Costa Cordalis

Vun Wikipedia
Costa Cordalis, 2011

Costa Cordalis (* 1. Mai 1944 in Elatia (Ελάτεια), Fthiotida, Grekenland; börgerlich Konstantinos Kordalis; † 2. Juli 2019 op Mallorca) weer en düütschsprakigen Slagersinger mit greeksche Afstammen.

Leven un Wark[ännern | Bornkood ännern]

Cordalis hett mit söven Johren anfungen Gitarr to spelen. As he sössteihn weer, hett he sik in Frankfort an’n Main daallaten un lehr dor an’t Goethe-Institut de düütsche Spraak. He hett Abitur maakt un füng dorna en Studium in de Fäcker Philosophie un Germanistik an, dat he aver ahn Afsluss afbroken hett.

In’t Johr 1965 keem mit Du hast ja Tränen in den Augen sien eerste Schallplaat rut, wat en düütsche Faten vun Elvis Presley sien Leed Crying In The Chapel weer. Grötteren Spood harr he aver eerst vun 1973 an mit sien sülvst komponeerten Leder Carolina, komm un Steig in das Boot heute Nacht, Anna Lena. Sien gröttsten Spood bit hüüt weer de Titel Anita, mit den he dree Maanden lang in de Top 10 vun de Hitparaden bleven is.

1985 is he bi de Noordischen Skiweltmeetserschappen in Seefeld in Tirol för sien Heimatland Grekenland in’n Skilangloop an’n Start gahn. He weer in disse Disziplin tweemol greeksch Landsmeester. Egentlich wull he ok an de Olympischen Winterspelen 1984 in Sarajevo deelnehmen, hett sik aver nich qualifizeren künnt.

In’t Fröhjohr 2004 weer he Deelnehmer vun de eerste Staffel vun de RTL-Show Ich bin ein Star – Holt mich hier raus!, woneem he sik an’t Enn gegen all de annern dörsetten künn un „Dschungelkönig“ worrn is. Sien Priesgeld vun 28.000 € hett he an de Kinnerkrebshülp spennt. In Anlehnen an de Show hett he dat Leed Jungle Beat rutbröcht.

He hett ok lange Tiet jeed Johr an de Tour der Hoffnung deelnahmen. Dorbi hett he vele Kilometers mit’n Fohrrad torüchleggt un Geld för krebskranke Kinner sammelt.

Costa Cordalis weer verheiraat un hett mit sien Fro dree Kinner. Sien Söhn Lucas Cordalis un sien Dochter Angeliki Cordalis sünd ok in’t Showgewarf ünnerwegens.

Utteken[ännern | Bornkood ännern]

Borns[ännern | Bornkood ännern]

  1. http://infofrosch.info/g/go/goldene_stimmgabel.html

Weblenken[ännern | Bornkood ännern]

Costa Cordalis. Mehr Biller, Videos oder Audiodateien to’t Thema gifft dat bi Wikimedia Commons.