Lungenkreisloop

Vun Wikipedia
Wesseln na: Navigatschoon, Söök
De Lungenkreisloop an’t Hart

De Lungenkreisloop is de Deel vun’n Bloodkreisloop, de dat Blood vun’t Hart na de Lung un wedder torüch transporteert. De annere Deel warrt as Liefkreisloop betekent un is för’t Verdelen vun’t suerstoffrieke Blood in’n helen Lief tostännig.

Bi den Lungenkreisloop warrt dat suerstoffarme (venöse) Blood vun de rechten Hartkamer över den Lungenstamm (Truncus pulmonalis) afföhrt. Disse Stamm deelt sik in de rechte und de linke Lungenarterie (Arteria pulmonalis), de sik denn in de beiden Lungenflögels vertwiegt. In de Lungen kummt dat to’n Gasuttuusch. Dat Blood gifft Kohlenstoffdioxid (CO2) af un nimmt Suerstoff op (O2).

Dat suerstoffrieke Blood warrt nu över mehrere Lungenvenen (Venae pulmonales) wedder torüch na’t Hart, nipp un nau na den linken Vörhoff bröcht. Neven de Lungenarterien warrt de Lung ok dör Bronchialarterien versorgt, de de Lung mit suerstoffriek Blood ut de Afgäng vun de Aorta versorgt.

Bi den Fetus gifft dat vun den Truncus pulmonalis na de Aorta en Verbinnen, de Ductus arteriosus nöömt warrt. Butendem gifft dat dor noch en Apen twüschen den rechten un linken Vörhoff, dat Foramen ovale. Disse beiden Verbinnen sluut den Lungenkreisloop wietgahen kort. De warrt bi’n Fetus noch nich bruukt, wiel de Lung jo noch nich belüft warrt.