de Regeln een Johr later noch mol wedder ännert worrn. So warrt af 2009 de Stimmen ut de Telefonafstimmen blots noch to Hälft rekent, wiel de annere Hälft wedder dör en Jury vergeven warrt, as se dat fröher al geven hett. De Europääsche Rundfunkunion geev as Grund an, dat sik de Resultaten vun de Ersatzjurys – de in’n Fall vun technische Utfäll de lückenlose Punktevergaav seker stellen schüllt – jümmer mehr vun de Tokiekerresutaten ünnerscheden. Dorto ünnerstreek de NDR-Verantwoortliche Ralph Quibeldey, dat de Juryliddmaten in’n Gegensatz to de Tokiekers de Bidrääg mehrmols hören deen un dorüm ok en nauer’t Oordeel afgeven künnen.

Beobachter seht dorin den Versöök, kulturell Ünnerscheden invn Smack vun de oosteuropääschen un zentralasiaatschen Tokiekers afsichtlich to ünnerdrücken un hebbt de Veantwoortlichen vörhollen, Blockbilln to bedrieven un de individuelle Gööd vun de Bidrääg nich to achten.

Ne’e Regel af 2010-2012

In’n September 2009 hett de EBU bekannt geven, dat in beiden scheedten Semifinalrunnen as ok in de Endrunn de Jurys to 50 % afstimmt. Bito dröff vun’n Anfang vun’t eerste Leed an bit 15 Minuuten na’t Enn vun’t letzte Leed afstimmt warrn. Af 2012 schüllt de Leitungen eerst wedder na dat letzte Leed freeschallt warrn, vunwegen dat de Mööglichkeit wiel dat Leed to stimmen kuum nütt worrn is. Enn 2010 is butendem dat Datum vun’t Rutkamen vun en Leed vun en Johrgang üm een Maand op’n 1. September vun’t Vörjohr vörtogen worrn.

Moderaters

De eerste Weetstriet 1956 weer bit hüüt de eenzige, de alleen vun een Mann modereert worrn is. In de Johren dorna weern dat jümmer Fronslüüd, de dör de Sennen föhrt hebbt, bit 1978 to’n eersten mol en Mann un en Fro tosamen modereert hebbt. Disse Ännern is 1979 vun Israel övernahmen worrn, man vun 1980 bit 1987 as ok 1993 un 1995 weern dat wedder enkelte Fronslüüd. Vun 1996 is dat denn opletzt to Traditschoon worrn, dat en Fro un en Mann tosamen dör den Avend föhrt. Een Utnahm geev dat dorvun noch 1999 as Israel glieks twee Fronslüüd an de Siet vun een Mann as Gastgevers optreden laten hebbt. Dat is fakener ok vörkamen, dat fröhere ESC-Deelnehmers de Endrunn modereert hebbt.

