Geert Wilders

Geert Wilders 2010

Geert Wilders (* 6. September 1963 in Venlo, Provinz Limborg) is en nedderlannschen Politiker. He is Vörsitter vun de Partij voor de Vrijheid (PVV) un höört vun 1998 af an to de Tweete Kamer. He warrt as en Mann ankeken, de den Islam scharp tegenöver steiht.

Leven

Wilders is boren in Venlo as Söhn vun en nedderlannschen Vadder ut de limbörgsche Landgemeen Maasbree un en Mudder ut Sukabumi in Nedderlannsch Indien. De Vadder hett bi de Firma Océ arbeit. Vun sien Vadder hett Wilders as Jugendlichen nix Godes över Düütschland to höörn kregen. In de Tied vun’n Tweeten Weltkrieg hett de Vadder sik vör de Nazis versteken mösst. Wilders besöch de Middelschool vun dat kathoolsche St. Thomas College to Venlo. He is ok röömsch-kathoolsch döfft wurrn, man, as he grootjöhrig wurrn weer, is he ut’e Karken uträen. As en Studenten vun 18 Johren hett Wilders 1982 to’n eersten Mol en islaamsch Land besöcht. Dor hett he, so hett he dat sülms vertellt, fründliche Lüde drapen, de jummers geern hölpen döen, man ok Bangigkeit vör „islaamsche Herrschers“. As he mit’e Scholen feerdig weer un den Militärdeenst achter sik harr, hett he 1983/84 för en Versekerungs-Sellschop arbeit. Bito studeer he Wetenschoppen vun dat Recht an de nedderlannsche Feernuniversität. Achternah hett he en paar Maande in en Moschaw in Israel arbeit’. Wilders seggt, he mag “Israel jummers noch bannig geern lieden” . Den Staat Israel kickt he as den groten Bundsgenoten un Fründ vun siene Partei an.

An’n 31. Juli 1992 hett he siene ungaarsche Fro Krisztina in Budapest heiraat.

Wilders is 1989 Liddmaat wurrn vun de Volkspartij voor Vrijheid en Democratie (VVD). Ehr he in de Politik instiegen dö, hett he vun 1984 bit 1986 bi den Raat för de Krankenversekerung mitarbeit’. De höör to dat Ministrium för Gesundheit, Weelde un Sport. 1986 bit 1988 weer he in’n Raat för de Sozialversekerung. In de Johre vun 1990 bit 1998 is he togange ween för de Fraktschoon vun de VVD in dat nedderlannsche Parlament. Dor hett he Reden schreven un sik mit Themen ut de Sozialwetenschop befaat. Bovendem hett he mitmaakt bi de ungaarsche Arbeitsgrupp vun de VVD. De hett sik dormols up de Achterbeene stellt, datt de Slowakei un Rumänien nich to de EU biträen dröffen (vunwegen de doren ungaarschen Minnerheiten). Korte Tied lang hett he ok in den Raat vun de Gemeende Utrecht seten. Man 1998 is he för de VVD in de Tweete Kamer vun de Generalstaten (dat nedderlannsche Parlament) wählt wurrn, just so, as bi de neegste Wahl 2002. In’n September is he bi de VVD utstegen un hett, as Eenmann-Fraktschoon, de „Grupp Wilders“ upmaakt. Anfang 2006 hett he de Partij voor de Vrijheid upmaakt. De Partei is anträen bi de Wahlen to dat nedderlannsche Parlament an’n 22. November 2006 un hett stracks 5,9 % vun de Stimmen kregen. Dor is se denn mit negen Sitte in’t Parlament intagen.

In’t Johr 2007 is he vun de apentlich-rechtliche Rundfunkanstalt Nederlandse Omroep Stichting to’n „Politiker vun’t Johr“ wählt wurrn. As Grund is angeven wurrn, datt he „de Diskusschoon över Politik regeern“ dö un datt he „de Debatt an sik rieten“ dö.

Nadem Mohammed Bouyeri an’n 2. November 2004 den Speelbaas un Filmemaker Theo van Gogh ümbrocht hett, sitt duerhaftig Polizei achter Wilders ran un passt up em. Dat warrt seggt, Wilders weer jede Nacht annerwegens to slapen un he konn siene Fro man bloß „eenmol in een oder twee Weken“ sehn. He is de eenzigst Afordente in de Tweete Kamer, den siene Adresse nich bekannt maakt warrt.

In’n Februar 2009 is dor in de Medien allerhand Wind vun maakt wurrn, datt de Regeerung vun Grootbritannien em nich in dat Land laten wull. Düt Verboot, man eerst Recht, datt he achterher in London achter Trallen kamen is, hett in dat Binnen- un Butenland för Proteste sorgt. Wilders wull dormols sien Film Fitna in dat brittsche Parlament vörspelen. Dor harr em en brittschen Afordenten to inlaadt. De Film geiht gegen den Islam gegen an. Wilders is denn avers vör Gericht dörkamen un konn denn in’n Oktober 2009 wedder na London reisen.

An’n 20. Januar 2010 is vör en Gericht in Amsterdam en Prozess gegen Wilders losgahn, weil em vörsmeten wurrn is, he dö „dat Volk uphissen“.

Wo Wilders sik för insetten deit in de Politik

Wilders is dor bekannt för, datt he gegen den Islam angahn deit un datt he dor nix vun höllt, wenn de Törkei in de EU inträen deit. He stellt sik ok up de Achterbeen, datt nich so veel Lüde in de Nedderlannen inwannern könnt.

Nedderlannsche Forschers vun den IVA, de sik mit den Extremismus ut’neen setten doot, hefft sik in’n Updrag vun dat Binnenministerium mit Wilders siene Politik befaat un meent, dor hannel sik dat um „neo-rechtsradikale“ Politik bi. Dat weer en nee Aart vun Rechtsradikalismus, de nix mehr mit de ole Rassenlehr to kriegen harr.

Politikwetenschopplers, as Frank Geldmacher, Frans Becker oder René Cuperus, nömmt Geert Wilders en typischen Populisten vun de rechte Siet.

In de Berichten in de Massenmedien warrt Wilders ok meist en „Rechtspopulisten“ nömmt. To’n Deel warrt ok seggt, he weer bange för frömme Lüde. Anners fallt dat Oordeel vun den düütschen Journalisten un Schriever Henryk M. Broder ut. He meent, datt weer utverschaamt un ganz verkehrt, wenn Wilders en „Rechtspopulisten“ nömmt warrt, bloß, vunwegen datt he nich bange is un över den Islam de Wohrheit seggt. De Kritiek an Wilders sien „Fitna“-Film weer ok man bloß Bangigkeit, un en Appeasement-Politik, de de Muslims al vörweg begööschen scholl

Weblenken

• Geert Wilders bei Parlementair Documentatie Centrum (PDC) van de Universiteit Leiden (nedderlannsch)
• Weblog Geert Wilders (engelsch)