Kai Seefried

Vun Wikipedia
Kai Seefried 2018

Kai Seefried (* 23. Januar 1978 in Stood) is en düütschen Politiker von de CDU. He is siet 2008 Liddmaat von’n Neddersassischen Landdag.

Seefried is in Aßel grootworrn. He is verheiraadt un hett een Kind. He hett an de Elvmaschenschool in Drochters de Realschool afslaten un denn von 1995 bet 1997 en Lehr as Discher in en Möbelhuus in Bützfleet maakt. 2002 hett he sik as staatlich prüüften Holttechniker wiederbillt un hett 2003 sien Meester maakt. 2005 is he denn mit en Studium as Bedrievsweert (HWK) trech worrn.

Seefried is 1996 in de Junge Union gahn un weer von 1997 af an in de CDU. 2003 is he Vörsitter von de CDU in de Gemeen Drochters worrn. Von 2004 bet 2009 weer he de Viez-Vörsitter von de CDU in’n Kreis Stood. 2009 is he denn eersten Vörsitter worrn.

Vör de Landdagswahl 2008 in Neddersassen hett he sik in en Kampfabstimmung gegen Karsten Behr as Kannedaat för den Wahlkreis Wahlkreis 56 Stood dörsett un hett bi de Wahl an’n 27. Januar 2008 denn 50,4 Prozent von de Eerststimmen kregen[1]. He is Maat von’n Utschuss för Ümwelt un Klimaschutz[2] un in’n Ünnerutschuss „Havens un Schipperee“ von’n Utschuss för Weertschop, Arbeid un Verkehr.[3] In de Utschüss för Weertschop, Arbeid un Verkehr, för Wetenschop un Kultur un in’n Kultusutschuss is he as Viez in.[4]

Bi de Kommunalwahlen an’n 9. September 2001 is Seefried as Raadsmann in’n Raad von de Gemeen Drochters wählt worrn. Bi de Wahlen an’n 10. September 2006 hett he sien Seet denn noch wedder verdeffendeert un is Viez-Börgermeester un Vörsitter von de CDU-Fraktion worrn.

Bi de Landdagswahl 2013 in Neddersassen hett he den Wahlkreis 56 Stood mit 50,0 % von de Eerststimmen wunnen un is wedder in’n Landdag von Neddersassen rinkamen.

Footnoten[ännern | Bornkood ännern]

  1. http://www.nls.niedersachsen.de/LW2008/056.htm
  2. http://www.landtag-niedersachsen.de/organisation/umwe.asp
  3. http://www.landtag-niedersachsen.de/organisation/h%E4fe.asp
  4. http://www.tageblatt.de/main.cfm?DID=1114608

Weblenken[ännern | Bornkood ännern]

Kai Seefried. Mehr Biller, Videos oder Audiodateien to’t Thema gifft dat bi Wikimedia Commons.