Den Herrn sien Wedderstandsarmee

Vun Wikipedia
Wesseln na: Navigatschoon, Söök

Den Herrn sien Wedderstandsarmee (Lord’s Resistance Army) is ene Rebellengrupp in’n Noorden vun Uganda, de 1987 grünnt worrn is un sietdem ünner Leid vun Joseph Kony gegen de Regeren vun Präsident Yoweri Museveni anstriedt.

De Idee vun de Grupp is, en fundamentalchristlichen Gottsstaat op Basis vun de teihn Botten in Uganda optorichten. Doch in Wohrheit beert se sik as en Röverbann, de över’t Land teht, Lüüd utroovt oder de Lüüd sülvst roovt un as Kinnersoldaten bruukt.

Siet 1986/1987 hebbt Lüüd vun de Wedderstandsarmee na Schätzungen mehr as 100.000 Minschen ümbrocht. De Wedderstandsarmee bruukt den Süden vun’n Sudan as Rebeet sik trüchtotehn. Mehrmals hett de ugandsche Regeren dorüm den Sudan beschulligt, de Rebellen to ünnerstütten. Uganda sülvst hett de Volksbefreeungsarmee vun’n Sudan ünnerstütt, de gegen de Regeren in’n Sudan arbeidt.

In’n Dezember 2003 hett Uganda de Wedderstandsarmee vör’n Internatschonalen Straafgerichtshoff in Den Haag anklaagt. Dat weer de eerste Fall för den Gerichtshoff, sietdem he 2002 inföhrt worrn is. In’n Juni 2005 hett Luis Moreno-Ocampo, Baas vun de Anklaag, enen Haftbefehl gegen Joseph Kony un noch enen Anföhrer vun de Wedderstandsarmee utspraken.