Palmeira (Kap Verde)

Fischerhaven in Palmeira

Palmeira is en Oort un Haven op dat tomeist wöstenoordig Eiland Sal in de Republiek Kap Verde.

In Palmeira liggt an en schuulte Bucht de Hööfthaven vun Sal, över den all de Woren un Göder na dat Eiland rinkommt, de nich mit’n Fleeger transporteert warrn künnt. Dat gellt sünners ok för den Drievstoff för de Flaagsellschoppen. De Oort liggt an de Westküst vun’t Eiland ungefähr 4 km wiet weg vun Espargos, de Hööftstadt vun Sal, un ruchweg op lieke Hööch.

Apentlich Toilett in’n Karn vun Palmeira

Palmeira is nich sünners fein antokieken vun wegen Bowarken as grote Ööltanks, Warften, smuddelige Havenanlagen un Lagerhallen, un ok de Strand, de sik süüdlich vun’n Oort ansluten deit warrt nich sauber hollen. Blangen den Hööfthaven leegt in de Bucht ok noch de Scheep vun de Fischers. In’n Noorden warrt en poor Windrööd bedreven, de den bestännigen Passatwind utnütten doot, üm dorut Stroom to tügen.

De Karn vun Palmeira is noch wat oorsprünglicher un egener. Dor gifft at t. B. de antike Markthalle, de noch goot in Schuss is un de vun de Buern ok noch to’n Verhökern vun jemehr Fleesch un Grööntüüch bruukt warrt. Bito gifft dat, as dat in Havenöörd begäng is, ok de een oder annere Bar und Spelunke in de engen Straten vun’n Oortskarn. In’t Achterland vun Palmeira liggt en gröne Oaas, woneem de Bewahners versökt, mit en beten Landweertschap klor to kamen und sik jemehrn Ünnerhollt to verdenen. De enzig faste Straat geiht na Espargos. Wieter na’n Süüden rünner föhrt en Sandpist na den Strand Praia Fontana. En annere Sandpist geiht wieter na Noorden un föhrt na Buracona. Dat en vun Touristen geern besochten Oort an de Küst, woneem en natürlich tostannen kamend Becken in den vulkaansch Basaltfelsen to finnen is.

Bornen

Kapverdische Inseln, Dumont Reisetaschenbuch, 3. Opl., 2007, Ostfildern, ISBN 3-7701-5968-3