Föörwenn

Vun Wikipedia
Feld in’n Winter, vörn de Föörwenn

De Föörwenn oder ok Anwenn is de Striepen an’n Rand vun’n Acker op de de Buur bi de Feldarbeit mit sien Feldmaschinen wennen deit (bi’t Plögen, Seien un so wieder), dat he de nächste Föör tehn oder langsföhren kann. De Acker hett also mehrsttiets twee Föörwennen an de beiden korten Sieden vun dat Feld. De Föörwenn sülvst warrt eerst ganz to’n Sluss bearbeidt. Ans würr de Buur dat mit sien Maschien ja allens wedder kaputtföhrn. De Fören op de Föörwenn staht dorbi denn senkrecht to’n Rest vu’n Acker.

Dör de sworen Maschinen warrt de Bodden vun de Föörwenn veel dichter tohoopdrückt. Dor wasst de Planten denn slechter, wenn de Buur nich wat fakener plöögt un de Eer oplockert. De Breed vun de Föörwenn hangt vun de Maschinengrött af.