Jaquerie

Vun Wikipedia
Wesseln na: Navigatschoon, Söök

De Buurnopstand vun de Jaquerie weer en Opstand vun franzöösche Buurn in’t Johr 1358. Dat weer in’n Hunnertjöhrigen Krieg. Den Naam hett de Opstand vun den Ökelnaam Jacques Bonhomme för de franzööschen Buurn.

Dat Land weer to de Tiet temlich in’e Krise, vun wegen den Krieg, un den König Johann II. hebbt 1356 in de Slacht bi Poitiers de Englänners fangen nahmen, so dat in Paris blots de Statengeneral dat Seggen harr. Toglieks müssen de eenfachen Lüüd över jümmer mehr Stüern de Kosten vun’n Krieg opbringen. Un vun’n Februar an harr dat al de Revolt vun Etienne Marcel in Paris geven, de de Buurn wies, dat Wedderstand gegen de Mächtigen mööglich is. An’n 28. Mai 1358 hebbt sik bi Beauvais en poor Buurn un Suldaten in’e Wull kregen. Dat hebbt de ünnerdrückten Buurn to’n Anlaat nahmen, sik ünner Leid vun Guillaume Cale gegen de Herrschers optolehnen. In’n ganzen Noordoosten vun Frankriek (Haute Normandie, Picardie, Vermandois, Île-de-France, Champagne, Auxerrois Gâtinais, Brie) hebbt nu Buurn anfungen, de Göter un Slötter vun de Adeligen antogriepen, uttoplünnern, antostecken un mitünner de Adeligen optoknüppen.

Doch denn hett de Staatsmacht trüchslaan un in de Slacht bi Clermont an’n 10. Juni hett ene Armee ünner Karl II. vun Navarra de Buurnarmee slagen. Dorbi sünd woll üm un bi 7000 Buurn doodbleven. Ok Guillaume Cale is in’e Hand vun de Feudalherren fullen. De Opstand weer dormit vörbi. Doch för de Hogen Lüüd weer dat noch nich vörbi. Dat de Buurn dat nich noch mal wagen möögt, hebbt se de Buurn dat noch twee Weken lang trüchbetahlt. Nochmal 20.000 Buurn hebbt den Dood funnen.

De Opstand harr keen groot Programm un kene Strategie, blots de Woot op de Mächtigen hett se eent. Se hebbt nich op Guerillataktik, sünnern man op dat Belagern vun de festen Slötter as in Meaux un so as in Clermont op Feldslachten sett, doch dorbi kunnen se kenen Bestand gegen dat utbillte Militär hebben. Een anner Problem weer, dat de Stänn sik nich tohoopdoon müchen. Etienne Marcel un de Jaquerie hebbt eerst denn Kuntakt to de annern söökt, as dat Enn vun jemehr Opstänn aftosehn weer.