Heinrich von Borstel

Vun Wikipedia

Heinrich von Borstel (* 9. Januar 1936 in Wischhoben) is en düütschen Politiker von de SPD.

Von Borstel is 1936 in Wischhoben boren. Sien Vader is al doodbleven as he 13 Johr oold weer. He hett na de Volksschool un de Realschool in Freeborg en Lehr as Bankkoopmann maakt. Na de Lehr hett he sik as Stüürberader wieder utbillen laten. Von 1961 af an weer he toeerst Stüürbevullmächtigten un siet 1974 denn Stüürberader.

Von Borstel is 1955 in de SPD ringahn. He weer Viez-Vörsitter von’n SPD-Oortsvereen Noord-Keden un weer von 1976 af an Vörsitter von de Arbeidsgemeenschop Sülvstännige (AGS) von de SPD in’n Bezirk Noord-Neddersassen. He weer stellvertreden Maat von’n Verwaltungsraad von de Kreisspoorkass Stood. As Maat von’n Opsichtsraad weer he bi de Affallverwertungs-GmbH in Stood un Vörsitter von de Oortsgrupp Wischhoben von’n Rieksbund von de Kriegsdeelnehmers un Kriegsbeschädigten. Von 1964 bet 2011 is von Borstel Raadsherr in Wischhoben ween un von 1991 bet 2011 is he dor denn ok Börgermeester ween. In de Samtgemeen Noordkeden weer he von 1971 bet 2011 Raadsherr un en lange Tied ok Frakschoonsvörsitter von de SPD. 1971 is he Afornten in’n Kreisdag von’n Landkreis Stood worrn un weer dor Vörsitter von’n Sportutschuss un finanzpolietschen Spreker von de SPD.

He weer in de 12. un 13. Wahlperiood von’n 21. Juni 1990 bet 1998 Maat von’n Landdag von Neddersassen.

Von Borstel hett an’n 30. März 2012 dat Bundsverdeenstkrüüz an’t Band kregen. An’n sülven Dag is he ok Ehrenbörger von Wischhoben worrn. 2016 hett he för siene Arbeid för den Tourismus in de Region den Gollen Heekt kregen.

He is verheiraadt mit siene Fro Sigrid. De beiden hebbt kene Kinner.