Frank Frederick Borman

Vun Wikipedia
Frank Frederick Borman

Frank Frederick Borman, II (* 14. März 1928 in Gary, Indiana, USA; † 7. November 2023 in Billings, Montana[1]) weer en US-amerikaansch Astronaut.

Leven[ännern | Bornkood ännern]

Nahdem Borman 1950 an de Militärakademie in West Point sien Luftfahrttechnikstudium beend harr, deen he bit 1953 as Kamppilot vun de Luftwaffe up de Philippinen, dornah as Flooglehrer in Georgia un Arizona. 1957 kreeg Borman en Master in Luft- un Ruumfohrt. Dornah lehr he bit 1960 as Assistenzperfesser in West Point Thermodynamik un Fluidmechanik. Denn is he weer an de Edwards Air Force Base in Kalifornien torüchgahn un weer in’t Cockpit stegen: toeerst in de Utbilln to’n Testpilot, dornah as Utbilder.

An’ 17. September 1962 wurr he vun de NASA in de tweete Astronautengrupp wählt un övernehm as Spezialupgaav de Raketen, de de Ruumschipp in de Erdumloopbahn bringen sullen.

Enn’ 1963 war Borman as Ersatzpilot för de Mission Gemini 3 vorgesehen. Wiel sück dat denn aber all verschoben hett, wurr he denn Ersatz-Kommandant vun de Mission Gemini 4, wat an’ 27. Juli 1964 bekannt geven wurr.

As nächst wurr he denn Kommandant vun de Mission Gemini 7. Tosommen mit Jim Lovell hett he van 4. Dezember bit to’n 18. Dezember 1965 de Eer umkreist, en Langtietrekord, de eerst 1970 braken wurr.

Nah de Katastrooph vun Apollo 1, bi de dree Astronauten to Dood keemen, weer Frank Borman Liddmaat vun de Kommision, de dat ünnersöken de. In de Folg kreeg he de Upgaav, dat Team för den Umbau vun de Apollo-Kommandokapsel to leiten

Nahdem de Mission Apollo 7 good verloopen weer, floog Borman as Kommandant vun Apollo 8 nah de Maand. Tosommen mit James Arthur Lovell un William Alison Anders is Borman 1968 eerstmals mit en Ruumschipp Richtung Maand floogen un hett de umkreist. Dat weer bannig spannend, wiels man nich wuss, wu dat utgahn dee, aber dat gung all glatt un dat weer en bannig grooten Spood. 7 Daag düer de Mission.

An’ 1. Juli 1970 is Borman bi de NASA utscheden un gung to de amerikaansch Floogsellschap Eastern Airlines, toeerst as Viezpräsident, af 1976 as Vörsitter. Während sien Tiet bi Eastern harr de Sellschap de veer profitabelsten Johresafslüsse vun hör Historie.

1986 truck he sück ut dat Ünnerehmen torüch. He hett denn Floogtüüch restaureert.

Ehrungen[ännern | Bornkood ännern]

He is Liddmaat in de National Aviation Hall of Fame, in de blots wenig Astronauten Liddmaat sünd.

Literatur[ännern | Bornkood ännern]

  • Frank Borman, Countdown: An Autobiography, Silver Arrow, 1988, ISBN 0-688-07929-6 (engelsch)

Weblenken[ännern | Bornkood ännern]

Enkeld Nahwiesen[ännern | Bornkood ännern]

  1. James R. Hagerty: Frank Borman, Who Led Historic Flight Around the Moon in 1968, Dies at Age 95. In: wsj.com. 9. November 2023, afropen an’n 9. November 2023 (amerikaansch Engelsch).