Diskuschoon:Blombarg

Ik heff jümmer dacht hörrt is en Tippfehler (bi't Tippen schriev ik ok fakener mal jüümer oder Tiipfehler, dat ik also mit'n verkehrten Finger dubbelt tipp) un ik heff dat ok fakener na höört verbetert. Aver dat is Afsicht, nehm ik an. De Söök seggt, dat dat in 42 Artikels vörkummt. Dat köönt ja nich all Tippfehlers wesen. Wunnern do ik mi liekers. Bi mi is dat ö kloor lang. In de Wenker-Koort to hört is ganz Oosfreesland in de glieke Farv anstreken as mien Gegend (naja, egentlich bün ik ut en Rood-Streek-Dörp, dat hüürt seggt, aver de Ümgegend seggt höört). Dor steiht nix vun hörrt (denn müss dat blau wesen). Liekers finn ik ok bi Google en ganze Reeg Sieden ut Oostfreesland, de hörrt, hörrn un wörrn (dat is also nich blot dat ene Woord, dücht mi) bruukt. Is dat nu en Innovation ut Post-Wenker-Tieden oder wat hett dat dormit op sik? Oder is de Vokalquantität jüst an de Grenz vun lang un kort? (Ik bün ja ut en hüürt-Oort, dor is dat eenfach kort un lang utenannertohollen, bi dat korte ü ännert sik ja man de Vokalqualität. Bi ö höört sik kort un lang vun de Vokalqualität gliek an. Wenn dat en temlich korten langen oder en temlich langen korten Vokal is, denn is dat swoor utenannertohollen. Un veel mehr as kort un lang utenannerhollen kann de Wenker-Atlas ok gor nich leisten, soveel Farven un Formen för de Streken un Kringels gifft dat gornich ;-) ) --::Slomox:: >< 15:22, 5. Okt 2008 (CEST)

Ik hebb woll den Artikel schreven un völ vun de hörrt un wurrn stammt bestimmt ut mien Texten. Wat Du dor schreven hest, dor hebb ik kien Ahnung vun. Bi mi klingt dat hörrt so as to'n Bispeel bi dat düütsch Woort "Hörnchen". Of dat nu mit twee "ö" oder twee "r" schreben wurrn moot, weet ik ok nich. Wat mit blots stutzig maken deiht is, dat hier manchmal um en Woort "streeden" wurrd, aber anner Artikels, de ik meest nich lesen kann (wiel anner Dialekt) vollkommen unbehelligt blievt. Of dat all mit "Sass" in Inklang to bringen is, weet ik nich. Manchmal hebb ik so den Indruck, dat dat all up Stader (Stooder) Platt henschaben wurrd. Kann aber ok wesen, dat ik mi irre, wiel Stooder Platt kann ik ok nich.

Aber mit Utdrucken as "schriev mal erstmaal, so as Du dat meenst" sullen wi denn man beten vörsichtig wesen. Ik hebb mi all temelk anpasst in mien Schrievwies, aber wenn dat hier nicht anbrocht is, kann ik dat ok nahlaten. Eastfrisian 18:04, 5. Okt 2008 (CEST)

Dat deit mi leed, wenn dat anners röverkamen is. Du schasst schrieven, so as du dat för richtig höllst. Mien Fraag weer jüst dat, en Fraag. Ik bün numal neeschierig. Wenn ik Wöör seh, de komisch utseht (kannst seggen: nich na Stoder Platt utseht un anners as allens, wat ik al kennenlehrt heff), denn will ik jümmer den Achtergrund rutkriegen. Faken krieg ik em mit Wenker rut. Wenn ik em nich mit Wenker rutkrieg, denn fraag ik. Dat Fragen bedüüdt aver keen Kritik. Ik heff ja schreven, dat ik dat „verbetert“ harr, vun wegen dat ik dat för en Tippfehler hollen harr. Mi weer nich bewusst, dat dat würklich so heten schull. Harr ik wusst, harr ik dat nich „verbetert“ un ik will dat ok in Tokumft nich wedder „verbetern“. Nochmal, deit mi leed, dat dat verkehrt röverkamen is.

Un dat noch blangenbi: Wat ik hier schriev, warrt kuum en Stoder as Stoder Platt wedderkennen. Denn dee ik we'erkinnen schrieven un nich wedderkennen, ik dee schrieben schrieven un nich schrieven un ik dee boben schrieven un nich baven. hüürt un nich höört (as ik baven al schreven heff), mihr un nich mehr, wüür un nich weer, Wüür un nich Wöör un ok ween un nich wesen. Ik snack en Övergangsdialekt vun dat Platt vun de Stoder Geest un vun de Elvmaschen (Elv spreek ik Ülf ut). Bi dat, wat ik hier schriev, sünd allerhand Regionalia al rutflagen. --::Slomox:: >< 00:21, 6. Okt 2008 (CEST)

Moin, ik bin ehder weer dor, as ik dacht harr. As ik up mien Diskussionssiet all schreben hebb, hebb ik mi am meesten över Di upreegt un woll wat to Unrecht. Dorför eerst Mal Entschuldigung! Ik harr güstern woll all de Anfang van en Verkollen (oder wat dor noch van kummt) in de Knaken. Hööftgrund weer eegentlich, de ganze Redirects van jeder ok noch so lütt Kaff ahn dat överhoopt noch Artikels schreben wurrd. As denn mien Blombarg-Artikel "ok noch angreepen wurr", weer mi dat to völ. Ik hoop ik hebb Di nu nich to völ up de Fööt paast. Am besten, Du vergettst dat ganze Theater. Eastfrisian 18:06, 6. Okt 2008 (CEST)