Feederschipp
En Feederschipp (Utspraak „Fiederschipp“, vun Engelsch feeder vessel oder feeder ship; vun to feed = fodern, versorgen) is en Frachtschipp, dat sunnerlich for den Transport vun Containers oder Autos boot wurrn is. Dat verdeelt de Fracht for grote Seescheepe un Seehabens un levert de dor to. En Feederschipp nummt siene Ladung an den Containerterminal up. Feederscheepe könnt ok mit egene Laadböme utstafeert sien un denn ok lüttjere Habens anlopen, wo dat an de Kajen keen Kraans oder keen Containerbruggen gifft. Feederscheepe sund en moderne Form vun de olen Kümos.
Düsse Schippstyp is togange as Tobringer un Verdeeler for de groten Container- un Autoterminals in Seehabens un Deepwaterhabens, de vun bannig grote Scheepe anlopen weern könnt. Vun un to düsse Habens bringt de Feeder siene Fracht to lüttje Küsten-, Kanal- un Binnenhabens.
Feederscheepe weert ok insett, wenn sik dat for en groot Containerschipp nich lohnen deit, wegen man blot en poor Containers en Haben an to lopen. Annere Grünn könnt ween, wenn de Haben for groten Deepgang to sied is oder wenn dat nich noog Plätze to’n Anleggen for grote Scheepe gifft.
Feederscheepe verscheelt sik in de Grötte. Dat hangt dor vun af, wo se unnerwegens sund. In Europa könnt de meisten vun düsse Scheepe en poor Hunnert TEU verschippen. De gröttsten Scheepe, de in’n Verkehr na de Habens in de Oostsee insett weert (Baltic Max Feeder), bringt dat up um un bi 1.400 TEU.[1] In Ostasien sund ok Feederscheepe unnerwegens, wo veel mehr as 1.000 Containers mit verschippt weern könnt. Se bringt ehre Ladung to de gröttern Scheepe hen, de 5.000 bit 8.000 Containers dregen könnt. In de Binnenschipperee weert jummers mehr Containerscheepe bruukt. De neesten Scheepe vun de Jowi-Klass bringt bit to 500 TEU vun de Habens an de Rhien-Münnen in dat Binnenland.
Kiek ok bi[ännern | Bornkood ännern]
Belege[ännern | Bornkood ännern]
- ↑ Hansa, Vol. 146, August 2009, S. 77