Ollnborgische Landschap

Rebeed in Neddersassen, för dat de Ollnborgische Landschap tostännig is

De Ollnborgische Landschap is en Vereen van't apentliche Recht mit den gesettlichen Updrag, bi de Pleeg un dat Stütten van de historischen un kulturellen Belangen van dat ehrmalige Land Ollnborg mittohölpen.

Tostannkamen is de Ollnborgische Landschap ut de 1961 grünnte Ollnborg-Stiftung. Dat weer en Vereen van't börgerliche Recht. To dat Grünnen van de Ollnborg-Stiftung keem dat dör verschedene Anstalten, de to'n Deel ok dör dat Inrichten van dat Bundsland Neddersassen in Gang kamen weern.

Bit 1946 weer dat Land Ollnborg en sülvstännigen Staat wesen, un de Afordenten van'n Ollnborger Landdag föddern in ehre leste Sitten an'n 6. November 1946 utdrücklich, dat ene Sülvstverwalter-Organisatschoon för dat Ollnborger Land inricht weern muss. De Versöök, enen kommunalen Rebettsverbund to grünnen, sloog 1954 fehl in'n Neddersassischen Landdag, aver dat Volk harr wieterhen den Wunsch, de historische un kulturelle Egenstännigkeit van dat Ollnborger Land to bewahren un wieter uttoformen. So keem dat denn letzenns to de Gründung van de Ollnborg-Stiftung.

De Arbeitsgemeenschap van de Ollnborger Landkreisen harr 1960 den Anfang maakt un darto upropen, en Utschuss intorichten, de mit all mögliche Institutschonen, Gruppen un Verenen van't Ollnborger Land Grundfragen bespreken un ene Setten utarbeiden schull. De Sinn van disse Stiftung weer, all de ollnborgschen kulturellen Besträven un Inrichtungen, de nich staatlich sünd, tosamentofaten un to plegen.

De Diskuschoon um de Rebeetsreform un dat Inrichten van den Regeerbezirk Weser-Ems föhr darto, dat sik de Landkreisen, de Städer un Gemeenden mit ene gemeensame Resolutschoon för de Verbeterung van de Rechten van de Ollnborg-Stiftung insetten deen. An'n 27. Mai 1974 besloot denn de Neddersassische Landdag dat Gesett över de Ollnborgische Landschap as Institutschoon van't apentliche Recht. De Ollnborg-Stiftung gung in disse Inrichtung up. To dat Arbeitsfeld van de Ollnborgische Landschap höört de Landkreisen Ammerland, Cloppenborg, Freesland, Ollnborg, Vechta un Wersermasch un de Städer Ollnborg, Demost un Willemshaven.