Naruto

Vun Wikipedia
Wesseln na: Navigatschoon, Söök

Naruto is en japaanschen Fantasy-/Aventüür-Manga, to den dat ok en Anime-Reeg gifft. Sik utdacht hett dat Kishimoto Masashi.

De eerste Utgaav keem in’n August 1997 in Akamaru Jump rut. Denn hett Kishimoto de Geschicht aver noch wedder ümschreven un in de hüdige Form bröcht. Vun 1999 af an keem de Reeg denn in dat Magazin Shonen Jump bi’n Verlag Shueisha rut. De engelsche Utgaav kummt bi Viz Media rut. De eerste Anime-Reeg (Naruto) harr an’n 3. Oktober 2002 Premier un leep bet 2007. De twete Reeg (Naruto: Shippūden) harr an’n 15. Februar 2007 Premier.

De Manga hannelt vun en wat hyperaktiven Jungkeerl, de Ninja lehrt un vun Anerkennung dröömt un dat he enen Dag to’n Baas vun een vun de fief Ninja-Dörper (to’n Kage oder Schadden) opstiggt. As Naruto en lütt Jung weer, do dee de Negen-Steerten-Voss-Dämon sien Dörp angriepen. De Kage vun sien Dörp kunn mit knappe Nood den Angreep afwehren un den Dämon in Naruto bannen, de dat Wesen nu in sik bargen dee. De Dörpslüüd wullen nu mit Naruto nix mehr to doon hebben, denn se weren bang vör den Dämon, de in em sitt. Dorvun wasst Naruto temlich eensam op. Dat föhrt dorto, dat he sik vörnimmt, sik Ansehn as Ninja to verschaffen. Naruto geiht op de Ninja-Akademie un warrt dor Team 7 todeelt. To dat Team höört ok Sakura Haruno un Sasuke Uchiha, de siene Frünnen warrt. De Reeg folgt nu de Aventüürs vun disse Grupp.