Geocaching

Vun Wikipedia
Wesseln na: Navigatschoon, Söök

Geocaching is en Sport un Speel, de buten bedreven warrt. Dat geiht dor um, en „Schatt“ (eng.: „cache“) to finnen, de enerwegens versteken wurrn is. För düsse Söök warrt en GPS-Upnehmer bruukt. De cache is normolerwiese eene lüttje, waterdichte Döse mit en Logbook un den Schatt. Nadem he den Schatt versteken hett, maakt de Minsch, de dat maakt hett, de Stäe bekannt vör annere Geocachers, tomeist via Internett. Annere Lüde könnt nu, wenn se den Schatt funnen hefft, Gegenstänne tuuschen un/oder tofögen. Bi den Schatt is jummers dat Logbook bi, wo de Finner sien Naam indregen kann. Dat is ok dor up afsehn, datt de Finner up de Webstäe vun den doren Schatt en Bericht schrifft, ok wenn dat nich slumpt hett, den Cache to finnen.

Geocache

Wonnehr man Koordinaten verglieken deit, is dat wichtig, to weten in wat för’n System dat GPS arbeiden deit. An un for sik is en GPS up WGS84 instellt. Wenn Koordinaten umrekent weern mütt, gifft dat dor verschedene Sieten för in’t Internett.

Mööglich wurrn is dat Speel „Geocaching“ eerst, nadem de US-amerikaansche Regeerung Sluss maakt hett mit de Selective Availability vun dat GPS. Dat weer an’n 1. Mai 2000. Bit dorhen is GPS bloß man vun dat Militär bruukt wurrn. De eerste Cache, den siene Geschichte upschreven wurrn is, is al an’n 3. Mai 2000 dör Dave Ulmer versteken wurrn. De Stäe is bekanntmaakt wurrn in de usenet-nieuwsgroup sci.geo.satellite-nav [1]. An’n 6. Mai 2000 weer de Schatt al tweemol funnen wurrn.

Verschedene Aarden Caches[ännern | Bornkood ännern]

Bi de eenfachen Caches kann de Bruker liek up de richtige Stäe tolopen. Man dorneven gifft dat ok en Barg Caches, de en beten wat vigelienscher sünd. Dor mutt een denn sotoseggen eerst mol den Padd upspören. Un dor geiht dat denn faken gor nich mol toeerst um den Schatt bi, man um dat Lostrecken un Söken un Utfinnen vun mooie Stäen in de Natuur oder in de Städer. Caches könnt in düsse Aarden unnerdeelt weern:

  • Normole Caches. Das is de eenfachste Aart. De Endpunkt steiht in’t Internett to lesen. De Cacher föögt de Koordinaten in un kann los gahn.
  • Multicaches Bi düsse Caches is bloß de Punkt bekannt geven, wo dat losgeiht. An düsse Stäe könnt denn dör Söken un dör Lösen vun en Upgave de Koordinaten vun den Schatt (oder vun den neegsten Twuschen-Stopp) funnen weern.
  • Mystery cache Bi düsse Caches is nich de Stäe vun den Schatt angeven, man bloß en Punkt in den siene Naberschop. Nadem vöraf allerhand Puzzles un Upgaven lööst wurrn sünd, kann de Schatt funnen weern.
  • Event cache Bi düsse Caches steiht amenne, datt de Geocachers, de dor mitmaakt hefft, sik dreept an en bestimmten Oort un sik dor denn over dat Geocachen unnerhoolt. Na dat Drepen schall de Eventcache för’t Archiv tohopenfaat’ weern. Faken weert speziell för so’n Drepen nee Caches maakt un blievt denn achterna ok liggen.
  • Earth Cache Dat is en Cache, de wat mit Bildung to doon hett. De Cacher kummt up en besunnern Platz, wo he wat lehren kann un mutt dor (an Stäe vun dat Utfüllen vun en Logbook) twee Updräge övernehmen. Dat eerste is, datt he bi sien Log en Foto instellen deit, wo de Cacher un de Platz up to sehn sünd. Dat tweete is, dat he en Fraag beantworden mutt, de ehre Antwoort he bloß man an düsse besunnere Stäe finnen kann.
  • Virtuele cache An en Reeg vun Stäen is dat nich mööglich oder gifft dat keen Verlööv, dor hen to gahn. En virtuellen Cache is also en Oort in’t Nett. Düsse Caches weert as „funnen“ ankeken, wenn de Cacher en Fraag över den Oort beantworden kann oder wenn he dor en Foto vun wiesen kann.
  • Webcam cache De Cache steiht in dat Bild vun en bestimmte Webcam.

Striet um Geocaching[ännern | Bornkood ännern]

Vunwegen datt Geocaching sik jummers mehr utbreden deit, gifft dat ok allerhand Probleme. In veel Natur-Rebede is dat to’n Bispeel verboden, Saken in to buddeln oder buten de Wege to lopen. Toeerst hett dat so wenig Geocachers geven, datt dor numms up keken hett, man amenne sund dor doch towielen en paar besunnere Schuul-Rebede bi in Dutt gahn. Dor gifft dat ok Natuurschuul-Aktivisten um, de Geocaching an’n leevsten verbeden döen.

De Schatt[ännern | Bornkood ännern]

Schatt

De Schatt (oder: stash / cache) is faken en Döse, wo allerhand Tüüch in to finnen is. Wer so’n Döse finnen deit, kann dor Saken tuuschen oder egen Tüüch hento fögen. Dat is nich vörsehn, enkelte Saken ut den Schatt rut to nehmen, vunwegen datt de Schatt denn amenne dröge liggt. So’n Tüüch in’n Schatt is faken lüttjen, billigen Tüdelkraams, as en Speeltüüch-Auto, Slötel-Anhänger oder anner Speeltüüch. An verscheden Stäen, sunnerlich in Städer, is gor keen Platz, um dor en grote Döse unner to bringen. Denn warrt dor en lüttje Film-Döse för bruukt. In so’ „Microcache“ is denn man bloß Platz för en Logbook.

Na en grote Tahl unbekannt Saken in en Schatt gifft dat ok Gegenstänne, de registreert sünd. Dat sünd de so nömmten Travelbugs. Se hefft en ganz egen Identifikatschoons-Nummer. Dor kann de Reis vun den Gegenstand via dat Internett mit verfolgt weern. De meisten Travelbugs hefft en ganz bestimmt Teel mitkregen, wo se ankamen schöllt. Faken bedutt dat, se schöllt so veel Länner besöken, as dat man mööglich is. Dat is vörsehn, datt en Travelbug, wenn he denn funnen wurrn is, na en paar Weken wedder in en annern Schatt unnerbrocht warrt. So blifft de Travelbug in’t Speel un ok anner Lüde könnt em finnen.

En Variante vun den Travelbug is de Geocoin. Dat is en spezielle Münte in verscheden Formen. Se warrt herstellt vun Geocachers oder vun Gruppen. En Geocoin hett, just so, as en Travelbug, en egen ID-Nummer.

Belege[ännern | Bornkood ännern]

  1. GPS Stash Hunt... Stash #1 is there! De eerste geocachelocatie werd geplaatst in de nieuwsgroep sci.geo.satellite-nav

Weblenken[ännern | Bornkood ännern]