June Carter Cash

Vun Wikipedia
Wesseln na: Navigatschoon, Söök

Valerie June Carter Cash (* 23. Juni 1929 in Maces Spring, Virginia; † 15. Mai 2003 in Nashville, Tennessee) weer een US-amerikaansche Country-Sängersche un Ledermakersche.

Anfang[ännern | Bornkood ännern]

June Carter weer de Dochter vun Ezra un Maybelle Carter. As een Liddmaat vun de Carter Familie stünn se up de Speeldeel al, as se eerst ölben Jahr oolt weer. 1943 is se weggahn vun de Showfamilie un hett för korte Tiet as Schauspelersche arbeit. Dat duur aber nich lang, dor keem se torüch nah de Musik. Up de Speeldeel hett se faken Autoharp speelt.

Verheiraat[ännern | Bornkood ännern]

In de 1950er Jahren weer June Carter verheiraat mit den Country-Musiker Carl Smith. De beiden hefft tosamen de Dochter Carlene Carter harrt, de in de 1970er un 1980er Jahren de Tradition vun de Familie in de drüdde Generation fuddermaken dö. Man de Eh' mit Smith güng nich goot un dor hett Carter den Stockcar-Fahrer Edwin „Rip“ Nix heiraat. Ok de beiden hefft een Dochter kregen. Dat weer Rozanna Lea (Rosie), de 1958 up'e Welt kamen is. In dat Jahr 2003 al is Rosie sturben, vunwegen dat se toveel vun dat Gift Kohlenmonoxid afkregen hett.

Johnny Cash[ännern | Bornkood ännern]

June Carter Cash un Johnny Cash, 1969

Vun 1961 af an güng June Carter mit den beröhmten Country-Musiker Johnny Cash up Tour. In'n April 1963 bröch Cash dat Leed Ring of Fire rut. Schreven harr dat Merle Kilgore tohopen mit June Carter. Man so, as he dat arrangeert hett, mit de Mariachi-Trumpeten dorbi, is dat een Welthit wurrn. June Carter vertell in düt Leed vun Cash sien Sucht un ok dorvun, dat se em leev hett, wat aber doch nich angahn dröff, vunwegen dat de beiden to düsse Tiet jümmers noch mit anner Partners verheiraat weeren. Man leev harrt hefft se sik doch al lang.

June Carter hett sik lange Tiet nich up Cash sienen Wunsch inlaten, datt he ehr heiraten wull. Se wüß to veel vun sien Afhängigkeit vun Tabletten un Alkohol af. Man an'n 22. Februar 1968 fraag he ehr vör all Lüde up de Bühn in Ontario in Kanada, wat se em nich heiraden wull- un se sä: „Ja!“. De beiden hefft denn an'n 1. März 1968 in Franklin in Kentucky heiraat. 1970 keem de Söhn John Carter Cash up de Welt.

Eegen Karrier[ännern | Bornkood ännern]

June Carter Cash hett mit Johnny Cash tohopen arbeit, man se is ok fudderhen mit ehr Süsters tohopen upträden un hett ok an ehr Solo-Karrier arbeit. Noch 1999 hett se for Press on eenen Grammy kregen.

Dood[ännern | Bornkood ännern]

June Carter Cash is in dat Jahr 2003 sturben. Dat weer vunwegen een Operation an de Hartklappen. Dor weer se 73 Jahr oolt. Dat duur man bloß veer Monat, denn folg Johnny Cash ehr up.

Filmstriepen[ännern | Bornkood ännern]

In dat Jahr 2005 is een wunnerbar Filmstriepen dreiht wurrn öber ehr Leben un ehr Leevde to Johnny Cash. De Filmstriepen heet Walk the Line. De Rull vun June Carter hett Reese Witherspoon speelt. Se kreeg dor een Oscar för in de Kategorie „Best Schauspelersche in een Hööftrull“.