Nederlandse Hervormde Kerk

Vun Wikipedia
Wesseln na: Navigatschoon, Söök

De Nederlandse Hervormde Kerk (Nedderlannsche Reformeerte Kark) weer vun 1816 af an de Naam för de Nedderdüütsch Reformeerte Kark (Nederduits(ch) Gereformeerde Kerk), de in de Tieden vun den Achtigjöhrigen Krieg de offizielle Kark vun de Republik vun de Seven Vereenigten Nedderlannen wurrn weer. 1816 is de Naam vun düsse Organisatschoon ännert wurrn. An’n 1. Mai 2004 is de Nedderlannsche Reformeerte Kark upgahn in de Protestantsche Kark in de Nedderlannen (PKN).

Historie[ännern | Bornkood ännern]

Na de Franzosentiet is Willem I. König vun de Nedderlannen wurrn. Toeerst güng dat dor bi üm de nöördlichen Nedderlannen, man later üm en grötter Land, dat Vereenigte Königriek vun de Nedderlannen. König Willem I. befaat sik ok mit Fragen vun de Kark. He leet vör de Nedderlannsche Reformeerte Kark en Karkenordnung schrieven. An’n 7. Januar 1816 wurr dat Algemeen Reglement voor het bestuur der Nederlandsche Hervormde Kerk in het Koningrijk der Nederlanden (Algemeen Reglement för dat Leid vun de Nedderlannsche Reformeerte Kark in dat Königriek vun de Nedderlannen) vun den König för goot ansehn. Dor kreeg nu de Kark den offiziellen Naam Nedderlannsche Reformeerte Kark (man ok Nedderdüütsch Reformeerte Kark).

En bannige Tahl vun Liddmaten vun de Kark menen nu, dat weer en Rinregeern vun den König in de Kark ehr Angelegenheiten un dat gehöör sik nich. Besunners in de Universität vun Leiden is Wedderstand dorgegen upstahn.

Vunwegen sien Wedderstand dorgegen, wie de Saak lopen dö, is an'n 19. Dezember 1833 de Prediger vun Ulrum, Hendrik de Cock, afsett wurrn. De Bewegen, de dor denn vun utgahn is, warrt Afscheiding (Ut’nannergahn) nömmt. An'n 13. Oktober 1834 is düsse Afscheiding denn offiziell künnig maakt wurrn. An en Reeg vun Öörd in de Nedderlannen sünd dormols Predigers ut jem ehr Amt afsett wurrn oder ok in’t Kaschott kamen.

1886 hett dat denn noch mol en Ut’nannerbreken in de Nedderlannsche Reformeerte Kark geven. Dat weer de „Doleantie“ ünner dat Leit vun Abraham Kuyper. He weer Predikant in Amsterdam un scholl later Ministerpräsident vun de Nedderlannen weern. Ut düt Afspletsel un en Tohopengahn mit Karken, de na de Afscheiding vun 1834 grünnt wurrn weern, sünd denn de „Ooltreformeerte Karken in de Nedderlannen“ (Gereformeerde Kerken in Nederland) wurrn.

An’n 12. Oktober 1864 kemen to Utrecht 69 Predigers un 50 Karkenöllste un –liddmaten tohopen un maken en Vereen up, de Gemeenden un Lüde, de vunwegen den Gloven in Noot kamen weern, Hülp un Leid an to beden. De Naam vun düssen Vereen weer de „Confessionele Vereniging“. De gellt jummers noch as en wichtige Grupp binnen de hüdige Protestantsche Kark in de Nedderlannen.

1906 is denn de „Reformeerte Bund“ upmaakt wurrn. Dat is en Grupp, de bi den olen Gloven blieven will un de sik stracks gegen jedet Afspleten vun de Kark un besunners ok gegen freesinnige Ansichten stellt. Grünnt wurrn is düsse Grupp vun Lüde, de vördem al Liddmaten bi de „Confessionele Vereniging“ ween sünd.