Lancashire

Vun Wikipedia

Lancashire [[ˈlæŋkəʃər]] is en Graafschop in England, an de Irische See. De Graafschop grenzt an de Countys Cumbria, North Yorkshire, West Yorkshire, Greater Manchester un Merseyside un an de Kuntreien vun Blackpool un Blackburn with Darwen, de to keen Graafschop tohören doot.

Lancashire as ole Graafschop vun England

Vor de Reform vun de Gemarken in England vun 1974 grenz de Graafschop noch an Cumberland, Westmorland, Yorkshire un Cheshire. Man dat Gemark is wat lüttjer maakt wurrn. So scholl dat mit de Verwaltung beter lopen. Vun den 1. April 1974 af an höört dat Gemark vun Furness (dat vörmolige Gemark vun Lancashire nöördlich vun Morecombe Bay) to de Graafschop Cumbria, de nee indeelt wurrn is. Deele in'n Süüdosten sund an Greater Manchester gahn, annere Deele in'n Süüdwesten sund to Merseyside wurrn. De Stadt Warrington un de Kreise dor umto mit de Öörd Winwick, Croft, Risley un Culcheth sund an Cheshire anslaten wurrn. Anners rum is en Deel vun dat West Riding vun Yorkshire, nich wiet af vun Clitheroe an Lancashire anslaten wurrn. 1998 sund Blackpool un Blackburn with Darwen egen Gemarken wurrn, de nich to de Graafschop tohören doot (Unitary Authorities), man for Gelegenheiten vun dat Protokoll un wenn dat dor um geiht, Gefohren af to wennen, sund se doch bi Lancashire bleven. De Graafschop is updeelt in en Reeg vun Distrikte. Dor hannelt sik dat um Chorley, Fylde, Hyndburn, Lancaster, Pendle, Preston, Ribble Valley, Rossendale, South Ribble, West Lancashire un Wyre bi. In dat Johr 2000 is taxeert wurrn, datt um un bi 1.429.450 Minschen in Lancashire leven. De Naam Lancashire sett sik tohopen ut Lancaster un shire.

Weblenken[ännern | Bornkood ännern]