Översicht över de ESC-Endrunnen siet 1956

Johr	Beteken un Oort vun de Veranstalten	Deel- nehmer	Winnertitel un Interpret	Winner- natschoon	Tweet- un Drüttplazeerte
1956	Gran Premio Eurovisione della Canzone Europea in Lugano, Swiez	7¹	Refrain vun Lys Assia	Swiez	weer nich publiek maakt
1957	Großer Preis der Eurovision in Frankfort an’n Main, Düütschland	10	Net als toen vun Corry Brokken	Nedderlannen	2. La belle amour vun Paule Desjardins, Frankriek 3. Skibet skal sejle i nat vun Birthe Wilke & Gustav Winckler, Däänmark
1958	Grand Prix Eurovision de la Chanson Européenne in Hilversum, Nedderlannen	10	Dors mon amour vun André Claveau	Frankriek	2. Giorgio vun Lys Assia, Swiez 3. Nel blu, dipinto di blu vun Domenico Modugno, Italien
1959	Grand Prix Eurovision de la Chanson Européenne in Cannes, Frankriek	11	Een beetje vun Teddy Scholten	Nedderlannen	2. Sing Little Birdie / Pearl Carr & Teddy Johnson, Grootbritannien 3. Oui, oui, oui, oui vun Jean Philippe, Frankriek
1960	Eurovision Song Contest in London, Grootbritannien	13	Tom Pillibi vun Jacqueline Boyer	Frankriek	2. Looking High, High, High vun Bryan Johnson, Grootbritannien 3. Ce soir-là vun François Deguelt, Monaco
1961	Grand Prix Eurovision de la Chanson Européenne in Cannes, Frankriek	16	Nous les amoureux vun Jean-Claude Pascal	Luxemborg	2. Are You Sure vun The Allisons, Grootbritannien 3. Nous aurons demain vun Franca di Rienzo, Swiez
1962	Grand Prix Eurovision de la Chanson Européenne in Luxemborg, Luxemborg	16	Un premier amour vun Isabelle Aubret	Frankriek	2. Dis rien vun François Deguelt, Monaco 3. Petit bonhomme vun Camillo Felgen, Luxemborg
1963	Eurovision Song Contest in London, Grootbritannien	16	Dansevise vun Grethe & Jørgen Ingmann	Däänmark	2. T’en va pas vun Esther Ofarim, Swiez 3. Uno per tutte vun Emilio Pericoli, Italien
1964	Grand Prix Eurovision in Kopenhagen, Däänmark	16	Non ho l’età vun Gigliola Cinquetti	Italien	2. I Love The Little Things vun Matt Monro, Grootbritannien 3. Où sont-elles passées vun Romuald, Monaco
1965	Gran Premio Eurovisione della Canzone in Neapel, Italien	18	Poupée de cire, poupée de son vun France Gall	Luxemborg	2. I Belong vun Kathy Kirby, Grootbritannien 3. N’avoue jamais vun Guy Mardel, Frankriek
1966	Grand Prix Eurovision de la Chanson Européenne in Luxemborg, Luxemborg	18	Merci Chérie vun Udo Jürgens	Öösterriek	2. Nygammal vals eller hip man svinaherde vun Lill Lindfors & Svante Thuresson, Sweden 3. Intet er nytt under solen vun Åse Kleveland, Norwegen
1967	Grand Prix de la Chanson in Wien, Öösterriek	17	Puppet On A String vun Sandie Shaw	Grootbritannien	2. If I Could Choose vun Sean Dunphy, Irland 3. Il doit faire beau là-bas vun Noëlle Cordier, Frankriek
1968	Eurovision Song Contest in London, Grootbritannien	17	La, la, la … vun Massiel	Spanien	2. Congratulations vun Cliff Richard, Grootbritannien 3. La source vun Isabelle Aubret, Frankriek
1969²	Gran Premio de la Canción de Eurovision in Madrid, Spanien	16	Vivo cantando vun Salomé Un jour, un enfant vun Frida Boccara De troubadour vun Lenny Kuhr Boom bang a bang vun Lulu	Spanien Frankriek Nedderlannen Grootbritannien	fallt ut, wegen de veer Eersten
1970	Eurovisie Songfestival in Amsterdam, Nedderlannen	12	All Kinds Of Everything vun Dana	Irland	2. Knock, Knock, Who’s There vun Mary Hopkin, Grootbritannien 3. Wunder gibt es immer wieder vun Katja Ebstein, Düütschland
1971	Eurovision Song Contest in Dublin, Irland	18	Un banc, un arbre, une rue vun Séverine	Monaco	2. En un mundo nuevo in Karina, Spanien 3. Diese Welt vun Katja Ebstein, Düütschland
1972	Eurovision Song Contest in Edinburgh, Grootbritannien	18	Après toi vun Vicky Leandros	Luxemborg	2. Beg, Steal Or Borrow vun New Seekers, Grootbritannien 3. Nur die Liebe lässt uns leben vun Mary Roos, Düütschland
