Hydroxyl-Grupp

Vun Wikipedia
Wesseln na: Navigatschoon, Söök

En Hydroxyl-Grupp (-OH, männichmal ok as Hydroxy-Grupp betekend) is en Begreep ut de Orgaansch Chemie. Dat is de funkschonelle Grupp von de Alkoholen un von de Phenolen, kummt aver ok bi Zuckermolekülen un – tohopen mit de Carbonyl- oder Sulfon-Grupp – as Carboxyl-Grupp in de Carbonsüürn oder as Hydroxysulfon-Grupp in Sulfonsüürn vör.

För dat Opkloren von de Struktur von en eenfach Alkohol (t. B. den Ethanol, de to’n Supen is) gifft dat en Experiment, bi dem Natrium to den Ethanol geven warrt. Dorbi entsteiht Waterstoff-Gas. Man kann meten, dat von jedet Molekül Alkohol een Waterstoff-Atom afgeven warrt. Dorut is op de Hydroxyl-Grupp sloten warrn, de as tyypsch Markmal von de Alkoholen ansehen warrt.

Dör de Hydroxyl-Grupp kriggt dat Alkohol-Molekül sien polaren Egenschoppen. Twüschen Ethanolmolekülen künnt sik t. B. Waterstoffbrüchen utbilln. Dordör kummt dat to’n Antrecken un Vernetten von benavert Alkoholmolekülen, wat denn to de fletige Phaas föhrt.

Anners as bi’n Alkohol, hebt de Hydroxyl-Gruppen in de Phenolen suer Egenschoppen, wiel dat Phenolat-Anion, dat bi de Afgav von en Proton entsteiht, mesomeriestabiliseert is (de +M-Effekt is grötter as de -I-Effekt). Dat gült twor ok för aliphatische Enolen, dor liggt aver – in Gegendeel to’n Phenol – bi de Keto-Enol-Tautologie meist blots dat Keton vör, as dat von de Energie her günstiger is. Bi de Phenolen is dat jüst umgekeehrt wegen dat Utbilln von dat aromaatsch System (kiek ok bi Hückel-Regel).

annere Bedüden[ännern | Bornkood ännern]

De Hydroxyl-Grupp -OH dröff nich verwesselt warrn mit dat negative OH--Ion (ok Hydroxid-Ion) ut de Anorganisch Chemie un ok nich mit dat Hydroxyl-Radikal, wat t. B. in de Eerdatmosphäär vörkummt.