Dieter Baumann

Vun Wikipedia
Wesseln na: Navigatschoon, Söök
Dieter Baumann 2006

Dieter Baumann (* 9. Februar 1965 in Blaubeuren) is en ehmoligen düütschen Lichtathlet un Olympiawinner. He tellt to de spoodrieksten Langstreckenlöpers in de düütschen Sporthistorie. Alleen bi natschonale Wettkämp al künn he 40 Meestertitels op Strecken vun 1500 Meter bit 10.000 Meter as ok in’n Crossloop winnen.[1] Sien Bestleistung över 1500 Meter vun’n 13. August 1997 in Zürich (dormols de Europarekord) is op disse Streck bit vundaag jümmer noch de gaueste Tiet vun en Löper, de nich ut Afrika stammt.[2]

Loopbahn[ännern | Bornkood ännern]

Baumann is anfangs för den Sportvereen LG Alb Donau an’n Start gahn, later för den VfL Waiblingen un Bayer 04 Leverkusen. Siet 2001 is he bi’n LAV asics Tübingen, vun den he in’n Mark 2004 Vörsitter worrn is. Bi en Grött vun 1,77 m harr he en Wettkampgewicht vun 62 kg.

In’n 5000-Meter-Loop, wat sien Spezialstreck is,[3] hett he twee olympische Medaillen wunnen: Bi de Spelen 1988 in Seoul lööp he op’n Sülvermedaille un bi de Spelen 1992 in Barcelona hett he de Goldmedaille wunnen, as he in en Spurtfinale de letzten 100 m in en Tiet vun 11,9 s torüchleggt hett. In’t glieke Johr is he ok to’n düütschen Sportler vun’t Johr wählt worrn. Dorna keem de Sieg bi de Lichtathletik-Europameesterschop 1994 över 5000 m, en tweeten Platz bi de Europameesterschop 1998 över 10.000 m un de Sieg bi’n Weltcup 1998 över 3000 m.

Doping-Schandaal[ännern | Bornkood ännern]

Bi en Dopingkontroll an’n 19. Oktober 1999 un ok bi en Kontrollproov an’n 12. November 1999 is Baumann positiv op den Wirkstoff Nandrolon ünnersöcht worrn. Bi de Verhanneln för’n Düütschen Lichtathletik-Verband is he un wegen dat Opfinnen vun Norandrostendion in sien Tähnpast – de Fall warrt dorüm faken ok as Tähnpastaffär betekent – un sien Hoorproven, de keen Befund geven deen, an’n 13. Juli 200 vun’n Verdacht vun’t Doping freesproken worrn. De IAAF hett dissen Freesprook vun’n natschonalen Verband liekers nich acht un hett Baumann an’n 18. September 2000 bit to’n 21. Januar 2002 sparrt un em nadräglich den natschonalen Titel över 5000 m afkennt. Baumann stritt bit vundaag af, de Middels mit Afsicht un sien egen Weten innahmen to hebben.

De Speelbaas Diethard Klante hett 2004 de Vörgäng üm den Doping-Schandaal in den Feernsehfilm „Ich will laufen! Der Fall Dieter Baumann“ verarbeit, de an’n 4. August 2004 in de ARD to’n eersten mol sennt worrn is.

De Molekularbioloog un Dopingkritiker Werner Franke hett 2006 in en Interview gegenöver dat Magazin Der Spiegel verklort, dat he de Funnen för en Anslag un Baumann dorüm för nich schullig hollt: „Baumann hat sich sehr für den Kampf gegen Doping engagiert. Seine Zahnpastatuben waren verseucht, erwiesenermaßen eine alte Stasi-Methode. Baumann hat zu viele Leute an sich rangelassen.“[4]

Enn vun de Loopbahn[ännern | Bornkood ännern]

As de Sparr aflopen weer, hett Baumann wedder an Wettkämp deelnahmen, un künn bi de Lichathletik-Europameesterschop 2002 wedder den tweeten Platz över 10.000 m beleggen. Dat Ümstiegen op de Marathon-Streck is aver nich goot lopen, as he 2002 bi’n Hamborg-Marathon na 30 km inbroken is un den Loop opgeven hett. 2003 hett he sien drüdden natshonalen Tiel över 10.000 m wunnen un sien ölvten över de 5000 m. Man, as dat mit tonehmen Öller för em jümmer sworer worrn is, sien gewohnte Leistung to bringen, hett he an’n 8. September 2003 sien Loopbahn in’n Leistungssport afslaten.

Besttieten[ännern | Bornkood ännern]

Streck Tiet Johr Oort Anmarken
1500 m 3:33,51 min 1997 Stuttgart
3000 m 7:30,50 min 1998 Monaco aktuell düütsche Rekord
5000 m 12:54,70 min 1997 Zürich aktuell düütsche Rekord
10.000 m 27:21,53 min 1998 Baracaldo aktuell düütsche Rekord
Marathon 2:30:00 h 2007 Frankfort an’n Main (na’t Enn vun sien Leistungssportloopbahn)

Anners wat[ännern | Bornkood ännern]

Bi’n Frankfort-Marathon 2007
  • Siet 1995 arbeit Baumann ok journalistisch as Kolumnist för de taz un dat FackblattRunner’s World. In’n Rahmen vun’n Freeborg-Marathon 2009 hett he to’n eersten mol sien Lüttkunstprogramm „Körner – Currywurst – Kenia. Ein locker leichter Abend über Laufen, Leben, Last und Lust“ vörstellt.[5]
  • Baumann is jümmer vun sien Ehfro Isabelle (borene Hozang) traineert worrn. Dat Poor hett en Dochter un en Söhn.
  • In sien Geboortsstadt Blaubeuren is na em en Sporthall nöömt worrn.

Publikatschonen[ännern | Bornkood ännern]

  • Ich laufe keinem hinterher. Kiepenheuer und Witsch, Köln 1995, ISBN 3-462-02455-8 (Autobiografie)
  • Lebenslauf. Düütsche Verlags-Anstalt, Stuttgart/München 2002, ISBN 3-421-05628-5 (autobiografische Dorstellen vun’n Doping-Schandaal); Droemer Knaur, München 2003, ISBN 3-426-77668-5 (aktualiseerte un üm twee neue Kapitel gröttere Taschenbookutgaav)
  • Laufen Sie mit. Das Trainingsbuch. Düütsche Verlags-Anstalt, München 2004, ISBN 3-421-05694-3 (Loop-Raatgever)
  • Laufende Gedanken Klöpfer & Meyer, 2009, ISBN 978-3-940086-35-8

Borns[ännern | Bornkood ännern]

  1. http://www.dieterbaumann.de/about/titel/set.htm
  2. http://www.arrs.net/AllTime/AL_O5K.htm
  3. http://www.arrs.net/AL_O5K3.htm
  4. Der Spiegel: „Nur die ganz Dummen“]. Nr. 33/2006, S. 158
  5. Dieter Baumann speelt, leest un löpt in Freeborg

Weblinks[ännern | Bornkood ännern]

Commons-logo.svg Dieter Baumann. Mehr Biller, Videos oder Audiodateien to’t Thema gifft dat bi Wikimedia Commons.