Labskaus

Labskaus is een Eten vun de Waterkant. Is ok good op’n Schipp to eeten. All de Saken, de een dorto bruukt, kanns op Vorrat holln. Weer al fröher so. Un kanns ok bieten, wenn du keen Teihn mehr in’t Muul hest.

Labskaus is ut Kantüffelmus un Pökelfleesch. Allens schöön lütt dörchdreiht. Dormit dat beter smeckt, kümmt dor ok noch Zibbeln rin un Peper un Solt. Rode Beete kann rin, aver beter is dat dorbi. Suure Gurken höört dorbi, Spegelei doröber. Fisch kümmt nich rin, tominns na Hamborger Oort. An de Ostsee un in Däänmark un Sweden doot se dat aver af un an doch. Fisch mutt aver doch dorto, un twors ’n schönen suurn Heern (Bismarck-Heern). Kanns ok en Rullmops nehm. Dorto hüürt ok en kolen Kööm, dat gifft Lüüd, de seggt: Dat is dat Wichtigste vun’n Labskaus.

Ok bi de Süüdlanners hett Labskaus intwüschen Frünnen funnen. To’n Bispeel de ool Bunneskanzler Helmut Kohl. De harr dat nich blots mit den Pälzer Saumagen, nee, ok mit den Labskaus. Tominns wenn he mal na de Waterkant keem.