Naprodukschoon

Vun Wikipedia
Wesseln na: Navigatschoon, Söök

De Naprodukschoon oder Postprodukschoon faat all Schreden vun den Arbeitsafloop tosamen, de bi’t Nabearbeiten vun Film-, Feernseh- un Musikprodukschonen as ok in de Fotografie maakt warrt.

Naprodukschoon in de Filmkunst[ännern | Bornkood ännern]

Hööftartikel: Naprodukschoon (Film)

To de Postprodukschoon bi’n Film höört vör allen de Filmsnitt, de ut de enkelt dreihten Szenen en Geschicht tosamenföögt, de digitale Nabearbeiten vun de Biller an’n Reekner as ok dat Ünnermolen vun de Bilder un Szenen mit Musik. De Arbeitsafloop in de Naprodukschoon kann bannig ünnerscheedlich wesen vun Film to Film un hangt vun dat Material af, op dat dreiht worrn is, wo groot de Andeel vun Reeknereffekten is, un wat dat Endprodukt is, dat herstellt warrn schall.

Naprodukschoon in de Fotografie[ännern | Bornkood ännern]

En Naprodukschoon is ok bi’t Fotograferen nödig un översnitt sik in eenige Deelen mit de Bildbearbeiten. Na’t Digitaliseren vun’t Bildmaterial warrt in de Postprodukschoon Retuschen, Farvkorrekturen, Bildoptimeren un annere Saken maakt. Disse Afloop höört to jede professchonelle Foto-Arbeit dorto. De gröttsten Korrekturen gifft dat in’t Rebeet vun de Warf-, Beauty- un Kosmetik-Fotografie, woneem all Pixel naarbeit warrt. Dorbi warrt de Ogen, de Mund, dat vullstännige Hoor un de hele Huut nee afbillt.

Naprodukschoon in de Musik[ännern | Bornkood ännern]

Bi Musikopnahmen höört dat Afmischen un dat Mastering to de Naprodukschoon (Toongestalten). Dat Mastering befaat sik dorbi üm de afsluten Bearbeiten un utwählte Toonsporen un jemehr utbalanceerte Tosamenfögen to en Eenheit, dat as Summensignal betekent warrt. Sünners in de Pop- un Rockmusik warrt dorbi mit Soundeffekten un annere Techniken arbeit, de dat Klangbild so ännert, dat de Tohörers de Musik as schöner opfaten doot. Dat Master(band) dennt as Grundlaag to’n Herstellen vun de Toondrägers.