1973	Concours Eurovision de la Chanson in Luxemborg, Luxemborg	17	Tu te reconnaîtras vun Anne-Marie David	Luxemborg	2. Eres tú vun Mocedades, Spanien 3. Power To All Our Friends vun Cliff Richard, Grootbritannien
1974	Eurovision Song Contest in Brighton, Grootbritannien	17	Waterloo vun ABBA	Sweden	2. Si vun Gigliola Cinquetti, Italien 3. I See A Star vun Mouth & MacNeal, Nedderlannen
1975	Eurovision Song Contest in Stockholm, Sweden	19	Ding-a-dong vun Teach-In	Nedderlannen	2. Let Me Be The One vun The Shadows, Grootbritannien 3. Era vun Wess & Dori Ghezzi, Italien
1976	Eurovisie Songfestival in Den Haag, Nedderlannen	18	Save Your Kisses For Me vun Brotherhood of Man	Grootbritannien	2. Un, Deux, Trois vun Catherine Ferry, Frankriek 3. Toi, la musique et moi vun Mary Cristy, Monaco
1977	Eurovision Song Contest in London, Grootbritannien	18	L’oiseau et l’enfant vun Marie Myriam	Frankriek	2. Rock Bottom vun Lynsey de Paul & Mike Moran, Grootbritannien 3. It’s Nice To Be In Love Again vun The Swarbriggs Plus Two, Irland
1978	Concours Eurovision de la Chanson in Paris, Frankriek	20	A-Ba-Ni-Bi vun Yizhar Cohen & The Alpha-Beta	Israel	2. L’amour ca fait chanter la vie vun Jean Vallée, Belgien 3. Il y aura toujours des violons vun Joel Prévost, Frankriek
1979	Eurovision Song Contest in Jerusalem, Israel	19	Hallelujah vun Gali Atari & Milk and Honey	Israel	2. Su canción vun Betty Missiego, Spanien 3. Je suis l’enfant-soleil vun Anne-Marie David, Frankriek
1980	Eurovisie Songfestival in Den Haag, Nedderlannen	19	What’s Another Year vun Johnny Logan	Irland	2. Theater vun Katja Ebstein, Düütschland 3. Love Enough For Two vun Prima Donna, Grootbritannien
1981	Eurovision Song Contest in Dublin, Irland	20	Making Your Mind Up vun Bucks Fizz	Grootbritannien	2. Johnny Blue vun Lena Valaitis, Düütschland 3. Humanahum vun Jean Gabilou, Frankriek
1982	Eurovision Song Contest in Harrogate, Grootbritannien	18	Ein bißchen Frieden vun Nicole	Düütschland	2. Hora vun Avi Toledano, Israel 3. Amour on t’aime vun Arlette Zola, Swiez
1983	Eurovision Song Contest in München, Düütschland	20	Si la vie est cadeau vun Corinne Hermès	Luxemborg	2. Chai, Chai, Chai vun Ofra Haza, Israel 3. Främling vun Carola Häggkvist, Sweden
1984	Concours Eurovision de la Chanson in Luxemborg, Luxemborg	19	Diggi-loo diggi-ley vun Herreys	Sweden	2. Terminal 3 vun Linda Martin, Irland 3. Lady Lady vun Bravo, Spanien
1985	Eurovision Song Contest in Göteborg, Sweden	19	La det swinge vun Bobbysocks	Norwegen	2. Für alle vun Wind, Düütschland 3. Bra vibrationer vun Kiki Danielsson, Sweden
1986	Eurovision Song Contest in Bergen, Norwegen	20	J’aime la vie vun Sandra Kim	Belgien	2. Pas pour moi vun Daniela Simons, Swiez 3. L’amour de ma vie vun Sherisse Laurence, Luxemborg
1987	Concours Eurovision de la Chanson in Brüssel, Belgien	22	Hold Me Now vun Johnny Logan	Irland	2. Lass’ die Sonne in Dein Herz vun Wind, Düütschland 3. Gente di mare vun Umberto Tozzi & Raf, Italien
1988	Eurovision Song Contest in Dublin, Irland	21	Ne partez pas sans moi vun Céline Dion	Swiez	2. Go vun Scott Fitzgerald, Grootbritannien 3. Ka’ du se hva’ jeg sa' vun Hot Eyes, Däänmark
1989	Concours Eurovision de la Chanson in Lausanne, Swiez	22	Rock Me vun Riva	Jugoslawien	2. Why Do I Always Get It Wrong vun Live Report, Grootbritannien 3. Vi maler byen rød vun Birthe Kjær, Däänmark
1990	Eurovision Song Contest in Zagreb, Jugoslawien	22	Insieme 1992 vun Toto Cutugno	Italien	2. White & Black Blues vun Joëlle Ursull, Frankriek 2. Somewhere In Europe vun Liam Reilly, Irland
1991	Concorso Eurovisione della Canzone in Rom, Italien	22	Fångad av en stormvind vun Carola	Sweden	2. Le dernier qui a parlé vun Amina, Frankriek 3. Kan vun Duo Datz, Israel
1992	Eurovision Song Contest in Malmö, Sweden	23	Why Me vun Linda Martin	Irland	2. One Step Out Of Time vun Michael Ball, Grootbritannien 3. Little Child vun Mary Spiteri, Malta
