Laurens Hammond

Vun Wikipedia
Wesseln na: Navigatschoon, Söök

Laurens Hammond (* 11. Januar 1895 in Evanston, Illinois, USA; † 3. Juli 1973) is en Geschäftsmann ut de USA ween. He hett de Hammond-Orgel utklambüstert.

Siene eerste Orgel, de Hammond Modell A, is an'n 24. April 1935 mit de eerste Symphonie vun Johannes Brahms to'n eersten Mol vör de Lüde speelt wurrn. Nipp un nau bekeken, höört de Hammond-Orgel gor nich to de Orgeln to. Se hett gor keen Piepen un funkscheneert uo de Grundlaag vun en Elektromotor, den Hammond utfunnen harr.

Hammond siene Familie hett vun 1898 bit 1909 in Europa leevt un twaars in Genever, Dresden un Paris. As he torüchkeem na Amerika konn Hammond nich bloß Engelsch, man ok Düütsch un Franzöösch leifig snacken. He studeer an de Cornell University un hett sien Afsluss 1916 kregen.

Achternah is he na Detroit umtrocken un hett dor för de Gray Motor Company arbeit'. Dat weer en Bedriev, de Motoren för de Marine herstellen dö. 1920 hett he dor de Klock mit en sinnigen Feddertog utfunnen. Dat hett em so veel Geld inbrocht, datt he siene Firma verlaten konn. He güng denn na New York un hett dor in Privatarbeit wieter an Motoren un annere Saken rumtüdelt un hett an'n 19. Januar 1934 dat Patent för de Hammond-Orgel anmellt. Alltohopen hett Hammond in sien Leven 110 Patente kregen.