Henry-Draper-Kataloog

Vun Wikipedia
Wesseln na: Navigatschoon, Söök

De Henry-Draper-Kataloog is en astronoomschen Steernkataloog, de Daten to de Positschoon un Spektralklass vun 225.300 Steerns bargt. Angaven, de sik op den Kataloog beteht, warrt mit de Afkörten HD un de Tall vun den Steern maakt. To’n Bispeel hett de Polarsteern de Beteken HD 8890.

Beschrieven[ännern | Bornkood ännern]

De Kataloog is dat eerste mol twüschen 1918 un 1924 vun Anny Jump Cannon un ehr Kollegen an’t Harvard College Observatory ünner de Opsicht vun Edward Charles Pickering in ngeen Bännen rutgeven worrn. Den Naam hett he to Ehren vun Henry Draper kregen, den sien Weetfro dat Geld dorför praatstellt hett. In’t Johr 1949 is de Kataloog nochmol utwiet worrn op tohopen 359.083 Steerns.

Steerns, de in dissen Kataloog oplist warrt hebbt mittlere schienbore Helligkeiten rünner bit na de 9. Gröttenklass. Dat is ruchweg 50-mol swacker as de lichtswacksten Steern, de een jüst noch so mit dat fre’e Oog sehn kann. För professschonelle Instrumenten an Steernwachten sünd dat allns helle Steerns, man för Teleskopen, de vun Amateuren bruukt warrt, sünd dat dörsnittliche Objekten. De Henry-Draper-Kataloog deckt den helen Himmel un gellt as de eerste groot anleggte Akschoon, de Spektraltypen vun de Steern in en Kataloog tosamentofaten.

De HD-Kataloogbeteken warrt sünners bi Steerns bruukt, de keen Bayer-Beteken hebbt un ok keen Flamsteedtall afkregen hebbt. De Steern ut den Originalkataloog sünd mit de Tallen 1 bit 225300 afdeckt un na de Reeg vun jemehr Rektaszension för de Epoch 1900.0 sorteert. Steerns mit de Tallen 225301 bit 359083 sünd 1949 dorto kamen un fangt faken ok mit de Afkörten HDE (HD extension) an. Man, tomeist warrt ok dor blots eenfach HD schrven, vunwegen dat de Tallen eendüdig toordent sünd.

Weblenken[ännern | Bornkood ännern]