1993	Eurovision Song Contest in Millstreet, Irland	25	In your eyes vun Niamh Kavanagh	Irland	2. Better The Devil You Know vun Sonia, Grootbritannien 3. Moi tout simplement vun Annie Cotton, Swiez
1994	Eurovision Song Contest in Dublin, Irland	25	Rock’n Roll kids vun Paul Harrington & Charlie McGettigan	Irland	2. To nie ja vun Edyta Gorniak, Polen 3. Wir geben ’ne Party vun Mekado, Düütschland
1995	Eurovision Song Contest in Dublin, Irland	23	Nocturne vun Secret Garden	Norwegen	2. Vuelve conmigo vun Anabel Conde, Spanien 3. Se på mig vun Jan Johansen, Sweden
1996	Eurovision Song Contest in Oslo, Norwegen	23	The Voice vun Eimear Quinn	Irland	2. I evighet vun Elisabeth Andreassen, Norwegen 3. Den Vilda vun One More Time, Sweden
1997	Eurovision Song Contest in Dublin, Irland	25	Love shine a light vun Katrina and the Waves	Grootbritannien	2. Mysterious Woman vun Marc Roberts, Irland 3. Dinle vun Şebnem Paker & Grupp Etnik, Törkie
1998	Eurovision Song Contest in Birmingham, Grootbritannien	25	Diva vun Dana International	Israel	2. Where Are You vun Imaani, Grootbritannien 3. The One That I Love vun Chiara, Malta
1999	Eurovision Song Contest in Jerusalem, Israel	23	Take Me To Your Heaven vun Charlotte Nilsson	Sweden	2. All Out Of Luck vun Selma, Island 3. Reise nach Jerusalem (Kudüs'e seyahat) vun Sürpriz, Düütschland
2000	Eurovision Song Contest in Stockholm, Sweden	24	Fly On The Wings Of Love vun Olsen Brothers	Däänmark	2. Solo vun Alsou, Russland 3. My Star vun Brainstorm, Lettland
2001	Eurovision Song Contest in Kopenhagen, Däänmark	23	Everybody vun Tanel Padar & Dave Benton	Eestland	2. Never Ever Let You Go vun Rollo & King, Däänmark 3. Die For You vun Antique, Grekenland
2002	Eurovision Song Contest in Tallinn, Eestland	24	I Wanna vun Marie N	Lettland	2. 7th Wonder vun Ira Losco, Malta 3. Runaway vun Sahlene, Eestland
2003	Eurovision Song Contest in Riga, Lettland	26	Everyway That I Can vun Sertab Erener	Törkie	2. Sanomi vun Urban Trad, Belgien 3. Ne ver, ne boisja vun t.A.T.u., Russland
2004	Eurovision Song Contest in Istanbul, Törkie	24 (+12)	Wild Dances vun Ruslana	Ukraine	2. Lane Moje vun Željko Joksimović, Serbien un Montenegro 3. Shake It vun Sakis Rouvas, Grekenland
2005	Eurovision Song Contest in Kiew, Ukraine	24 (+15)	My Number One vun Helena Paparizou	Grekenland	2. Angel vun Chiara, Malta 3. Let Me Try vun Luminiţa Anghel & Sistem, Rumänien
2006	Eurovision Song Contest in Athen, Grekenland	24 (+13)	Hard Rock Hallelujah vun Lordi	Finnland	2. Never let you Go vun Dima Bilan, Russland 3. Lejla vun Hari Mata Hari, Bosnien un Herzegowina
2007	Eurovision Song Contest in Helsinki, Finnland	24 (+18)	Molitva vun Marija Šerifović	Serbien	2. Dancing Lasha Tumbai vun Verka Serduchka, Ukraine 3. Song #1 vun Serebro, Russland
2008	Eurovision Song Contest in Belgrad, Serbien	25 (+18)	Believe vun Dima Bilan	Russland	2. Shady Lady vun Ani Lorak, Ukraine 3. Secret Combination vun Kalomira, Grekenland
2009	Eurovision Song Contest in Moskau, Russland	25 (+17)	Fairytale vun Alexander Rybak	Norwegen	2. Is It True? vun Yohanna, Island 3. Always vun AySel un Arash, Aserbaidschan
2010	Eurovision Song Contest in Oslo, Norwegen	25 (+14)	Satellite vun Lena	Düütschland	2. We Could Be the Same vun maNga, Törkie 3. Playing with Fire vun Paula Seling & Ovi, Rumänien
2011	Eurovision Song Contest in Düsseldörp, Düütschland	25 (+18)	Running Scared vun Ell un Nikki	Aserbaidschan	2. Madness of Love vun Raphael Gualazzi, Italien 3. Popular vun Eric Saade, Sweden
2012	Eurovision Song Contest in Baku, Aserbaidschan	26 (+16)	Euphoria vun Loreen	Sweden	2. Party for Everybody vun Buranowskije Babuschki, Russland 3. Nije ljubav stvar vun Željko Joksimović, Serbien
2013	Eurovision Song Contest in Stockholm, Sweden

