Konstantin II. (Schottland)

Vun Wikipedia
Wesseln na: Navigatschoon, Söök
Konstantin II.

Konstantin II. (Causantín mac Áeda; * um 874; † 952 in St Andrews) weer König vun Schottland vun 900 bit 942 oder 943. He weer König Aedh sien Söhn, dorto de Vedder vun Donald II., de vör em König weer, un de Oom vun Malcolm I., de em folgen dö. Konstantin hett de tweetlängste Tied vun al schottsche Königen up'n Throon seten. He hett denn Bott geven, vunwegen dat he as Mönk leven woll.

Konstantin wehrt de Wikingers af[ännern | Bornkood ännern]

Al to Anfang vun siene Herrschop möss he gegen Roovtöge vun de Wikingers in'n Noorden un in'n Westen gegenan gahn. Na sien groten Sieg in de Slacht vun Scone mössen de Wikingers Schottland verlaten. Man wiethen harrn se al dat Land in'n Dutt leggt. Later güngen de Kriegen un de Striet fudder in de Region Northumberland. Dor harrn sik denn wedder Wikingers unner jem ehren König Ragnall fastsett. Konstantin hett jem 914 un 918 in twee Slachten unnerkregen. Düsse Slachten dreegt den Naam vun de Slachten vun Corbridge. Dor harr he de Wikingers endgüllig vun siene Grenzen mit verdreben.

Wat he sünst noch maakt hett[ännern | Bornkood ännern]

Wenn he nich unnerwegens weer gegen de Wikingers, denn so reformeer he de Kark in Schottland. Bavenhen hett he in sien Land den Titel vun en Grafen inföhrt, dat weern de so nömmten Mormaer. Konstantin hett sik ok en Fro nahmen, man de ehr Naam un de Tied, wannehr dat woll weer,, weet hüdigendags nümms mehr. Man dat is bekannt, dat he twee Söhns un ene Dochter harrt hett.

Dat Johr 937[ännern | Bornkood ännern]

Siene Dochter hett 937 den Wikingerkönig vun Dublin heiraat. Dat weer Olaf III. Guthfrithson. Ok de Naam vun düsse Dochter is nich bekannt. Ut düsse Ehe stammt tominnsten dree Kinner. In datsülvige Johr keem vun'n Süden her de engelsche König Æthelstan mit siene Truppen un slöög de Schotten in de Slacht vun Brunaburh. Dor is Cellach, een vun Konstantin siene Söhns, bi ümkamen.

De König warrt Mönk[ännern | Bornkood ännern]

942 oder 943 hett Konstantin Bott geven un Malcolm I. is de nee König wurrn. He hett sik süms torüch tagen in en Klooster in St Andrews. Dor is he later Abt in wurrn. Storven is he 952 an en natüürlichen Dood. He is woll in dat Klooster inkuhlt wurrn. Sien eenzig Söhn, de noch leven dö, dat weer Indulf, is twee Johr later König wurrn.

Weblenken[ännern | Bornkood ännern]