Ideologem

En Ideologem is en Ideologie-Partikel. Jede Ideologie is ut enkelte Ideologemen opboot, un jede Politik is jümmer vun Ideologie un Ideologemen bestimmt. So’n Ideologem warrt denn en besünner Bedüden tometen. Bi’n Natschonalsozialismus geev dat ünner annern de Ideologemen vun dat Führerprinzip un vun de besünnere Stärk vun dat germaansche Volk un de germaansche Rass. Ok de demonstreerte Stärk vun de Mass in Massenopmärsch harr en groot ideoloogsch Bedüden. In Frankriek to’n Bispeel hett sik mit de Franzöösche Revolutschoon dat Ideologem vun de Eenheit vun de Natschoon un vun de Spraak rutbillt. All Börgers vun Frankriek sünd Franzosen un all Franzosen schöölt enig de natschonale franzöösche Spraak snacken. Dit Ideologem warkt noch hüüt na, so dat överall in Frankriek de Regional- un Minnerheitenspraken as patois ansehn warrt, dat minner wat weert is as Franzöösch.

De Denker Michail Epstein hett den Begreep Ideologem ok för en Tyyp Wöör bruukt. Na Epstein gifft dat dree Soorten Wöör: Wöör, de Fakten beschrieven doot (Huus, Disch, gahn), Wöör, de Verschääl utdrückt (good, schöön, lecker) un as drüdde Grupp Wöör, de Fakten beschrievt un Verschääl utdrückt. Disse drüdde Grupp, dat sünd de Ideologemen. To’n Bispeel drückt de Utdrück sik solidarisch wiesen un en Block billen all beid den Fakt ut, dat tohoophollen warrt. Aver Solidarität warrt as wat Goods un Blockbillen as wat Slechts ansehn. Wenn een en Ideologem bruukt, denn versöcht he dat Verschääl vun de Tohörers oder Lesers al vörweg to nehmen.