Föhren

Vun Wikipedia
Wesseln na: Navigatschoon, Söök
Föhren
Wooldföhr (Pinus sylvestris)
Systematik
Afdeel: Nadelbööm (Pinophyta)
Klass: Pinopsida
Ornen: Pinales (Föhrenoordige)
Familie: Pinaceae (Föhrenfamilie)
Ünnerfamilie: Pinoideae
Geslecht: Föhren
Wetenschoplich Naam
Pinus
Linnaeus
Snitt dör en 5-jöhrigen Föhrenstamm
Kortspranten mit jemehr Nadels op en Twieg

De Föhren of Groffdaennen (latiensch: Pinus) sünd en Geslecht vun Nadelbööm (Pinophyta) in de Familie vun de Pinaceae (Föhrenfamilie).

Vörkamen[ännern | Bornkood ännern]

De Föhren sünd vör allen op de Noordhalvkugel vun de Eer tohuus. Se möögt de köhl-fuchten Klimarebeden, se hebbt aber ok subtroopsche un troopsche Rebeden besiedelt. Vundaag warrt se weltwiet anboot.

Beschrieven[ännern | Bornkood ännern]

De mehrsten Föhrenoorden wasst as Bööm, ’n poor ok as Strüker. Föhren sünd ümmergröön. Vergleken gegen de anneren Nadelboomgeslechter sünd ehr Nadels besünners lang. Se staht (je na Oort) in Büschel vun twee, dree oder fief op Kortspranten, de vun de Twiegen afgaht (Rechts gifft dat ’n Bild dorvun). Bi Fichten un Dannen staht de Nadels enkelt direktemang op den Twieg.

Weertschopliche Bedüden[ännern | Bornkood ännern]

Weltwiet sünd de Föhren de wichtigsten Boomoorden för de Forstweertschop. Se verlangt nich veel un wasst goot. Un so warrt se faken an de Steed vun inheemsche Boomoorden anplant, to’n Bispeel wenn de Woold raadt oder afbrennt is. Sogor in de Tropen un Subtropen warrt se in Holtplantaschen anboot. Ok in’t Middelmeerrebeet gifft dat grote Föhrenplantaschen, mehr as disse Bööm in de Natuur vörkummt, tomehrst as Monokultur. För den Bodden is dat op de Duur nich goot.

Dat Föhrenholt is licht un riek an Kien. Dat warrt as Boholt, för den Innenutbo, as Möbelholt un as Papeer bruukt.

Bi welke Föhrenoorden is de Saat so groot, dat een de eten kann (Pinienkarns).

Systematik[ännern | Bornkood ännern]

Dat Föhrengeslecht (Pinus) warrt in dree Ünnergeslechter (subgenus) ünnerdeelt:

  • Ducampopinus
  • Strobus
  • Pinus

Disse dree Ünnergeslechter hebbt tosamen üm un bi 115 Föhrenoorden.


Naam[ännern | Bornkood ännern]

Dat Woort Föhr gifft dat in meist all de germaanschen Spraken, to’n Bispeel ingelsch fir. Dat Hoochdüütsche Kiefer is ut Kien-Föhre tosamentrocken. Kien is dat Boomhoorz vun de Föhr.


Commons-logo.svg Föhren. Mehr Biller, Videos oder Audiodateien to’t Thema gifft dat bi Wikimedia Commons.