¹ Jeed Land hett mit twee Leder deelnahmen.
² In dat Johr geev dat veer Winners

Statistik vun de Winners

• In Fett schreven is dat Land, dat den letzten ESC wunnen hett
• Bi glieke Tall sünd de Länner na Alphabeth sorteert

Rang	wo faken wunnen	Land	toletzt wunnen
1	7	Irland	1996
2	5	Frankriek	1977
		Luxemborg	1983
		Grootbritannien	1997
		Sweden	2012
5	4	Nedderlannen	1975
7	3	Israel	1998
		Norwegen	2009
9	2	Däänmark	2000
		Düütschland	2010
		Italien	1990
		Swiez	1988
		Spanien	1969
14	1	Aserbaidschan	2011
		Belgien	1986
		Eestland	2001
		Finland	2006
		Grekenland	2005
		Jugoslawien	1989
		Lettland	2002
		Monaco	1971
		Öösterriek	1966
		Russland	2008
		Serbien	2007
		Törkie	2003
		Ukraine	2004

Internatschonaal Spood

In sien Verloop över de Johrteihnten, hett de Eurovision Song Contest ok vele Leder togang bröcht, de internatschonal groten Spood harrn un eenige dorvun sünd in de Twüschentiet ok al to Evergreens worrn. En poor Bispelen ut de fröhen Tiet sünd ünner annern de italienschen Bidrääg Nel blu dipinto di blu (Volare) un Piove (Ciao ciao bambina), de 1958 un 1959 beide vun Domenico Modugno vördragen sünd. Ok wenn de Leder nich wunnen hebbt, sünd se weltwiet doch eenige Millionen mol verköfft worrn un sünd vun grote Stars as Paul Anka oder Dean Martin adapteert.

