Ray Davis (Politiker)
Raymond Lincoln „Ray“ Davis is en Politiker ut Belize.
Davis weer Beamten in dat Lands Department un in de Ministerien för Apentlichen Deenst, Gesundheit un Bildung.[1] Tosätzlich weer he in de Public Service Union of Belize aktiv.[1] In de laten Johren 1990 weer he Präsident von’n National Trade Union Congress (NTUCB) un hett von März bet Oktober 2006 övergangswies nochmaal den Vörsitt övernahmen.[1]
Von 2012 bet Harvst 2015 weer he as Vertreder von de Gewerkschaften Maat von’n Senaat von Belize.[2] He is von Elena Smith as Senater för de Gewerkschaften aflööst worrn, nadem he na Verscheel von de Gewerkschaften in’n Senaat nich in jemehr Sinn afstimmt harr.[3] Dat güng besünners üm’n Petrocaribe Loans Act. De Gewerkschaften weren gegen dat Gesett, aver Davis hett an’n 30. März 2015, as de Senaat dor över afstimmt hett, keen Stimm afgeven.[3] As de Senaat an’n 1. Juli in en twete Runn över dat Gesett afstimmt hett, weer Davis in’t Butenland ünnerwegens.[3] An’n 22. August hett dorüm de Generaalversammlung von’n NTUCB beslaten, dat Davis jem nich mehr in’n Senaat vertreden schall.[3] Dat hett för Arger sorgt, denn Davis harr gegen keen Regeln verstoten.[3] Dorüm hett dat noch bet Januar duurt, dat sik de NTUCB ne’e Regeln geven hett un mit Elena Smith en ne’e Senatersche bestimmt hett.
Footnoten[ännern | Bornkood ännern]
- ↑ a b c Ray Davis and Dylan Reneau lead NTUCB until October, Amandala an’n 7. März 2006
- ↑ New Belize Government Officially Underway', Ambergris Today an’n 22. März 2012
- ↑ a b c d e Conspiracy to get rid of Ray Davis as Labor Senator, The Guardian an’n 27. August 2015