Nicolaus von Borstel

Vun Wikipedia

Nicolaus von Borstel (* 17. November 1885 in Stood; † 5. November 1963 ok dor) weer en düütschen Politiker von de SPD.

Von Borstel is 1885 in Stood boren un hett Discher lehrt. 1905 is he Maat von de Fre’e Gewerkschaft worrn. Von 1906 bet 1908 hett he sien Plichtdeenst bi’n Kommiss afleist. In de SPD is he 1910 ringahn un weer teihn Johr lang Vörsitter von’n Bezirk Ünnerelv in de SPD.

Von 1914 af an weer he Vörsitter von’n Oortsutschuss Stood von dat Gewerkschaftskartell un von 1915 bet 1919 Soldaat in’n Eersten Weltkrieg. Na dat Enn von’n Krieg is he 1919 Geschäftsföhrer von’n Konsumvereen Stood worrn. Later weer he Maat von dat Börgervorsteherkollegium Stood. Von Borstel weer von 1919 bet 1933 Maat von’n Hannöverschen Provinziallanddag. 1924 is he ehrenamtlichen Senater in Stood worrn und weer von 1926 bet 1929 Maat von’n Bezirksutschuss. Von 1926 af an weer he Geschäftsföhrer von de Allgemene Oortskrankenkass. 1929 is he in de Provinzialregerung beropen worrn un he weer von 1929 bet 1933 besoldt Senater un Viez-Börgermeester in Paane. Nadem de Natschonalsozialisten 1933 an de Macht kamen sünd, is von Borstel von wegen politische Untoverlässigkeit rutsmeten worrn is un kort ok in Schutzhaft kamen. Von 1933 bet 1934 harr he keen Arbeit, is denn aver von 1934 bet 1938 Baas von en Marken-Mellkverdeelstell.

Von 1938 bet 1939 harr he wedder keen Arbeit un is denn in’n September 1939 as Anstellten bi dat Finanzamt Stood in Deenst kamen. 1944 hebbt se em wedder in Haft nahmen. Von wegen Haftunfähigkeit is he ut de Haft in dat Arbeitserziehungslager Farge wedder rutkamen. In’n Februar 1945 is he noch wedder kort verhaft worrn.

Na’n Tweten Weltkrieg weer he Baas von de Stadtwarken Stood. Von 17. Januar bet 14. November 1946 weer he kort von de Allieerten insett Börgermeester von Stood. 1946 is he bi de eersten demokraatschen Wahlen na’n Tweten Weltkrieg as Landraad von’n Landkreis Stood wählt worrn. Bi de nächsten Wahlen 1948 hett he denn aver verloren un müss dat Amt as Landraad an Peter Tobaben von de Düütsche Partei afgeven. In’n Stadtraad von Stood weer he von 1946 bet 1952.

Von Borstel weer Maat von’n ernannten Hannöverschen Landdag von’n 23. August 1946 bet 29. Oktober 1946. In düsse Tied weer he Vörsitter von’n Utschuss för innere Verwaltung. He weer denn ok Maat von’n ernannten Landdag in Neddersassen von’n 9. Dezember 1946 bet 28. März 1947.

Von Borstel weer in de 1. bet 3. Wahlperiood (20. April 1947 bet 5. Mai 1959) Maat von’n Neddersassischen Landdag.

Literatur[ännern | Bornkood ännern]

  • Barbara Simon: Abgeordnete in Niedersachsen 1946 - 1994 : biographisches Handbuch, 1996, Sied 47