Inishmore

Vun Wikipedia
Inishmore is de gröttste vun de bewahnten Aran-Eilannen

Inishmore (op irisch: Árainn, Árainn Mhór oder Inis Mór; op plattdüütsch so veel as „Groot Eiland“) is en Eiland vun de Republiek Irland. Se höört to de Aran-Eilannen, de in de Galway Bay leegt un to’n County Galway tellt.

Geografie[ännern | Bornkood ännern]

Pielküst bi Dun Aengus

Dat Eiland is ruchweg 14 km lang un 3 km breed un liggt in’n Westen vun de bewahnten Eilannen. 2011 harr Inishmore 845 Inwahners[1]. As den annern Aran-Eilannen ok, liggt Inishmnore in en Gaeltacht-Rebeet, d. h. de Inwahners snackt vör allen Irisch. Kulturell tekent sik dat Eiland dör verschedene vör- un fröhchristliche Steden ut.

Inishmore warrt veel vun Touristen besöcht, de dat Eiland op Wannerweeg, mit’n Fohrrad oder ok mit en Peerkutsch ankieken künnt. Op dat Eiland kummt en mit Fährscheep vun Doolin oder Rossaveel ut, man ok mit’n Fleger is Inishmore mit dat irische Fastland verbunnen. Hööftoort is Kilronan, woneem ok de Fährhaven is. Dor gifft dat Hotels un eenfackere Slaapmööglichkeiten.

Historie un Bowarken[ännern | Bornkood ännern]

En Steenkrüüz ut fröhchristliche Tiet op Inishmore

Op Inishmore sünd de Dichter Máirtín Ó Direáin un de Schriever Liam O’Flaherty boren. An de Küst vun Inishmore schall Sankt Brendan in’t Johr 565 sien Curragh-Schipp boet hebben, as he över’n Atlantik op Fohrt gahn is (Navigatio Sancti Brendani).

Op’t Eiland sünd hütt mehr as dörtig vör- un fröhchristliche Fundöört opdeckt. Histoorsche Bowarken un Öörd sünd to’n Bispeel:

  • Ruin vun Arkyn’s Castle, en Borg ut dat 16. Johrhunnert
  • Dubh Cathair oder Dun Doocaher („dat swarte Fort“), en Promontory Fort
  • St. Eany’s Well un Church mit de Resten vun den Rundtoorn vun Turmartin, de in’t 19. Johrhunnert instört is
  • Na seacht Teampull („de söven Tempels“), Ruinen vun fröhchristliche Karken (St. Kierans Church, Kilchoran Church, Templebrecan, Templenaneeve – Church of the Saints, Temple Benen, Temple MacDuagh, Temple Soorney)
  • Immenkorfhütten as der Clochán na Carraige, de eenzig vullstännige op de Aran-Eilannen
  • Dun Aenghus, Dun Eochaill, Dun Onacht, bekannte Duns oder Steenforts
  • verschedene Dolmen (as de Oghil Wedge tomb) un Steenkrüzen.

Borns[ännern | Bornkood ännern]

  1. Table No. 11 Population of inhabited Islands off the coast, 2006 and 2011. In: Central Statistics Office (Rutgever): Population Classified by area. Dublin 2012, S. 132-133 (PDF-Datei; 3,64 MB)

Weblenken[ännern | Bornkood ännern]

Inishmore. Mehr Biller, Videos oder Audiodateien to’t Thema gifft dat bi Wikimedia Commons.