Pico de Fogo

Vun Wikipedia
Wesseln na: Navigatschoon, Söök
De Kegel vun’n Pico de Fogo

De Pico de Fogo is en Vulkan op dat Eiland Fogo in de Republiek Kap Verde un mit 2829 m[1] de hööchste Barg vun de hele Inselgrupp. Dormit is he togliek ok de tweethööchste Barg in’n Noordatlantik – na den Pico del Teide op Teneriffa.

Dat hele Eiland Fogo besteiht ut en groten Vulkan, de sik kegelförmig opboot un ok hüüt noch aktiv is. Dat Land stiggt vun de Küst na’t Binnere vun’t Eiland stetig an. Dat hooch liggen Kraterrebeet warrt Chã das Caldeiras nöömt un hett en Dörmeter vun ruchweg 8 km. Dor gifft dat en Reeg vun Bargtippen, de all enkelte Vulkankegels dorstellt, de vun de verleden Utbröök torüchbleven sünd. De Pico de Fogo is de hööchst dorvun, de sik as enkelten Kegel ruchweg 1200 m över der Kraterbodden opboon deit.

Fogo is dat portugeesch Woort för „Füer“. Den Naam hett dat Eiland siet en gresigen Utbrook ut den Hööftkrater in’t Johr 1680. Dormols weer dat Eiland mit sien „Füerbarg“ al von wieten to sehn. Wietere Utbröök geev dat in de Johren 1785, 1799, 1847, 1852, 1857 un 1951. Bi den Utbrook an’n 2. April 1995 hett sik in’n Westen vun den Pico de Fogo en ne’en Nevenkegel billt, de den Naam Pico Pequeno kregen hett un en Hööch vun 1950 m hett. Na 19 Johren is de Vulkan an’n 23. November 2014 wedder utbroken – an de glieken Steed as 1995[2].

Blick in de Caldera vun’n Pico de Fogo

En groten Deel vun dat Kraterrebeet is as Naturschuulrebeet utwiest. Dat is mööglich, na den Krater hooch to klattern, ok för Lüüd, de sik dormit nich sünners goot utkennt. De Tour is aver ’n Stück Arbeit un dröff ok blots mit en kunnigen Bargföhrer maakt warrn. An’n Rand vun dat Naturschuulrebeet warrt de fruchtbore vulkaansche Bodden to’n Anbo vun Wien un Kaffee nütt. Beids gellt as Spezialitäten vun de Kapverden.

Borns[ännern | Bornkood ännern]

  1. Kapverdische Inseln, Dumont Reisetaschenbuch, 3. Oplaag, 2007, ISBN 978-3-7701-5968-0
  2. Vulcao do Fogo entra em erupção – Bericht över den jüngsten Utbrook op bravanews.com an’n 23. November 2014; afropen an’n 23. November 2014

Websteden[ännern | Bornkood ännern]

Commons-logo.svg Fogo. Mehr Biller, Videos oder Audiodateien to’t Thema gifft dat bi Wikimedia Commons.



Koordinaten:14° 57′ N, 24° 21′ W