Catherine Ashton
Catherine Margaret Ashton, Baroness Ashton of Upholland (* 20. März 1956 in Upholland, Lancashire) is en Politikersche ut dat Vereenigte Königriek. Vun dat Johr 2009 af an is se De EU ehr Hoge Vertredersche for Buten- un Sekerheitspolitik un Eerste Viezpräsidentsche vun de Europääsche Kommischoon. Bovenhen höört se to dat brittsche Bovenhuus (House of Lords) un to den Privy Council; düsse Ämter öövt se avers nich ut, so lang se ehr Mandat for de EU wohrnehmen deit.
Leven
[ännern | Bornkood ännern]Catherine Ashton hett Soziologie an dat Bedford College studeert. Hüdigendags höört dat to de Royal Holloway, University of London to. Afslaten hett se 1977 mit den Bachelor of Science.[1] Achternah weer se bit 1979 for de Campaign for Nuclear Disarmament togange. Dat is en Organisatschoon vun de brittsche Fredensbewegen. Dor hett se dat bit to de Viezpräsidentsche un Schatzmeestersche brocht. Later hett se sik in de Soziole Arbeit insett’. Vun 1998 bit 2001 hett se de Gesundheitsbehörde in Hertfordshire vorstahn un weer Baas vun den Dregervereen vun de School vun ehre Kinner. Butendem is se ok noch Viezpräsidentsche in den brittschen Natschonalen Raat for Een-Ollern-Familien wurrn.
1999 is Ashton as Peer in den Adel upnahmen wurrn un hett den Titel vun en Baroness Ashton of Upholland kregen. Dor is se denn ok Liddmaat vun dat House of Lords mit wurrn. 2001 is se parlamentaarsche Staatsekretäärsche in dat brittsche Ministerium for Bildung wurrn. 2004 is se na dat Ministerium for Verfaten wesselt. Dor weer se unner annern tostännig for dat Natschonalarchiv vun dat Vereenigte Königriek. 2006 is se Liddmaat wurrn vun den Privy Council. Dor hannelt sik dat um de Grupp vun Raatgevers bi, de an de Siet vun de Königin steiht. In datsülvige Johr is se vun de brittsche LGBT-Organisatschoon Stonewall to’e „Politikersche vun dat Johr“ wählt wurrn. In’n Mai 2007 is Ashton parlamentaarsche Staatsekretäärsche in dat Ministerium for Justiz wurrn. Dat duer man blot en poor Weken, un de nee Premierminister Gordon Brown hett ehr to’e Vorsittersche vun dat Bovenhuus un to’n Lord President of the Council maakt.
Lady Ashton is verheiraat mit den Journalisten Peter Kellner un hett twee Kinner un dree Steefkinner. Ehr Mann stammt ut en Familie ut Öösterriek.[2]
Belege
[ännern | Bornkood ännern]- ↑ Royal Holloway, University of London: Movers and Shakers among the Department's former students.
- ↑ http://oe1.orf.at/inforadio/115662.html?filter=0
