Joachim Gauck

Joachim Gauck (2012)

Joachim Gauck fotografeert vun Oliver Mark, Berlin 2010

Joachim Gauck (* 24. Januar 1940 in Rostock) is en düütschen Publizisten un Mann, de Vördräge holen deit. Nadem he protestantsche Theologie studeert harr, is he eerst mol as Paster togange ween un is in de Tied vun dat Tosamenstörten vun de DDR as Mann bekannt wurrn, de sik för de Börgerrechte insetten dö. Vun 1990 af an is he tein Johre lang Bundsbeupdragten för de Stasi-Unnerlagen ween. Siet den 18. März 2012 is he as Präsident vun de Bundsrepubliek Düütschland Staatshööft in Düütschland. Siet dat Johr 2000 leevt he mit siene Fründin Daniela Schadt tohopen. In Juni 2016 hett he seggt, dat he nich noch mal för en tweeten Amtstiet antreeden will.

De Wenn un wat denn keem

Gauck is in de Tied vun de Wenne in de DDR in Rostock een vun de Anföhrers vun dat Ne’e Forum ween. In’n Summer 1990 hett de Volkskamer den Afordenten Gauck to’n Vörsitter vun den Sunnerutschuss to de Kuntrull vun de Uplösung vun dat Ministerium för den Staat siene Sekerheit (MfS)/Amt för Natschonale Sekerheit (AfNS) wählt Gauck is een vun de Lüde ween, de sik dor hauptsächlich för insetten döen, datt dat Stasi-Unnerlagen-Gesett in de Volkskamer tostanne kamen is. Mit dat Tostannekamen vun de Düütsche Eenheit an’n 3. Oktober 1990 is Gauck Baas vun de Bundsbehörde wurrn, de all Unnerlagen vun de Stasi verwalten deit un dor för sorgt, datt Lüde dor ok rankaamt. Na de twee Amtstieden, de hööchstens vörsehn weern, is he in’n Oktober 2000 vun Marianne Birthler aflööst wurrn. Vun dor af an höllt he Vördräge un is in de Medien unnerwegens, ok as Vörsitter vun de Vereenigung Gegen Vergeten – För Demokratie. He is een vun de Lüde, de de Prager Verklaren un de Verklaren över de Verbreken vun den Kommunismus tostanne bröcht hefft.

Gauck will Präsident weern

Nadem de Amtsinhebber Horst Köhler Bott geven harr, is Gauck vun de SPD un vun Bündnis 90/Die Grünen as Kannedat för dat Amt vun den Düütschen Bundspräsidenten upstellt wurrn. He hett avers bi de Wahlen an'n 30. Juni 2010 in'n drüdden Wahlgang gegen den Kannedaten Krischan Wulff vun de CDU verlaren.

Gauck warrt to'n Präsidenten wählt

Nadem Krischan Wulff vunwegen allerhand Schandaal Bott geven möss, hefft de Parteien, de in den Bundsdag sitt, an'n 19. Februar 2012 afmaakt, dat Gauck nu to'n Präsidenten wählt weern schall. Blot de LINKE is bi düsse Afspraak nich mit bi ween, vunwegen, dat se vun de annern Parteien nich inlaadt wurrn weer. An' 18. März 2012 wurr he denn vun de Bundsversammeln mit 991 Stimmen to'n elften Bundspräsidenten vun de Bundsrepubliek Düütschland wählt.

Belege

Bundspräsidenten vun de Bundsrepubliek Düütschland

Karl Arnold (komm.) | Theodor Heuss | Heinrich Lübke | Gustav Heinemann | Walter Scheel | Karl Carstens | Richard von Weizsäcker | Roman Herzog | Johannes Rau | Horst Köhler | Jens Böhrnsen (komm.) | Chrischan Wulff | Horst Seehofer (komm.) | Joachim Gauck | Frank-Walter Steinmeier