Homo ergaster

Vun Wikipedia
Wesseln na: Navigatschoon, Söök
Homo ergaster
Schädel vun Homo ergaster, Fossil-Nr. KNM-ER 3733
Systematik
Ornen: Primaten
Ünnerornen: Dröögnesenapen
Böverfamilie: Ooltweltapen (Catarrhini)
Familie: Minschenapen (Hominidae)
Tribus: Hominini
Geslecht: Homo
Oort: Homo ergaster
Wetenschoplich Naam
Homo ergaster
Groves & Mazák, 1975

Homo ergaster is en utstorvene Aart mank de Hominini. He höört to dat Geslecht vun de Minschen. Fundstücken, de to düsse Aart torekent weert, stammt sunnerlich ut dat ole Pleistozän un sund twuschen 1,9 un 1,4 Millionen Johre oolt. Funnen wurrn sund se in Koobi Fora in Oostafrika un in Swartkrans in Süüdafrika. Dat gifft avers ok en Reeg vun Fundstücken, de stammt ut jungere Schichten un sünd womööglich man bloß bi 1 Million Johre oolt.[1]

Etymologie[ännern | Bornkood ännern]

Homo is de Naam vun dat Geslecht, wo denn de Naam vun de Aart ergaster achtern toföögt wurrn is. ergaster kümmt ut de Ooltgreeksche Sprake un bedutt „Arbeitsmann“. Dat schall henwiesen up dat Bruken vun Steenwarktüüch (Pebble Tools), wat bi düsse Aart begäng ween hebben schall.

Eerste Funnen un eerst Beschrieven[ännern | Bornkood ännern]

De Fundstücken in Süüdafrika sünd al 1949 vun John T. Robinson updeckt wurrn. He hett jem toeerst den Naam Telanthropus capensis geven.[2]As Homo ergaster is he dat eerste Mol beschreven wurrn vun Colin Groves un Vratislav Mazák in en Facktiedschrift in de Tschechoslowakei.[3]Dor weer dat Unnerkiff-Fragment KNM-ER 992 de Grundlaag för. Dat weer al 1971 vun Richard Leakey in Koobi Fora in Kenia updeckt wurrn. Sie Öller weer dormols up bi 1,5 Mio. Johre taxeert wurrn;[4] Leakey harr düt Fundstück 1972 publiek maakt un harr dat to dat Geslecht Homo stellt, man över en besunnere Aart harr he sik nich utspraken.[5]

Unner Umstänn stammt Homo ergaster vun den Homo rudolfensis af. Homo erectus schall denn wedder vun Homo ergaster afstammen. Ut desülvige Tied un ut desülvigen Gemarken in Afrika gifft dat Fundstücken vun annere Aarden mank de Hominini, de mööglicherwiese mit Homo ergaster tohopen leevt hefft: Paranthropus boisei, Homo rudolfensis un, unner Umstänn, Homo habilis.

De Fundstücken ut Koobi Fora sünd in Kenia sien Natschonalmuseum in Nairobi unnerbröcht[6], de Fundstücken ut Swartkrans sünd in dat Transvaal Museum in Pretoria.

Wo de Homo ergaster torekent warrt[ännern | Bornkood ännern]

Homo ergaster un de Minschenaarden, de vun em afstammen döen

In de Paläoanthropologie warrt dor noch um streden, of de Homo ergaster to Recht as en egen Aart ankeken warrt, oder of he bloß man en Unneraart un annere Form vun den Homo erectus is. Allerhand Knaken, de fröher to den Homo erectus rekent wurrn weern, weert hüdigendags vun de wecken Forschers as egenstännige Aart ankeken, man vun annere Forschers jummers noch to Homo erectus rekent.

Belegen[ännern | Bornkood ännern]

  1. Ulrich Welsch: Die Fossilgeschichte des Menschen. Teil 1: Wie aus den ersten Primaten Homo wurde. Biologie in unserer Zeit 1/2007, S. 42–50
  2. Robert Broom, John T. Robinson: A new type of fossil man. Nature 164, 1949, S. 322 f.
  3. Colin Groves, Vratislav Mazák: An approach to the taxonomy of the Hominidae: Gracile Villafrancian hominids of Africa. In: Casopis pro Mineralogii Geologii 20, 1975, S. 225–247
  4. anthropology.si.edu: Bild vun dat Fragment KNM-ER 992
  5. Richard Leakey: Further Evidence of Lower Pleistocene Hominids from East Rudolf, North Kenya, 1971. Nature 237, 1972, S. 264 – 269,
  6. De Archiv-Afkörten KNM steiht för keniaansch Natschonalmuseum.