Joachim Slüter

Vun Wikipedia

Joachim Slüter (* üm 1490 in Döms; † 19. Mai 1532 in Rostock) weer en düütschen Geistlichen un Reformater.

Slüterdenkmal an de Petrikirch

Slüter weer de Söhn vun’n Fährmann Kutzer ut Döms an de Elv. De Vader is fröh al doodbleven un de Moder hett denn en Slüter heiraadt. Vun 1517 gifft dat den eersten Nawies, dat he in Rostock Preester weer. Vun 1518 af an is he an de Universität Rostock inschreven wesen. 1521 hett he an de St. Petri-Kirchspeelschool in Rostock arbeidt. 1523 is he dör Hertog Hinrik as Kaplan an St. Petri insett worrn.

De Stell weer al länger nich besett wesen, denn de Hertöög kunnen sik nich op en Nafolger eenigen. Slüter füng hier nu an, de Reformatschoon intoföhren. So hett he ok anfungen, op Plattdüütsch to preddigen. Bi de kathoolsche Kark keem Slüter dor nich good mit an. Mit Moord hebbt em welk sogor droht. 1525 is he een Tied ut de Stadt rut, so dul weer dat. De Raat vun de Stadt Rostock hett aver to em hollen. 1528 hett he Katharina Jelen heiraadt, de Dochter vun en Rostocker Smidd.

1525 hett Slüter en plattdüütschen Katechissen un Gesangbook rutgeven. 1526 is denn ok noch en Gebeedbook un 1530 en twete verbeterte Oplaag rutkamen. 1531 keem dat Dubbelte Gesangbook rut. Dor stünnen Luther sien Klugsch Gesangbook op Plattdüütsch un Leder, de he sülvst sammelt harr, in. 1531 is Rostock den offiziell evangeelsch worrn.

Slüter is op’n Kirchhoff vun St.-Petri begraven. An de Steed vun sien Graff is 1862 en Denkmal för em boot worrn un de Straat Vör dat Petridoor hett den Naam Slüterstraat kregen.

Warken[ännern | Bornkood ännern]

  • Ein gar schönes und sehr nützliches Gesangbuch: 1525. Eine schöne und sehr nützliche christliche Unterweisung: 1525. Rutgeven vun Gerhard Bosinski. Reprint vun de Original-Utgaav vun 1525. Zentralantiquariat der DDR, Leipzig 1986, ISBN 3-7463-0026-6

Literatur[ännern | Bornkood ännern]

  • Gerhard Bosinski: Das Schrifttum des Rostocker Reformators Joachim Slüter. Berlin: Evangelische Verlagsanstalt; Vandenhoeck und Ruprecht, Göttingen 1971, Diss., Univ. Rostock, ISBN 3-525-55332-3