IATA-Kood

Vun Wikipedia
Wesseln na: Navigatschoon, Söök

IATA-Koods sünd Koods in’n Tosamenhang mit de Flegeree, de vun de International Air Transport Association (IATA) vergeven warrt. Dormit warrt sünners Flaaghavens un Verkehrslannsteden, Flegertypen un Flaagsellschoppen afkört.

Bedüden[ännern | Bornkood ännern]

De IATA-Flaaghavenkood (eng.: IATA airport code) is en Kombinatschoon ut jümmer dree Bookstaven ut dat Alphabeth, de Verlehrslannsteden un Verkehrsflaaghavens eendüdig kennteken doot. So steiht to’n Bispeel ‚MUC‘ för den Flaaghaven München, ‚BER‘ för den Flaaghaven Berlin Brannenborg oder ‚AGB‘ för den Lannplatz Augsborg.

Bito gifft dat ok annere Verkehrsknuttens, as Bahnhööv oder Schippfährhavens, de en IATA-Flaaghavenkood toordent is, as to’n Bispeel ‚ZLP‘ för Zürich Hööftbahnhoff.

Bi Städer mit mehrere Flaaghavens warrt logische Koppels, so nöömte Metropolitan Areas mit en egenen Flaaghavenkood billt. De Metropolitan Area Berlin (‚BER‘) ümfaat to’n Bispeel de Flaaghavens Berlin-Schönefeld (‚SXF‘) un Tegel (‚TXL‘), as fröher ok noch den Flaaghaven Berlin-Tempelhof (‚THF‘). De Metropolitan Area ‚NYC‘ för New York City faat den John F. Kennedy International Airport (‚JFK‘), den Flaaghaven Newark (‚EWR‘) un den Flaaghaven New York-LaGuardia (‚LGA‘) tohopen; ‚LON‘ steiht för de Flaaghavens in’n Grootruum London. Disse Tosamenfaten vun mehrere Flaaghavens hett sien Sinn vör allen bi’t Reserveren vun Flöög, wenn dormit de Stadt vörgeven warrn schall, de naue Flaaghaven aver keen Rull speelt.

Blangen de Dree-Bookstaven-Koods för Flaaghavens gifft dat ok Kenntekens för Flegertypen, de ut dree alphanumerische Teken besteht, un för Flaagsellschoppen, de ut twee alphanumerische Teken tosamensett sünd.

Dat böverste Teel vun de IATA is, de Schreden bi’t Affardigen vun Passageren un Göder eenheitlich to maken. En Bispeel dorför is de Packelaasch, de bi’n Check-in mit den Kood vun’n Teelflaaghaven kenntekent warrt.

Opbo[ännern | Bornkood ännern]

Faken is de Kood licht to verstahn, as to’n Bispeel ‚FRA‘ för den Flaaghaven Frankfort an’n Main oder ‚LH‘ för Lufthansa, ok wenn de Afkörten vör allen vun de engelschen Schrievwies afleidt warrt (as ‚CGN‘ för Cologne = Köln). De Flaaghaven Pulkowo bi Sankt Petersborg hett den Kood ‚LED‘, wat op den fröheren Naam Leningrad henwiesen deit.

Bi grote Flaaghavens, de en markanten Egennaam hebbt, warrt disse Naam tomeist as Grundlaag för den Kood nahmen as to’n Bispeel ‚CDG‘ för den Flaaghaven Charles de Gaulle in Paris. Disse Methood warrt sünners anwennt, wenn sik Flaaghavens teemlich gliek anhören doot un dorüm ok in’n IATA-Kood licht to verwesseln weern. Man, dat gifft noch mehr Utnahmen. So hebbt to’n Bispeel all kanaadschen Grootflaaghavens en Kood, de mit ‚Y‘ anfangen doot, wiel eenige Bahnhööv mit en ‚Q‘ anfangt.

Bi de Flegertypen sünd de Koods ok tomeist licht to verstahn. Se bargt faken de naue Version vun’n Flergetyyp, as ‚733‘ för de Boeing 737-300 oder ‚342‘ för den Airbus A340-200.

Blangen den IATA-Kood hett sik wieter ok de ICAO-Flaaghavenkood dörsett, de ut veer Teken besteiht. De US-amerikaansche Federal Aviation Administration (FAA) vergifft för Flaaghavens in de USA tosätzlich en Dree-Bookstaven-Kood, de faken de glieken sünd as de IATA-Koods, man in en gröttere Tall vun Fäll ok afwieken doot.

Kiek ok[ännern | Bornkood ännern]

Weblenken[ännern | Bornkood ännern]