Charles Frend

Charles Frend (* 21. November 1909 in Pulborough, Sussex, England; † 8. Januar 1977 in London) weer en britischen Filmeditor un Speelbaas.

Leven un Wark

Frend hett de University of Oxford besöcht un füng dorna in’t Johr 1931 en Loopbahn as Editor bi de Produkschoonssellschop British International Pictures an. Man, kort later al wessel he na Gaumont British Pictures. In disse Tiet weer he bi veer Filmen vun Alfred Hitchcock för den Snitt verantwoortlich. Dorna hett he för de britischen Studios vun Metro-Goldwyn-Mayer in Elstree arbeit, woneem he ünner annern för The Citadel (1938) un Goodbye Mr. Chips (1939) tostännig weer. För den tweeten weer he sogor för den Oscar nomineert.

In’t Johr 1940 füng he an, as Speelbaas to arbeiten. Toeerst hett he en Reeg vun Propagandafilmen dreiht. Na’n Tweeten Weltkrieg weer he för gröttere britische Produkschonen ünner Verdrag nahmen, so as Scott of the Antarctic (1948) oder The Cruel Sea (1953). För den Film The Long Arm hett he 1956 en Pries kregen. In de 1960er Johren hett he ok för’t Feernsehn arbeit un Episoden vun britische Feernsehregen inszeneert, bit he sik 1970 ut dat Filmgewarf torüchtogen hett.

Frend is 1977 in’t Öller vun 67 Johren in London doodbleven.

Filmografie (Utwahl)

Johr	Titel	Funkschoon
1932	Arms and the Man	Snitt
1934	Waltzes from Vienna	Snitt
1935	Oh, Daddy!	Snitt
1936	Secret Agent dt.: Geheimagent	Snitt
1936	Sabotage	Snitt
1937	Young and Innocent dt.: Jung und unschuldig	Snitt
1938	The Citadel dt.: Die Zitadelle	Snitt
1939	Goodbye, Mr. Chips dt.: Auf Wiedersehen, Mr. Chips	Snitt
1939	The Lion Has Wings	Snitt
1942	The Big Blockade dt.: Die Blockade	Speelbaas
1942	The Foreman Went to France dt.: Ein gefährliches Unternehmen	Speelbaas
1948	Scott of the Antarctic dt.: Scotts letzte Fahrt	Speelbaas
1949	A Run for Your Money dt.: Kampf ums Geld	Speelbaas
1953	The Cruel Sea dt.: Der große Atlantik	Speelbaas
1956	The Long Arm dt.: Der lange Arm	Speelbaas
1957	Barnacle Bill dt.: Kapitän Seekrank	Speelbaas
1960	Cone of Silence dt.: Zone des Schweigens	Speelbaas
1959-61	Rendezvous, Feernsehfolgen	Speelbaas
1960-61	Danger Man, Feernsehfolgen dt.: Geheimauftrag für John Drake	Speelbaas
1963	Beta Som dt.: Treffpunkt Tanger	Speelbaas
1963	The Sentimental Agent, Feernsehfolgen	Speelbaas

Utteken

Charles Frend weer dreemol för Filmpriesen vörslahn. Dat eerste mol weer 1940, as he för Goodbye Mr. Chips in de Kategorie Best Snitt för den Oscar nomineert weer. 1949 weer he för den Goldenen Lööw vun’t Filmfestival Venedig vörslahn för den Film Scott of the Antarctic. Wunnen hett he 1956 den Sülvern Boor vun de 6. Berlinale för The Long Arm.

Weblenken

• Charles Frend in de Internet Movie Database (engelsch)