Mitt vun de 1960er Johren harr de Wettstriet sien kommerziellen Hööchpunkt, de bit in de laten 1970er Johren anduern de. Puppet on a string is för de Singersche Sandie Shaw en weltwieten Spood worrn un is ok för Warfsennen un op Modenschaun vun de Tiet speelt worrn. Dör sien Melodie, de in’t Ohr güng un licht wedder to kennen weer, is dat Leed meist op’n Slag to’n Evergreen worrn. Ut den sülven Johrgang stammt de luxemborgsche Bidrag vun Vicky Leandros L'amour est bleu, de in een Instrumentalversion vun Paul Mauriat in de USA op Platz 1 keem. Mit Après toi hett se 1972 den Wettstriet wunnen un hett den Titel in verschedene Spraken weltwiet mehr as 5,5 Millionen mol verköfft. Disse Marke is 1974 överdrapen worrn, as ABBA mit den Titel Waterloo wunnen hebbt. Dat Leed verköff sik 6 Millionen mol. Un noch mol stegen is de Verkoopstall bi de Grupp Brotherhood Of Man, de 1976 mit den Slager Save your kisses for me 6,5 Millionen Toondrägers verköpen deen. Man noch vele annere Interpreten hebbt internatschonale Tophitts lannt.

In’n Verloop vun de Johren hett de ESC vele Interpreten to Stars maakt, all’n vöran de sweedsche Grupp ABBA. Ok de franko-kanaadsche Singersche Céline Dion is dör er Deelnehmen an’n Eurovision Song Contest 1988 bekannt worrn, den se vör de Swiez mit Ne partez pas sans moi wunnen hett. Un ok de irische Folkloregrupp Riverdance is dör den Wettstriet to weltwiet Ansehn kamen, as se 1994 in den Showdeel vör de Stimmafgaav optreden is.

An’n fakensten hett de Swiezer Musikgrupp Peter, Sue & Marc deelnahmen. Veer mol hebbt se jemehr Heimatland vertreden, wobi se jeed mol in en annere Spraak sungen hebbt. Jüst so faken weer de Belgier Fud Leclerc dorbi.

Anners rüm kann een aver nich seggen, dat en internatschonal bekannten Star, de bi den Contest antreden deit, glieks ok en Garantie is, den Wettstriet to winnen. To’n Bispeel hett Cliff Richard mit Congratulations 1968 blots den tweeten Platz beleggt un 1973 mit Power to All Our Friends blots den drüdden, ofschoonst beide Leder achteran in de Charts düütlich höger weern as de ESC-Winners. Jüst so künn ok dat al bekannte Duo t.A.T.u. ut Russland bi’n Eurovision Song Contest 2003 nich winnen un sünd blots drüdde worrn.

50-johrig Jubiläum

In Kopenhagen hett 2005 en Show ünner den Titel Congratulations stattfunnen, womit dat föfftigjohrige Jubiläum vun den Eurovision Song Contest fiert warrn schüll. Dat Teel vun de Show weer, ünner all Leder, de je deelnahmen hebbt, dat beste Leed vun den Grand Prix ruttofinnen. Op de offiziellen Websteed eurovision.tv künn jeedeen sien Stimm för sien leefsten Titel vun den ESC afgeven. De teihn Leder mit de meisten Stimmen sünd in de Semiendrunn kamen. Butendem hett en Jury vun de Europääsche Rundfunkunion veer wietere Titel in’t Halffinale wählt.

Wiel dat Halffinale is över’t Telefon afstimmt worrn. Dorbi sünd de besten fief Leder rutfunnen worrn. In’n tweeten Dörgang, also de Endrunn, is nochmol en Telefonvoting maakt worrn, mit dat denn de Reeg vun disse fief Leder fastleggt worrn is.

Dör de Sennen föhrt hebbt de britische ESC-Winnersche Katrina Leskanich (vun de Grupp Katrina & The Waves, de 1997 mit dat Leed Love Shine A Light wunnen harr) un de lettische Renars Kaupers (vun de Grupp Brainstorm, de 2000 mit My Star op’n drüdden Platz kamen is). De Sennen is in Düütschland vun’n WDR un vun’n SWR överdragen worrn.

