Buracona

Vun Wikipedia
Wesseln na: Navigatschoon, Söök
De Felsinsnitt na de See

Buracona is en natürliche lütte Bucht an de Westküst vun dat Eiland Sal in de Republiek Kap Verde.

Buracona liggt nöördlich vun de Havenstadt Palmeira in den unbewahnten nöördlichen Deel vun’t Eiland. De Küst is an de Steed teemlich groff. Se besteiht ut swarte Basaltsülen, de an de Steed bit to fief Meter hooch över’n Seespegel hoochreckt un to’n Deel verweddert sünd. De Steensülen sünd de Tügen vun’t Entstahn vun dat Eiland Sal un ok den Rest vun de Republiek Kap Verde, das all de Eilannen dör Vulkanismus vun en Hotspot tostannen kamen sünd. De Basalt is dor as fletig Lava bit an de Böverflach kamen un dor denn teemlich gau afköhlt. Dorbi billt sik de för den Basalt tyypschen fief- bit achteckigen Sülen.

Dat sünnere an Buracona is nu aver, dat de Küst an disse Steed en Insnitt in’t Binnere vun’t Land hett, de op natürlichen Weg entstahn is. Op dissen Weg hebbt sik dor twee Waterbeckens billt, de op ünnerscheedlich Hööch leegt. Wiel dat butere Becken na’n Atlantik hen apen is, liggt dat tweete Becken wat höger un hett keen direkt Verbinnen na de apene See. As nu aver de Bülgen vun’n Atlantik gegen de Küst slaht, pülscht jümmer wedder frisch Water in dat bövere Becken. To glieken Tiet sorgt de starke Seegang aver ok dorför, dat sik dor keen Seeswienegels un annere gefährliche Seedeerten innestelt.

Frischwater kummt dör den Bülgenslag in’t bövere Becken

Op de Wies billt Buracona en natürlich Swemmbad, woneem man baden und swemmen kann ahn Gefahr to lopen, op gresige Beester to pedden, vun den Seegang gegen de Felsen smeten to warrn oder vun de Strömen rutdreven to warrn. Togliek kann een in de sünnerliche Felslandschap un ok de een oder annere Höhl rümklattern, wat en Afwesseln to’n Stranduralub dorstellen kann. Buracona tellt dorüm to de touristisch intressanten Öörd op dat Eiland, dat anners meist blots ut Halfwööst besteiht un blangen de feinen Sandstrännen nich so veel to wiesen hett.

Hentokamen is dor aver nich so eenfach, wieldat na Buracona keen faste Straat föhren deit. Dat gifft blots en poor Sandpisten, wovun een vun Palmeira ut meist an de Küst langs na Noorden to föhrt. En annere Möglichkeit is vun Espargos ut na Noroden to föhren un denn na Westen aftobögen. An’n besten is dat, sik ’n Miettaxi (Aluguer) to nehmen. Blangen de Landdschap gifft dat in Buracona nix wieter. Minschen leeft dor nich, blots en lütten Ünnerstand, woneem een sik as Tourist mol in’n Schadden setten un wat to drinken köpen kann.

Websteden[ännern | Bornkood ännern]

Commons-logo.svg Buracona. Mehr Biller, Videos oder Audiodateien to’t Thema gifft dat bi Wikimedia Commons.



Koordinaten:16° 48′ N, 22° 60′ W