Dat Resultat weer:

Rang	Johr	Land	Interpret	Titel
1	1974	Sweden	ABBA	Waterloo
2	1958	Italien	Domenico Modugno	Nel blu dipinto di blu (Volare)
3	1987	Irland	Johnny Logan	Hold Me Now
4	2005	Grekenland	Helena Paparizou	My Number One
5	1976	Grootbritannien	Brotherhood of Man	Save Your Kisses For Me
6	2000	Däänmark	Olsen Brothers	Fly On The Wings Of Love
7	1982	Düütschland	Nicole	Ein bißchen Frieden
8	1968	Grootbritannien	Cliff Richard	Congratulations
9	2003	Törkie	Sertab Erener	Everyway That I Can
10	1988	Swiez	Céline Dion	Ne partez pas sans moi
11	1973	Spanien	Mocedades	Eres Tú
12	1980	Irland	Johnny Logan	What's Another Year
13	1998	Israel	Dana International	Diva
14	1965	Luxemborg	France Gall	Poupée de cire, poupée de son

Regeln för’t Deelnehmen

• Dat Leed dröff nich länger wesen as dree Minuuten.
• De Interpreten mööt tomindst 16 Johr oolt wesen.
• Jeed Interpret dröff in een Johr blots för een Land mitmaken.
• Op de Bühn drööft nich mehr as söss Personen mitmaken.
• Dat Leed mutt live sungen warrn.
• Dat Leed oder de Optritt drööft keen politische Naricht bargen oder den Roop vun’n Wettstriet schaden.
• Bi den Optritt drööft keen Deerten mitmaken.
• De Leder drööft nich vör den 1. Oktober vun’t Vörjohr publizeert worrn wesen (disse Regel gifft dat siet 2003, as jümmer mehr Titel to’n Rünnerladen in’t Nett opduken deen).
• Dat Leed mutt en Original wesen, Coverversionen vun öllere Leder sünd also nich verlööft.
• De Instrumental-Musik warrt as Playback inspeelt. De Mööglichkeit, Musik live dör en Orchester spelen to laten geev dat 1998 to’n letzten mol.
• Tietwies geev dat de Regel, dat de Interpreten in jemehr Landsspraken singen müssen. Disse Regel geev dat vun 1966 bit 1972 un vun 1977 bit 1998. Siet 1999 steiht dat de Interpreten wedder free, in wovun Spraak se singt.

Literatur

• Jan Feddersen: Ein Lied kann eine Brücke sein. Hoffmann und Campe Verlag, 2002, ISBN 3-455-09350-7
• John Kennedy O’Connor: Eurovision Song Contest. Mit’n Vörwort vun Dr. Michael Sonneck. Gondrom, Bindlach 2005, ISBN 3-8112-2536-7
• Irving Wolther: „Kampf der Kulturen“: der „Eurovision Song Contest“ als Mittel national-kultureller Repräsentation. Königshausen & Neumann, Würzburg 2006, ISBN 3-8260-3357-4
• Mari Pajala: Finlande: zero points? Der Eurovision Song Contest in den finnischen Medien. Mit’n Vörwoort vun Jan Feddersen. SAXA Verlag, Köln 2007, ISBN 978-3-939060-07-9.
• Tim Moore: Null Punkte – Ein bisschen Scheitern beim Eurovision Song Contest. Ut dat Engelsche vun Olaf Bentkämper. Covadonga Verlag, Builefeld 2007, ISBN 978-3-936973-28-0.

Kiek ok

• Statistik to’n Eurovision Song Contest
• Bundsvision Song Contest
• Junior Eurovision Song Contest
• Eurovision Dance Contest
• Eurovision Young Musicians
• OGAE Germany e.V.

Weblenken

Eurovision Song Contest. Mehr Biller, Videos oder Audiodateien to't Thema gifft dat bi Wikimedia Commons.

• Offizielle ESC Websiet
• Offizielle düütsche Siet vun’n NDR to’n Eurovision Song Contest
• Eurovision Historie (Engelsch)
• All Resultaten un Interpreten siet 1956 bi hitparade.ch
• Groot Archiv siet 1956